ភ្នំពេញ៖ កីឡាករជើងថ្មីដែលមានសមត្ថភាពក្នុងកម្រិត B រួមមាន ឡុង រ៉ាមី, ពុទ្ធ ម៉ាណូយ, ឃន គឹមហេង និង តុម ផេង ត្រូវបានអ្នកគ្រប់គ្រងកម្មវិធី Mas Fight Cambodia នៃសង្វៀនថោនផ្តល់ឱកាស ដោយដាក់ឲ្យពួកគេប្រកួតម៉ារ៉ាតុងដណ្តើមប្រាក់លានទម្ងន់ ៥៧ គីឡូក្រាម នៅថ្ងៃអាទិត្យនេះ ប៉ុន្តែក៏មានរៀបចំការប្រកួតគូមិត្តភាពលំដាប់ខ្លាំងចំនួន ៣ គូ ឲ្យប្រកួតក្នុងថ្ងៃជាមួយគ្នានេះផងដែរ។
ការប្រកួតដណ្តើមប្រាក់រង្វាន់ ៣,៤ លានរៀល សម្រាប់អ្នកផ្តួលគូប្រកួតឲ្យសន្លប់នៅវគ្គផ្តាច់ព្រ័ត្រនេះ គឺជាក្តីប្រាថ្នារបស់កីឡាករឆ្នើមៗមួយចំនួនចង់ឡើងប្រកួត ខណៈការប្រកួត ១៦ សប្តាហ៍កន្លងមកនេះ មានភាពទាក់ទាញបំផុត ហើយតម្លៃខ្លួនប្រកួតរបស់កីឡាករ និងប្រាក់រង្វាន់វគ្គផ្តាច់ព្រ័ត្រ ធ្វើឲ្យកីឡាករល្បីៗស្រក់ទឹកមាត់ចង់ឡើងប្រកួត ដោយគ្មានសំចៃកម្លាំង។
លោក គឹម ស្រ៊ុនកុសល អ្នកគ្រប់គ្រងកម្មវិធី Mas Fight Cambodia ប្រាប់ថា៖ «នៅសប្តាហ៍នេះ យើងបានផ្លាស់ប្តូរការប្រកួតដោយសម្លឹងឃើញសមត្ថភាពកីឡាករជើងថ្មី ទម្ងន់ស្រាលឆ្នើមៗនេះ គឺវាយទាក់ទាញមិនខ្លាចគ្នាទេ។ ម៉្យាងទៀត យើងចង់ផ្តល់ឱកាសឲ្យពួកគាត់ ឆ្ពោះទៅគោលដៅជាជើងខ្លាំងជំនាន់ក្រោយ»។
លោកបានបន្តថា ទោះជាយ៉ាងណាយើងមានគូដែលល្អផ្តាច់ក្នុងសប្តាហ៍នេះ ដោយយើងសម្រិតសម្រាំងបានល្អក្នុងនោះកីឡាករ សឿន ឆ្នើម ត្រូវប៉ះ សៅ វណ្ណា ក្នុងទម្ងន់ ៦៣,៥ គីឡូក្រាម រីឯ រឿង សារិទ្ធ ជួប លាភ សំណាង ក្នុងទម្ងន់ ៥៧ គីឡូក្រាម ហើយ ពេជ្រ ម្ទេសខ្មាំង ត្រូវប្រកួតជាមួយ សេក ចៅជូត ក្នុងទម្ងន់ ៦០ គីឡូក្រាមផងដែរ ដើម្បីកាន់តែមានភាពទាក់ទាញ។
តាមរយៈអ្នកគ្រប់គ្រងទិន្នន័យប្រកួតរបស់កីឡាករគឺ លោក ជួប វុត្ថា ដោយលោកបានសម្ភាស និងជំរឿន មុនប្រកួតនោះគឺ ឡុង រ៉ាមី មានបទពិសោធច្រើនជាងគេ ដោយគេធ្លាប់ប្រកួតជាង ៦០ ដង ចំណែក តុម ផេង មានបទពិសោធត្រឹមជាង ១០ លើកប៉ុណ្ណោះ ខណៈ ឃន គឹមហេង និង ពុទ្ធ ម៉ាណូយ មានបទពិសោធឡើងប្រកួតបានប្រហាក់ប្រហែលគ្នា គឺខ្ទង់ ៣០ ដង។
លោក ជួប វុត្ថា ដែលជាអ្នកអត្ថាធិប្បាយផងនោះ បានប្រាប់ភ្នំពេញប៉ុស្តិ៍ថា៖ «គូដណ្តើមប្រាក់ចំនួន ៣,៤ លានរៀល សប្តាហ៍ទី ១៧ នេះ ផ្តល់ឱកាសឲ្យកីឡាករទម្ងន់ស្រាលមានបទពិសោធនៅខ្ចីឲ្យឡើងប្រកួតម្តង ព្រោះកម្មវិធីយើងចង់ស្វែងរកការប្រកួតប្លែក ហើយសមត្ថភាពរបស់ពួកគាត់ ទោះបីនៅតិចតួច ប៉ុន្តែយើងមើលពីក្បាច់ប្រយុទ្ធវាយសម្រុកខ្លាំងៗដូចគ្នាមិនងាយដកថយ ហើយល្អមើលបំផុត»។
យ៉ាងណាក្តី លោក ជួប វុត្ថា បានបន្ថែមថា ចំពោះ ពុទ្ធ ម៉ាណូយ និង ឡុង រ៉ាមី ដែលមានសមត្ថភាពប្រកួតល្អកម្រិតមធ្យម គឺធ្លាប់ឡើងប្រកួតដល់គូឯករងហើយ ចំណែក ឃន គឹមហេង និង តុម ផេង ពិតជាថ្មីថ្មោង ឬកីឡាករ ដែលគេហៅថា រលកក្រោយត្រូវតែលើកទឹកចិត្ត និងផ្តល់ឱកាសឲ្យជើងថ្មី ដែលកំពុងតែលេចធ្លោ។
ចំណែកលោក ណន រិទ្ធ គ្រូបង្វឹក ពុទ្ធ ម៉ាណូយ បាននិយាយថា៖ «បើនិយាយពីបទពិសោធរបស់កូនសិស្សខ្ញុំគឺវាមធ្យម តែក្នុងចំណោមកីឡាករទាំង ៣ នាក់ ដែល ម៉ាណូយ ត្រូវចាប់ឆ្នោតជួបម្នាក់នៅក្នុងវគ្គជម្រុះ ៣ ទឹកនោះ គឺយើងមានសង្ឃឹមឈ្នះច្រើន ព្រោះការហ្វឹកហាត់បានល្អ។ យ៉ាងណាក៏ដោយ បើចាប់ប៉ះ ឡុង រ៉ាមី ក្នុងវគ្គជម្រុះដំបូងក៏អាចមានការលំបាកដែរ ចំណែក ២ នាក់ទៀត មិនធ្លាប់ដឹងពីសមត្ថភាពនៅឡើយ តែដូចជាមិនបារម្ភខ្លាំងនោះទេ»៕