.jpg)
Mount ស៊ុតបញ្ចូលទីឱ្យ Chelsea ឈ្នះ Fulham ១-០ អំឡុងការប្រកួតក្របខ័ណ្ឌកំពូលអង់គ្លេស។ AFP
ក្រុងឡុងដ៍៖ កីឡាករ Mason Mount បានជួយឱ្យក្រុមតោខៀវ Chelsea ត្រឡប់មកលើផ្លូវជោគជ័យវិញ ជាមួយនឹងការធ្វើបានសម្រេចនូវគ្រាប់បាល់ចុងម៉ោង ដែលនាំឱ្យក្រុមមានជ័យជម្នះ ១-០ លើក្រុមម្ចាស់ផ្ទះ Fulham ដែលសល់គ្នាតែ ១០ នាក់ អំឡុងការប្រកួតនៅក្របខ័ណ្ឌ Premier League កាលពីថ្ងៃសៅរ៍។
លោក Frank Lampard អ្នកចាត់ការរបស់ Chelsea កំពុងតែស្ថិតក្រោមសម្ពាធ ក្រោយឈ្នះតែម្ដងគត់ និងចាញ់ ៤ ដង ក្នុងចំណោមការប្រកួត ៦ លើកមុនហ្នឹង ដែលបានបង្ហាញថា ក្រុមតោខៀវបានធ្លាក់ទៅដល់លេខ ១០ មុនចាប់ផ្ដើមប្រកួតនៅទឹកដី Craven Cottage នេះ។
តែ Chelsea ទទួលបានការសម្រាកដ៏ធូរស្រាល ដែលខ្លួនកំពុងត្រូវការ ពេលខ្សែការពារ Antonee Robinson របស់ Fulham ត្រូវបានបណ្ដេញចេញតែ ១ នាទី មុនចប់វគ្គទី ១ ដោយសារស្ទុះទៅឈូសស្កាត់បាល់ទាំងកម្រោលពីខ្សែការពារ Cesar Azpilicueta។
កូនក្រុមរបស់លោក Lampard បានព្យាយាមឆក់យកឱកាសពីការមានសមាជិកលើសនេះ តែទម្រាំទម្លុះភាពទាល់ច្រកបាន ត្រូវរង់ចាំដល់នាទីទី៧៨ នៅពេលខ្សែបម្រើសញ្ជាតិអង់គ្លេស Mount រត់ទៅស៊ុតបំប៉ោងសំណាញ់ទីយ៉ាងស្អាត ក្រោយអ្នកចាំទី Alphonse Areola ទះបាល់អត់ផុតពីតំបន់គ្រោះថ្នាក់។
១ គ្រាប់នោះ គ្រប់គ្រាន់ឱ្យ Chelsea ស្គាល់រសជាតិឈ្នះ នៅលីគលើកទី១ គិតតាំងពីដណ្ដើមបាន ៣ ពិន្ទុពីក្រុមញញួរធំ West Ham មុនបុណ្យគ្រិស្តស្មាស់ និងបានឡើងទៅចំណាត់ថ្នាក់ទី ៧ ក្នុងតារាងពិន្ទុ Premier League។
គ្រូបង្វឹករបស់ Chelsea លោក Lampard និយាយថា៖ «ពិតណាស់ វាមានអារម្មណ៍ល្អ ដែលអាចឈ្នះ។ វាមិនមែនជារឿងងាយឡើយជាមួយនឹងទម្រង់លេងនៅលីគពេលនេះ ហើយជាពិសេសយើងត្រូវតែរកជ័យជម្នះឱ្យបាន ក្រោយពីបរាជ័យ»។
លោក Lampard បានបន្តថា៖ «ខ្ញុំមានជំនឿលើគុណភាពរបស់កីឡាករ។ យើងមានអារម្មណ៍ថា យើងនឹងរកគ្រាប់បាល់បាន ព្រោះសម្ពាធគឺមិនទាន់ថមថយនៅឡើយទេ។ វាទាក់ទងនឹងការបន្តភាពអត់ធ្មត់ជាមួយនឹងពេលវេលា ដែលយើងបានឆ្លងកាត់ ហើយខ្ញុំគិតថា យើងធ្វើបាន»។
សម្រាប់ Fulham របស់លោក Scott Parker នៅមិនអាចឡើងផុតពីតំបន់ ដែលត្រូវកាត់ចោលដដែល ក្រោយបរាជ័យលើកដំបូង ពីការប្រកួត ៦ លើកក្នុងលីគ។
Chelsea ត្រូវធ្វើដំណើរទៅផ្ទះរបស់ Leicester ថ្ងៃអង្គារ ស្របពេលក្រុមរបស់លោកBrendan Rodgers កំពុងមានទម្រង់លេងដ៏គួរឱ្យខ្លាចរអា ក្រោយឈ្នះ Southampton ២-០ ឡើងទៅលំដាប់ទី២ ដោយមាន ៣៥ ពិន្ទុ។
Leicester កំពុងតាមពីក្រោយ Manchester United ១ ពិន្ទុ និងនាំមុខ Liverpool ២ ពិន្ទុ៕ AFP/VN
