.jpg)
Marcus Rashford (ស្តាំ) របស់ Man Utd ដណ្តើមបាល់ជាមួយ Carlos Soler របស់ Valencia។ AFP
ក្រុងវ៉ាឡេនស្យា: ក្រុម Manchester United បានខ្ជះខ្ជាយឱកាសក្នុងការបញ្ចប់ដោយការឈរលេខ ១ ក្នុងពូលរបស់ពួកគេនៃក្របខ័ណ្ឌ Champions League កាលពីថ្ងៃពុធ ក្រោយពីការបង្ហាញទម្រង់លេងដ៏ទន់ខ្សោយក្នុងពេលបានរងបរាជ័យយ៉ាងស័ក្តិសមក្នុងលទ្ធផល ២-១ ក្រោមស្នាដៃក្រុម Valencia។ ខណៈដែលបានឈ្នះកៅអីទៅវគ្គ ១៦ ក្រុមចុងក្រោយរួចជាស្រេច លោក Jose Mourinho បានផ្លាស់ប្តូរកីឡាករដល់ ៨ នាក់ នាកីឡដ្ឋាន Mestalla ក្នុងនោះរាប់បញ្ចូលទាំងការដាក់ឲ្យខ្សែបម្រើ Paul Pogba លេងក្នុងជម្រើសដំបូងផងដែរ ប៉ុន្តែ Man United ត្រូវបានគ្រប់គ្រងស្ទើរតែទាំងស្រុងដោយគូប្រជែងអេស្ប៉ាញរបស់ពួកគេ ដែលកំពុងតែស្ថិតក្នុងចំណាត់ថ្នាក់លេខ ១៥ នៅលើតារាង La Liga។
បន្ទាប់ពីការប្រកួតនេះ លោក Mourinho ហាក់មានបំណងក្នុងការរិះគន់លើកីឡាកររបស់លោកដែលបានចូលលេង។ គ្រូបង្វឹករូបនេះបានឲ្យដឹងថា៖ «គ្មានអ្វីបានធ្វើឲ្យខ្ញុំភ្ញាក់ផ្អើលឡើយ»។ គ្រាប់បាល់ស៊ុតបញ្ចូលទីរបស់កីឡាករ Carlos Soler និងការធ្វើឲ្យបាល់ចូលទីខ្លួនឯងរបស់ខ្សែការពារ Phil Jones បានជួយឲ្យក្រុម Valencia រកបានគ្រាប់បាល់នាំមុខមុន ២ គ្រាប់ ក្នុងតង់ទី ២ នៅមុនពេល Man United បានវាយបកវិញនៅនាទីចុងក្រោយ ក្រោយពីគ្រាប់បាល់បញ្ចូលទីរបស់ខ្សែប្រយុទ្ធ Marcus Rashford បានជួយឲ្យពួកគេមានក្តីសង្ឃឹមដ៏ខ្លី។
លោក Mourinho និងកីឡាកររបស់លោកប្រហែលជាគិតថា ក្រុម Juventus នឹងទទួលជ័យជម្នះនៅលើទឹកដីក្រុម Young Boys ប៉ុន្តែ ការរងបរាជ័យដ៏មិននឹកស្មានដល់ក្នុងលទ្ធផល ២-១ របស់ក្រុមជើងខ្លាំងរបស់អ៊ីតាលីមួយនេះ បានធ្វើឲ្យចំណាត់ថ្នាក់លេខ ១ ស្ថិតក្នុងលក្ខខណៈបើកចំហ។
ផ្ទុយទៅវិញ ពួកគេបានឈានទៅវគ្គបន្តក្នុងនាមជាក្រុមឈរលេខ ២ ក្នុងការចាប់ឆ្នោតនៅថ្ងៃចន្ទសម្រាប់វគ្គ ១៦ ក្រុមចុងក្រោយ ខណៈដែល Real Madrid, Barcelona, Bayern Munich, Paris Saint-Germain, Borussia Dortmund និង Porto សុទ្ធសឹងជាក្រុមដែលពួកគេអាចនឹងជួប។
ប្រសិនបើដណ្តើមបានលេខ ១ ពួកគេនឹងត្រូវប៉ះជាមួយនឹងក្រុម Atletico Madrid, Roma, Schalke, Ajax ឬ Lyon។
លោក Mourinho បានឲ្យដឹងថា៖ «ក្រៅពីក្លិប ២ ដែលមានភាពខ្លាំងជាងក្លិបផ្សេងទៀត ខ្ញុំគិតថា ការចាប់ឆ្នោតនឹងមិនមានភាពខុសគ្នាខ្លាំងឡើយ»។
CSKA ធ្លាក់ចេញ ទោះបីផ្តួលក្រុម Real Madrid
CSKA Moscow បានផ្តល់ការខកចិត្តដល់ក្រុមដែលមានការផ្លាស់ប្តូរច្រើន Real Madrid តាមរយៈការដណ្តើមបានជ័យជម្នះក្នុងលទ្ធផល ៣-០ នៅកីឡដ្ឋាន Santiago Bern-abeu កាលពីថ្ងៃពុធ ប៉ុន្តែ នៅតែ បញ្ចប់ដោយស្ថិតក្នុងបាតតារាងក្នុងពូល F នៃក្របខ័ណ្ឌ Champions League ខណៈក្រុម Viktoria Plzen បានផ្តួល Roma។ ក្រុមរបស់រុស្ស៊ីមួយនេះ ក៏បានយកឈ្នះលើក្រុម Real ១-០ កាលពីជើងទី ១ ដែរនោះត្រូវតែដណ្តើមឲ្យបានលទ្ធផលល្អប្រសើរជាងក្រុម Plzen ដើម្បីបញ្ចប់ដោយការឈរលេខ ៣ និងឈ្នះសិទ្ធិទៅលេងក្នុងក្របខ័ណ្ឌ Europa League។
ប៉ុន្តែ Plzen បានយកឈ្នះលើក្រុម Roma ក្នុងលទ្ធផល ២-១ ក្នុងប្រទេសសាធារណរដ្ឋឆែក ដើម្បីធ្វើឲ្យការដណ្តើមបានជ័យជម្នះដ៏រំភើបរបស់ក្រុម CSKA មិនមានន័យអ្វីសោះ បើទោះបីធ្វើឲ្យក្រុមម្ចាស់ជើងឯកអឺរ៉ុបមួយនេះ ចាញ់លើទឹកដីខ្លួនឯងដ៏ធំបំផុតក៏ដោយ។ លោក Viktor Goncharenko គ្រូបង្វឹករបស់ក្រុម CSKA បានឲ្យដឹងថា៖ «វាអាចនិយាយបានថា យ៉ាងហោចណាស់យើងបានផ្តួល Real ដើម្បីទទួលបាន ៧ ពិន្ទុ ប៉ុន្តែ បានបញ្ចប់នៅបាតតារាង និងធ្លាក់»៕
លទ្ធផលផ្សេងទៀត
Ajax 3-3 Bayern Munich
Benfica 1-0 AEK Athens
Man City 2-1 Hoffenheim
Shakhtar 1-1 Lyon
