.jpg)
ឡុង សុភី ប៉ះជាមួយ ជាំង ស៊ូ នៅថ្ងៃអាទិត្យសប្ដាហ៍នេះ។ រូបថត សហការី
ភ្នំពេញ៖ សង្វៀនប្រដាល់ដែលទើបតែបើកក្រោយគេដែលនាំមកនូវការប្រដាល់ប្លែកក្នុងច្បាប់ផ្តាច់មុខពី Mas Fight ជាប្រភេទកីឡាប្រកួតតែមួយទឹកមានរយៈពេល ៩ នាទីនេះ មានប្រភពមកពីក្រុងហុងកុងត្រូវបានទូរទស្សន៍ថោនរៀបចំប្រកួតរយៈពេល ១០ សប្តាហ៍កន្លងមកហើយ មានលក្ខណៈទាក់ទាញលេចធ្លោជាងសង្វៀនមួយចំនួន ខណៈដែលសប្តាហ៍នេះប្រជុំដោយគូមិត្តភាពអន្តរជាតិចំនួន ៥ គូ និងបន្ថែមគូគុនខ្មែរមិត្តភាពចំនួន ៣ គូ សុទ្ធតែជម្រើសកីឡាករលំដាប់ល្អៗ។
ការប្រកួត Mas Fight នៅសង្វៀនថោនដែលគ្មានចៅក្រមកាត់ក្តីបានបង្ហាញឲ្យអ្នកទស្សនាឃើញថាកីឡាករណាមានសមត្ថភាពល្អ និងខ្លាំង គឺឈ្នះដោយផ្តួលដៃគូឲ្យសន្លប់ក្នុងនាទីណាក៏បានដោយវាយមិនសម្រាកចំនួន ៩ នាទី។
ទោះជាយ៉ាងណា មន្ត្រីបច្ចេកទេសរៀបចំត្រូវយកចេញពីប្រដាល់គុនខ្មែរទាំងស្រុងហើយការប្រកួតទាំងស្រុងស្ថិតក្រោមសហព័ន្ធគុនខ្មែរតែមួយនោះក៏បានបង្ហាញអ្នកប្រដាល់មួយចំនួនដែលពេញចិត្តនឹងចូលរួមប្រកួតដោយមិនបារម្ភពីចៅក្រមដាក់ពិន្ទុលម្អៀងនោះឡើយ។
លោក ស្រ៊ុន កុសល នាយកគ្រប់គ្រងកម្មវិធីប្រចាំសង្វៀនថោនប្រាប់ភ្នំពេញប៉ុស្តិ៍ថា៖ «យើងទើបតែរៀបចំបានចំនួន ១០ សប្តាហ៍ ទទួលបានការគាំទ្រខ្លាំងពីមហាជនហើយនៅសប្តាហ៍នេះ ប្រជុំដោយកីឡាករដែលខ្លាំងនៅកម្ពុជាដូចជា ឡុង សុភី, ព្រុំសំណាង, ម៉ឺន មេឃា, អេលីត ភត្តីអេលីត វិចិត្រ ប៉ះជាមួយកីឡាករមកពីប្រទេស ចិន នូវែលសេឡង់ និងប្រទេស ថៃ។
ទោះជាលទ្ធផលបានគាប់ប្រសើរក្នុងការប្រកួត ១០ សប្តាហ៍កន្លងមក លោក កុសល បានអះអាងថា៖ «មិនចង់ប្រកួតប្រជែងជាមួយសង្វៀនណានោះទេ ហើយក្នុងនាមខ្លួនខ្ញុំផ្ទាល់ចង់សហការគ្នាក្នុងលក្ខណៈខ្មែរតែមួយ និងមិនត្រូវប្រកួតប្រជែងគ្នាគ្មានតម្លាភាពនោះឡើយ និយាយទៅយើងប្រឹងប្រែងដើម្បីរីកចម្រើនទាំងអស់គ្នា»។
ឡុង សុភី អ្នកប្រដាល់ជើងខ្លាំងមួយរូបដែលធ្លាប់ឈ្នះខ្សែវាត់ក្នុងស្រុកចំនួន ៧ ស្ថាប័ន និងជាកីឡាករដែលមានប្រតិកម្មខ្លាំងចំពោះចៅ ក្រមរបស់សហព័ន្ធគុនខ្មែរដែលពេលខ្លះមិនទទួលយកបាននោះ និយាយថា៖ «ខ្ញុំវ៉ៃក្នុង Mas Fight នេះជាលើកដំបូង និងពេញចិត្តទាំងតម្លៃខ្លួនទាំងការប្រកួតដែលគ្មានចៅក្រមដាក់ពិន្ទុ ប៉ុន្តែខ្ញុំមិនដឹងពីសមត្ថភាពរបស់កីឡាដៃគូនោះទេ ហើយសង្ឃឹមត្រឹម ៥០ ភាគរយប៉ុណ្ណោះ»៕
