ក្រុងប៉ារីស៖ ខ្សែប្រយុទ្ធ Lionel Messi បាននិយាយថា រូបគេសង្ឃឹមថា នឹងបន្តរីករាយនឹងការប្រកួតជាបន្តទៀត បន្ទាប់ពីរូបគាត់បានឈ្នះពានរង្វាន់ Ballon d''Or លើកទី ៦ របស់ខ្លួននៅអាយុ ៣២ ឆ្នាំ នៅទីក្រុងប៉ារីសប្រទេស បារាំង កាលពីថ្ងៃចន្ទ ខណៈកំពូលតារាបាល់ទាត់ពិភពលោករបស់អាមេរិក Megan Rapinoe បានឈ្នះពានរង្វាន់នេះសម្រាប់នារី។
កីឡាការិនី Rappinoe មិនបានចូលរួមក្នុងពិធីនៅមហោស្រព Chatelet Theatre នៅទីក្រុងប៉ារីស ប្រទេស បារាំង នេះទេ ជាទីដែលរូបនាងបានដឹកនាំជម្រើសជាតិបាល់ទាត់នារីអាមេរិកទទួលជោគជ័យក្នុងការប្រកួត World Cup កាលពីខែកក្កដា។
ផ្ទុយមកវិញ កីឡាករ Messi បាននាំយកភរិយា គឺអ្នកស្រី Antonella Roccuzzo និងកូន ២ នាក់របស់ខ្លួនទៅចូលរួមពិធីនេះ ហើយនេះជាលើកទី ១ របស់កីឡាករ Messi ដែលបានឈ្នះពានរង្វាន់ Ballon d''Or តាំងពីឆ្នាំ ២០១៥ និងសរុបលើកទី ៦ របស់ខ្លួន ខណៈរូបគេបានទទួលច្រើនជាងកីឡាករ Cristiano Ronaldo ចំនួន ១ ពាន។
កីឡាករ Messi បាននិយាយនៅលើវេទិកាក្រោយពីទទួលពានរង្វាន់នេះ ពីអ្នកឈ្នះឆ្នាំមុន គឺកីឡាករ Luka Modric ថា៖ «វាមានរយៈពេល ១០ ឆ្នាំ តាំងពីខ្ញុំបានឈ្នះពានរង្វាន់ Ballon d''Or លើកដំបូងរបស់ខ្ញុំនៅទីក្រុងប៉ារីស ហើយខ្ញុំចាំថា ខ្ញុំបានមកទីនេះជាមួយបងប្អូនខ្ញុំ ៣ នាក់ ហើយខ្ញុំមានអាយុ ២២ ឆ្នាំ ហើយវាជាអ្វីដែលខ្ញុំមិននឹកស្មានដល់ចំពោះអ្វីដែលខ្ញុំកំពុងឆ្លងកាត់នៅពេលនេះ»។
កីឡាកររូបនេះបានបន្ថែមថា៖ «ខ្ញុំសង្ឃឹមថា ខ្ញុំនៅសល់ពេលច្រើនឆ្នាំទៀត ដើម្បីបន្តរីករាយនឹងបាល់ទាត់របស់ខ្ញុំ។ ខ្ញុំដឹងពីអាយុរបស់ខ្ញុំ ហើយពេលនេះខ្ញុំកាន់តែរីករាយជាងមុនពីព្រោះពេលវេលាដែលខ្ញុំត្រូវចូលនិវត្តន៍ គឺកាន់តែជិតមកដល់ហើយ ហើយនោះគឺពិបាក»។
កីឡាករឆ្នើមរូបនេះបានបន្ថែមទៀតថា៖ «អ្វីៗនឹងដំណើរការល្អនៅពេលខ្ញុំនៅសល់ពេលប៉ុន្មានឆ្នាំទៀតខាងមុខនេះ ប៉ុន្តែពេលនេះវាហាក់ដូចជាកន្លងទៅលឿនមែនទែន ហើយអ្វីៗកំពុងកើតឡើងឆាប់បំផុត»។
កីឡាករ Messi បានឈ្នះពានរង្វាន់នៅឆ្នាំនេះដែលរៀបចំដោយទស្សនាវដ្ដី France Football និងត្រូវបានបោះឆ្នោតគាំទ្រតាមរយៈបណ្ដាញអ្នកកាសែតជុំវិញពិភពលោក ហើយអ្នកជាប់លេខ ២ បានទៅលើខ្សែការពារ Virgil van Dijk របស់ក្លិប Liverpool ខណៈលេខ ៣ បានទៅលើកីឡាករ Ronaldo។
នេះជាលើកទី ១ តាំងពីឆ្នាំ ២០១០ ដែលកីឡាករ Ronaldo ខកខានមិនបានជាប់ចំណាត់ថ្នាក់កំពូលកីឡាករឆ្នើមទាំង ២។
ក្រោយពីបានក្លាយជាតារាបាល់ទាត់នៅក្រុម Liverpool ជាមួយការឈ្នះពានរង្វាន់ Champions League ខ្សែការពារ Van Dijk បានជាប់ចំណាត់ថ្នាក់លេខ ២ បន្ទាប់ពីកីឡាករ Messi ដូចដែលរូបគេបានធ្វើក្នុងការទទួលបានសំឡេងគាំទ្រសម្រាប់ពានរង្វាន់កីឡាករឆ្នើមរបស់សហព័ន្ធបាល់ទាត់ FIFA កាលពីខែកញ្ញា។
កីឡាករ Van Dijk បាននិយាយថា៖ «ជាអកុសលដែលមិនមានកីឡាករដូចគាត់ឲ្យបានច្រើន។ ការឈ្នះពានរង្វាន់ Ballon d''Or លើកទី ៦ នេះ គឺអស្សារ្យណាស់ ហើយអ្នកត្រូវតែគោរពចំពោះភាពអស្ចារ្យនេះ»។
កីឡាករ Messi រកបាន ៤៦ គ្រាប់ ក្នុង ៥៤ ប្រកួត នៅឆ្នាំ ២០១៩ នេះ និងបានបំប៉ោងសំណាញ់ទី ៣៦ លើកក្នុង ៣៤ ប្រកួតនៃក្របខ័ណ្ឌ La Liga កាលពីរដូវកាលមុន ខណៈក្លិប Barcelona បានឈ្នះពានរង្វាន់នេះ។
ចំណែកកីឡាការិនី Rapinoe បានឈ្នះពានរង្វាន់ Ballon d''Or សម្រាប់ផ្នែកបាល់ទាត់នារីដោយទទួលបានសំឡេងគាំទ្រពីស្ថាប័នកាសែតចំនួន ៤៨ នៅជុំវិញពិភពលោកដោយសាររូបនាងបានបង្ហាញទម្រង់លេងយ៉ាងល្អនៅក្នុងព្រឹត្តិការណ៍ World Cup ឆ្នាំ ២០១៩ សម្រាប់បាល់ទាត់នារីនៅប្រទេស បារាំង។
កីឡាការិនី Rapinoe បាននិយាយក្នុងសារជាវីដេអូថា៖ «វាជាឆ្នាំដ៏អស្ចារ្យមួយសម្រាប់ខ្ញុំ»៕ AFP/SN