.jpg)
Alaba (ឆ្វេង) របស់ Bayern និង Mbappe របស់ PSG ប្រជែងគ្នាដណ្ដើមបាល់។ AFP
ក្រុងមុយនិច៖ Kylian Mbappe និយាយដោយទទូចថា ក្រុម Paris Saint-Germain (PSG) នៅមានកិច្ចការត្រូវធ្វើទៀត ក្រោយរូបគេស៊ុតបញ្ចូលទី ២ គ្រាប់ ក្នុងជ័យជម្នះ ៣-២ អំឡុងការប្រកួតក្នុងក្របខ័ណ្ឌ Champions League វគ្គ ៨ ក្រុមចុងក្រោយ ជើងទី១ នៅផ្ទះរបស់ក្រុមជើងឯកចាស់ Bayern Munich។
ការលេងមិនចាញ់សោះជាបន្តបន្ទាប់គ្នាដល់ទៅ ១៩ ការប្រកួត នៅ Champions League របស់ក្រុម Bayern បានដល់ទីបញ្ចប់ក្នុងជំនួបជាមួយក្រុមគូប្រជែងចាស់ ដែលប៉ះគ្នាកាលពីឆ្នាំមុន ក្នុងវគ្គផ្ដាច់ព្រ័ត្រ ខណៈក្រុមយក្សអាល្លឺម៉ង់ស្គាល់ពាក្យបរាជ័យនៅអឺរ៉ុបលើកដំបូង គិតតាំងពីខែមីនា ឆ្នាំ ២០១៩ មក។
PSG បានធ្វើការនាំមុខយ៉ាងលឿន ២-០ បន្ទាប់ពីការប្រកួតដែលធ្វើដោយបិទទ្វារ (អត់មានអ្នកទស្សនា) នាកីឡដ្ឋាន Allianz Arena ដំណើរការទៅបាន ២៨ នាទី បន្ទាប់ពីខ្សែប្រយុទ្ធ Neymar បង្កើតឱកាសឱ្យ Mbappe និង Marquinhos ស៊ុតបញ្ចូលទីមា្នក់ ១ គ្រាប់។
ក្រុមម្ចាស់ផ្ទះ Bayern ដែលអ្នកស៊ុតបញ្ចូលទីបានច្រើនជាងគេ Robert Lewandowski ត្រូវអវត្តមានដោយសាររបួសជង្គង់បានតាមស្មើវិញ ដោយសារការតែតបានសម្រេចមា្នក់ ១ គ្រាប់ របស់ Eric Maxim Choupo-Moting និង Thomas Mueller។
ប៉ុន្តែខ្សែប្រយុទ្ធសញ្ជាតិបារាំង Mbappe បានបង្ហាញពីសមត្ថភាពកម្រិតពិភពលោក ជាមួយនឹងការស៊ុតបាល់គ្រាប់ទី២ របស់ខ្លួនក្នុងប្រកួតនេះ យ៉ាងអស្ចារ្យ ដើម្បីជួយឱ្យក្រុមភ្ញៀវមានភាពចំណេញសម្រាប់ការប្រកួតជើងទី២។
«យើងបានប្រើប្រាស់គ្រប់ឱកាសទាំងអស់ ហើយយើងមានសំណាងជួយតិចតួចដែរ តែមិនទាន់មានអ្វីច្បាស់លាស់នៅឡើយទេ»។ នេះជាសម្ដីរបស់ Mbappe ដែលនិយាយប្រាប់ទូរទស្សន៍ Sky ខណៈក្រុមទាំង ២ នឹងប៉ះគ្នាជើងទី២ នៅក្រុងប៉ារីសនាយប់ថ្ងៃអង្គារ។
អ្នកចាំទី Keylor Navas របស់ក្រុម PSG បានដើរតួនាទីយ៉ាងសំខាន់ ដោយការជួយសង្គ្រោះជាច្រើនលើកច្រើនសា ពេល Bayern ពង្រាយគ្នានៅមុខទី ហើយស៊ុតដល់ទៅ ៣១ ជើង បើធៀបជាមួយក្រុមអ្នកមានទៅពីបារាំង ដែលមាន ៦ ដងប៉ុណ្ណោះ។
កីឡាករ Mueller របស់ក្រុម Bayern បាននិយាយថា៖ «យើងគួរតែស៊ុតបញ្ចូលទីបានច្រើន។ ប្រសិនបើយើងបញ្ចប់ដោយឈ្នះ ក្នុងលទ្ធផល ៥-៣ ឬក៏ ៦-៣ គ្មាននរណាម្នាក់អាចមកប្រកែកតវ៉ាជាមួយយើង ដោយផ្អែកលើឱកាស ដែលយើងមានជាច្រើនដងនោះឡើយ»។
គ្រូបង្វឹករបស់ Bayern លោក Hansi Flick ដែលបញ្ចប់ការប្រកួត ក្នុងនាមជាក្រុមចាញ់លើកដំបូងនៅ Champions League ក៏មានការសោកស្ដាយផងដែរ នូវឱកាសជាច្រើន ដែលត្រូវបាត់បង់ដោយអាសាឥតការ។
លោក Flick ពោលថា៖ «ជាមួយនឹងឱកាស ដែលយើងមាន យើងគួតែអាចទទួលបានលទ្ធផលល្អ បើទោះជារបូត ៣ គ្រាប់ក៏ដោយ។ យើងមិនចង់ចាញ់ឡើយ តែវិធីសាស្ត្រដែលក្រុមលេងត្រូវបានរារាំង»។
នេះជាការបង្ហាញវត្តមានជាលើកទី១៩ របស់ក្រុម Bayern នៅ Champions League ក្នុងវគ្គ ៨ ក្រុម តែអត់មានអ្វី ដើម្បីឱ្យពួកគេ ធ្វើការអបអរនោះឡើយ នៅពេលសំឡេងកញ្ចែចុងក្រោយបន្លឺឡើង។
ចំណែកឯអ្នកចាត់ការរបស់ក្រុម PSG លោក Maurico Pochettino បានថ្លែងថា៖ «Kylian Mbappe បង្កើតឱ្យមានភាពប្លែក ក្នុងក្រុម។ វាគឺជាលទ្ធផលវិជ្ជមានសម្រាប់ពួកយើង តែគ្រប់យ៉ាងមិនទាន់ប្រាកដប្រជានៅឡើយទេ»៕ AFP/VN
