ភ្នំពេញ៖ ការប្រកួតម៉ារ៉ាតុងដណ្តើមប្រាក់លាននៃកម្មវិធី Mas Fight Cambodia នៅលើសង្វៀនថោន បានបន្តរកមិនឃើញអ្នកឈ្នះប្រាក់លាន ចំនួន ៥ សប្តាហ៍ជាប់ៗគ្នា បន្ទាប់ពី អេលីត សាន់ និង ទូច ដេវីត មិនអាចផ្តួលគ្នាឲ្យសន្លប់នៅវគ្គផ្តាច់ព្រ័ត្រកាលពីថ្ងៃអាទិត្យ។
តាមរយៈនៃការប្រកួតនោះ កីឡាករ អេលីត សាន់ របស់ក្លិបប៉ែនកាក់គុនខ្មែរ បានយកឈ្នះ ណាម ម៉ូរ៉ាក់ ក្លិបរស្មីពន្លឺសាមគ្គឺខេត្តបាត់ដំបង ដោយពិន្ទុមិនឯកច្ឆន្ទ ២-១ ខណៈជើងថ្មី ទូច ដេវីត ក្លិបអរុណរះខេត្តកណ្តាល ឈ្នះ សេក ចាន់រាជ មកពីក្លិបមកពីខេត្តសៀមរាប ដោយពិន្ទុដាច់។
យ៉ាងណាក៏ដោយ ទាំង អេលីត សាន់ និង ទូច ដេវីត សុទ្ធតែគ្មានសំណាងទទួលបានប្រាក់លាន ៣,៤ លានរៀល ខណៈអ្នកទាំង ២ មិនអាចផ្តួលគ្នាឲ្យសន្លប់ក្នុងវគ្គផ្តាច់ព្រ័ត្រនោះ ហើយតាមច្បាប់ Mas Fight បើគ្មានអ្នកសន្លប់ក្នុងការប្រកួត ៩ នាទីពេញគ្មានឈប់ទេនោះ ត្រូវកំណត់ឲ្យស្មើគ្នា និងទទួលបានប្រាក់រង្វាន់ក្នុងម្នាក់ៗចំនួន ១,៨ លានរៀល។
ចំណែកការប្រកួត ៤ សប្តាហ៍ជាប់ៗគ្នាកន្លងមកនេះ ពុទ្ធ ឆាយរិទ្ធី និង វង្ស វិឆ័យ, មឿន សុខហ៊ុច និង យ៉េន ឌីណា, ធន់ ចាន់តាក់ និង សុខ សាវិន ព្រមទាំងការជួបគ្នារវាង លាភ រដ្ឋា និង ធន់ អៀងឡៃ សុទ្ធបានបញ្ចប់ដោយការស្មើគ្នា នៅវគ្គផ្តាច់ព្រ័ត្រនេះដូចគ្នា។
ទោះយ៉ាងណា ការប្រកួតផ្តាច់ព្រ័ត្ររបស់ អេលីត សាន់ និង ទូច ដេវីត ត្រូវបានគេមើលឃើញថា ពួកគេវ៉ៃសម្រុកគ្នាក្នុងលក្ខណៈខ្លាចញញើតគ្នា មិនសូវហ៊ានប្តូរក្បាច់គ្នានោះឡើយ នាំឲ្យអាជ្ញាកណ្តាលបានព្រមានទៅលើកីឡាករទាំង ២ ឲ្យចូលវាយសម្រុកខ្លាំងៗផងដែរ។
លោក ហាក់ សុខហេង ផលិតករនៃកម្មវិធីរបស់ទូរទស្សន៍ថោន បានប្រាប់ភ្នំពេញ ប៉ុស្តិ៍ ថា ការប្រកួតដណ្តើមប្រាក់លាន នៅ Mas Fight Cambodia ចំនួន ៥ សប្តាហ៍ចុងក្រោយនេះ មិនទាន់រកឃើញកីឡាករជាអ្នកឈ្នះ ដោយផ្តួលដៃគូឲ្យសន្លប់ ដើម្បីទទួលបានប្រាក់ ៣,៤ លានរៀលនេះនៅឡើយទេ។
លោកបន្តថា៖ «ការប្រកួតរបស់ពួកគាត់ គឺអស់ពីសមត្ថភាព និងទាក់ទាញបំផុត ប៉ុន្តែតាមខ្ញុំមើលការហ្វឹកហាត់ល្អ កម្លាំង និងកាយសម្បទាល្អ គឺធានាបាននូវការប្រកួតមិនអាចសន្លប់។ទោះជាយ៉ាងណាក្តី កម្មវិធីនឹងខិតខំស្វែងអ្នកប្រដាល់ឆ្នើមៗ ដើម្បីឡើងប្រកួតឲ្យកាន់តែល្អ និងឈានទៅផ្តួលដៃគូឲ្យសន្លប់ ដើម្បីយកប្រាក់ចំនួន ៣,៤ លានរៀល ដែលតម្កល់ទុកជាស្រេចនៅសប្តាហ៍ក្រោយៗទៀត»។
ចំណែកលោក សៅ ប៊ុនធឿន គ្រូបង្វឹក ណាម ម៉ូរ៉ាក់ បាននិយាយថា ណាម ម៉ូរ៉ាក់ វាយបានល្អ តែលទ្ធផលឲ្យចាញ់ អេលីត សាន់ ២-១ គឺគួរសមហើយ ព្រោះក្នុងការប្រកួតប្រហាក់ប្រហែលគ្នាបែបនេះ វាអាស្រ័យលើអ្នកឲ្យពិន្ទុ ចំណែកយើងមិនហ៊ានបញ្ចេញមតិថា ខុស ឬត្រូវនោះទេ។ លោកថា វ៉ៃប៉ុណ្ណឹង បើគេលើកដៃ ណាម ម៉ូរ៉ាក់ឲ្យឈ្នះ ក៏បានដូចតែគ្នា ព្រោះគេហៅថាចាញ់ឬឈ្នះ មិនដាច់ដូចគ្នា វាជាសិទ្ធិរបស់គេ។
លោក ស៊ន អេលីត គ្រូបង្វឹករបស់ អេលីត សាន់ បាននិយាយថា៖ «ការវិលមកកាន់សង្វៀនប្រកួតវិញរបស់ អេលីត សាន់ ធ្វើបានល្អ ប៉ុន្តែក្នុងចំណោមកីឡាករវ័យក្មេងៗដូចគ្នា ហ្វឹកហាត់បានល្អដូចគ្នា គឺកម្លាំងនៅល្អ មិនងាយនឹងសន្លប់បានឡើយ ហេតុនេះបើវ៉ៃតាមច្បាប់ MasFight មិនគិតពីពិន្ទុនោះ គឺបានលទ្ធផលស្មើនេះហើយ»។
ចំណែកលោក អាត សំរិទ្ធ គ្រូបង្វឹក ទូច ដេវីត និយាយថា៖ «វ៉ៃបានប៉ុណ្ណឹងខ្ញុំសរសើរថា ដេវីត ធ្វើបានល្អណាស់។ ខ្ញុំគិតថា វាទប់ទល់ជាមួយ អេលីត សាន់ បាន ៩ នាទី គឺល្អណាស់ ព្រោះនៅក្នុងវគ្គនេះ ខ្ញុំសង្ឃឹមឈ្នះតិច អ៊ីចឹងបានលទ្ធផលត្រឹមស្មើប៉ុណ្ណឹង គឺជាមោទនភាពល្អមួយ សម្រាប់ឈានទៅប្រកួតក្នុងចំណោមកីឡាករខ្លាំងៗ លើកក្រោយៗទៀត»៕