ក្រុងប៊័រហ្កាម៉ូ៖ កីឡាករ Ferland Mendy ជួយឱ្យក្រុមអធិរាជស Real Madrid ស្ថិតក្នុងរយៈចម្ងាយ ដែលច្រាស់ច្រាល់ក្នុងចិត្ត ជាមួយនឹងការមានសង្ឃឹមក្នុងការបានឆ្លងទៅវគ្គ ៨ ក្រុមចុងក្រោយនៃក្របខ័ណ្ឌ UEFA Champions League (UCL) កាលពីថ្ងៃពុធ បន្ទាប់ពីស៊ុតបញ្ចូលទីនៅចុងម៉ោង ១ គ្រាប់ ធ្វើឱ្យមានជ័យជម្នះលើក្រុមម្ចាស់ផ្ទះ Atalanta ១-០។
ការព្យាយាមស៊ុតបាល់កោងរបស់ខ្សែការពារឆ្វេងសញ្ជាតិបារាំង កើតមានប្រមាណជា ៤ នាទី មុនការប្រកួតនៅក្រុងប៊័រហ្កាម៉ូ ក្នុងវគ្គ ១៦ ក្រុមចុងក្រោយ ជើងទី១ បញ្ចប់ជាផ្លូវការ ហើយជាប្រកួតដែលឃើញថា ក្រុមម្ចាស់ផ្ទះត្រូវលេងត្រឹមគ្នាតែ ១០ នាក់ ជាង ៧០ នាទី ខណៈ ១ គ្រាប់នេះ បានផ្ដល់ភាពចំណេញឱ្យក្រុមរបស់លោក Zinedine Zidane សម្រាប់ជើងទី១។
ក្នុងកិច្ចសម្ភាសន៍ភ្លាមៗ ក្រោយការប្រកួតចប់ គ្រូបង្វឹករបស់ Real លោក Zidane បាននិយាយថា៖ «យើងមិនបានលេងក្នុងកម្រិតល្អណាស់ណាទេ នៅយប់នេះ តែរឿងសំខាន់ គឺលទ្ធផល ដែលការរកគ្រាប់បាល់បានក្រៅទឹកដី គឺចាំបាច់ណាស់សម្រាប់យើង។ វាជាលទ្ធផលល្អណាស់»។
អ្នកចាត់ការសញ្ជាតិបារាំងបានបន្តថា៖ «ក្រុម Atalanta នៅតែរឹងមាំ បើទោះសល់គ្នា ១០ នាក់ ព្រោះពួកគេការពារបានល្អមែនទែន។ ពិន្ទុមិនទាន់ប្រាកដប្រជានៅឡើយទេ។ យើងនឹងមានការប្រកួតដ៏ស្វិតស្វាញនៅជើងទី២»។
Atalanta បានធ្វើការវាយសម្រុកពេលប្រកួតចាប់ផ្ដើមប៉ុន្មាននាទីដំបូង តែហ្គេមត្រូវផ្លាស់ប្ដូរ ពេលខ្សែបម្រើអន្តរជាតិស្វ៊ីស Remo Freuler ត្រូវបណ្ដេញចេញយ៉ាងលឿននៅនាទីទី១៧ ដោយសារបានរត់ទៅទាក់ជើង Mendy ក្បែរតំបន់គ្រោះថ្នាក់។
បញ្ហារបស់គ្រូបង្វឹក លោក Gian Piero Gasperini នៅមិនទាន់ចប់ទេ ពេលខ្សែប្រយុទ្ធ Duvan Zapata ដើរខ្ញើចៗចេញពីទីលាន ក្រោយលេងបានប្រមាណជាកន្លះម៉ោង ដោយសារមានបញ្ហាសាច់ដុំ ហើយត្រូវដាក់កីឡាករ Mario Pasalic ជំនួសវិញ។
លោក Gasperini ថ្លែងថា៖ «ហ្គេមត្រូវបានបំផ្លាញ។ ខ្ញុំមិនដឹងថា មានអ្វីនឹងកើតឡើង បើលេង ១១ នាក់ ទល់ ១១ នាក់។ ខ្ញុំស្ទើរត្រូវបានពិន័យ ដោយសារបាននិយាយរឿងខ្លះ នៅក្របខ័ណ្ឌ Serie A ដូច្នេះ បើខ្ញុំនិយាយអ្វីនៅពេលនេះ សហព័ន្ធបាល់ទាត់អឺរ៉ុបនឹងពិន័យខ្ញុំ។ តែនេះ គឺជាការធ្វើឱ្យការប្រកួតបាល់ទាត់ស្លាប់»។
អ្នកចាត់ការសញ្ជាតិអ៊ីតាលីវ័យ ៦៣ ឆ្នាំ បានបន្ថែមថា៖ «គ្រប់គ្រាន់ហើយចំពោះអាជ្ញាកណ្ដាលទាំងអស់នេះ ដែលមិនធ្លាប់បានលេងការប្រកួត ហើយមិនដឹងពីភាពខុសគ្នារវាងការជែង និងកំហុសឱ្យបានច្បាស់លាស់»។
ជាមួយគ្នា សម្រាប់ក្រុមយក្សអេស្ប៉ាញ Real ដែលជាជើងឯកពាននៃតំបន់អឺរ៉ុបនេះ ១៣ សម័យកាលត្រូវលេងដោយអត់មានខ្សែប្រយុទ្ធសំណព្វចិត្តរបស់លោក Zidane គឺ Karim Benzema ទេ ដោយសារមានរបួសកជើង ខណៈកីឡាករសំខាន់ៗ ដែលមាននៅក្នុងបញ្ជីឈ្មោះអ្នករបួសដែរនោះ រួមមាន Sergio Ramos, Eden Hazard និង Dani Carvajal៕ AFP/VN