ក្រុងមេនឆេស្ទ័រ: ក្រុម Manchester United អាចបំភ្លេចពីការប្រជែងជាមួយនឹងក្រុម Manchester City រហូតទាល់តែពួកគេអាចប្រជែងយកកៅអី ១ ក្នុងចំណាត់ថ្នាក់កំពូលទាំង ៤ នៅលើតារាង Premier League top។ នេះបើយោងទៅតាមការសារភាពរបស់លោកគ្រូបង្វឹក Jose Mourinho ខណៈដែលក្រុមរបស់លោកបានរងបរាជ័យក្នុងលទ្ធផល ៣-១ ក្រោមស្នាដៃក្រុមម្ចាស់ជើងឯករបស់អង់គ្លេស កាលពីថ្ងៃអាទិត្យ។
ការរងបរាជ័យក្នុងការប្រកួតលីកជាលើកទី ៤ នៅរដូវកាលនេះ ធ្វើឲ្យក្រុម Man United ដេញតាមពីក្រោយគូប្រជែងស្ថិតក្នុងតំបន់តែ ១ រហូតទៅ ១២ ពិន្ទុរួចជាស្រេច ក្រោយពីប្រកួតត្រឹមតែ ១២ លើកក្នុងយុទ្ធនាការថ្មីនេះ។
អ្វីដែលកាន់តែព្រួយបារម្ភសម្រាប់លោក Mourinho ទៅទៀតនោះគឺថា បច្ចុប្បន្នក្រុមបិសាចក្រហម ក៏កំពុងដេញតាមពីក្រោយក្រុមស្ថិតក្នុងចំណាត់ថ្នាក់លេខ ៤ ចំនួន ៧ ពិន្ទុផងដែរ ដែលនាំឲ្យការប្រជែងយកកៅអីក្នុងក្របខ័ណ្ឌ Champions League នារដូវកាលក្រោយ ស្ថិតក្នុងហានិភ័យ។
ក្រុមកំពុងឈរលេខ ៨ Man United បច្ចុប្បន្ននាំមុខលើក្រុមស្ថិតក្នុងតំបន់កាត់ចោល Cardiff ចំនួន ១២ ពិន្ទុ ខណៈពួកគេដេញតាមពីក្រោយ Man City ១២ ពិន្ទុដូចគ្នា។
លោក Mourinho ដែលក្រុមរបស់លោកបានបញ្ចប់ក្នុងចំណាត់ថ្នាក់លេខ ២ ក្នុង Premier League កាលពីរដូវកាលមុន បើទោះបីដេញតាមពីក្រោយក្រុម Man City ១៩ ពិន្ទុនោះ បានឲ្យដឹងថា៖ «យើងបានដឹងថា វាមានភាពខុសគ្នាជាសក្តានុពលមួយជាមួយ Man City»។
គ្រូបង្វឹករូបនេះបានបន្ថែមទៀតថា៖ ចាប់តាំងពីដើមរដូវកាលនេះ យើងបានដឹងថា ចំណាត់ថ្នាក់លេខ ២ របស់យើងកាលពីរដូវកាលមុន គឺជាការសម្រេចសមិទ្ធផលដ៏អស្ចារ្យរបស់យើង ហើយនៅរដូវកាលនេះ យើងនឹងប្រជែងដណ្តើមចំណាត់ថ្នាក់កំពូលទាំង ៤។
ប៉ុន្តែ សម្តីរបស់លោក Mourinho មានភាពខុសគ្នាស្រឡះទៅនឹងការធ្វើដំណើរជាលើកចុងក្រោយរបស់លោកទៅកាន់ Etihad ដែលនៅពេលនោះ Man United បានលុបចោលឱកាសរបស់ Man City ក្នុងការលើកពានក្នុងការប្រកួតរវាងក្រុមស្ថិតក្នុងទីក្រុងតែ ១ តាមរយៈការវាយបកពីការដេញតាមពីក្រោយ ២-០ ដើម្បីឈ្នះក្នុងលទ្ធផល ៣-២។
ជាមួយគ្នានេះ Liverpool បានរក្សាការដេញតាមពីក្រោយ Man City យ៉ាងប្រកៀកតាមរយៈការយកឈ្នះលើក្រុម Fulham ២-០៕