ក្រុងឡុងដ៍៖ ខ្សែបម្រើ Joao Moutinho បានចុះកុងត្រាជាថ្មីជាមួយក្លិប Wolves ធ្វើឲ្យរូបគេអាចលេងរហូតដល់ឆ្នាំ ២០២២។
កីឡាករ Moutinho បានចេញពីក្លិប Monaco ទៅចូលរួមក្លិប Wolves នៅខែកក្កដា ឆ្នាំ ២០១៨ ក្នុងតម្លៃខ្លួន ៥ លានផោន ហើយរូបគេបានក្លាយជាកីឡាករសំខាន់មួយសម្រាប់ក្រុមក្លិបនេះរបស់លោក Nuno Espirito Santo។
ខ្សែបម្រើ Moutinho បានស៊ុតបាល់ free-kick យ៉ាងល្អក្នុងជ័យជម្នះប្រកួតជាមួយក្លិប Bournemouth ពីថ្ងៃសៅរ៍ដែលបានជួយឲ្យក្រុមរបស់លោក Nuno ឡើងទៅឈរនៅលេខ ៥ នៃក្របខ័ណ្ឌ Premier League។ កីឡាករព័រទុយហ្គាល់អាយុ ៣៣ ឆ្នាំរូបនេះ បានប្រាប់គេហទំព័រផ្លូវការក្លិប Wolves ថា៖ «ខ្ញុំបានសម្រេចភ្លាមៗព្រោះខ្ញុំមានអារម្មណ៍ល្អនៅទីនេះ ហើយខ្ញុំនឹងប្រឹងឲ្យអស់ពីសមត្ថភាព ដើម្បីជួយក្លិបនេះ»៕ AFP/SN