.jpg)
កីឡាករ Rafael Nadal ឈ្នះលើកទី ១ ០០០ ដែលឈរទី ៤ ក្នុងបញ្ជីកំណត់ត្រា។ រូបថត AFP
ប៉ារីស៖ Rafael Nadal ថា ខ្លួនមានមោទនភាពចំពោះ ការសម្រេចបាននូវសមិទ្ធផលដ៏អស្ចារ្យ ក្រោយឈ្នះលើកទី ១ ០០០ ក្នុងអាជីពជាអ្នកវាយកូនបាល់ (តិន្នីស) កាលពីថ្ងៃពុធ ដើម្បីក្លាយជាអត្តពលិកទី ៤ ដែលដល់ចំណុចនេះ ដោយការវាយបកយកឈ្នះ Feliciano Lopez នៅជុំទី២ នៃកម្មវិធី Paris Masters។
ម្ចាស់ជយលាភីពាន Grand Slam ២០ ដង Nadal ដែលវិលមក ក្រុងប៉ារីសវិញ ក្នុងរយៈពេលមិនដល់ ១ ខែ បន្ទាប់ពីឈ្នះពានកម្មវិធី Roland Garros ជាលើកទី១៣ បញ្ចប់ដំណើរមិត្តរួមជាតិអេស្ប៉ាញ Lopez ដោយការយកឈ្នះសិតទី២ និងទី៣ ក្នុងលទ្ធផល ៧-៦ និង ៦-៤ ក្រោយចាញ់សិតដំបូង ៦-៤។
Nadal និយាយថា៖ «ខ្ញុំមានមោទនភាពចំពោះសមិទ្ធផលល្អៗជាច្រើន តែខ្ញុំក៏មានបញ្ហាប្រឈមមួយចំនួនដែរ ក្នុងអាជីព ជាពិសេសពេលមានរបួស។ តែខ្ញុំតែងមានមហិច្ឆតា ក្នុងការបន្តដំណើរទៅមុខ និងតែងស្ងៀមស្ងាត់ ពោលគឺអត់ធ្មត់នៅពេលអ្វីៗ ផ្ទុយពីការរំពឹងទុករបស់អ្នក»។
Nadal ដែលឈ្នះការប្រកួតរបស់ ATP Tour លើកទី ១ ក្នុងខែមេសា ឆ្នាំ ២០០២ ពេលទើបមានវ័យតែ ១៥ ឆ្នាំ គឺជាអ្នកទី ៤ ក្នុងបញ្ជីកំណត់ត្រា ដោយអតីតកីឡាករ Jimmy Connors នាំមុខគេជាមួយនឹងជម្នះ ១ ២៧៤ ដង ពោល គឺមាន ៣២ លើកច្រើនជាងអ្នកលេខ ២ Roger Federer។
Nadal បានបន្ថែមទៀតថា៖ «រឿងអវិជ្ជមានមួយនៃការឈ្នះ ១ ០០០ ដងនេះ គឺថា អ្នកមានវ័យចំណាស់ហើយ ដែលបានន័យថា អ្នកមិនអាចប្រកបអាជីពនេះយូរអង្វែងទៀតទេ។ តែខ្ញុំរីករាយសប្បាយចិត្ត ព្រោះវាជាការសម្រេចបានសមិទ្ធផលដ៏អស្ចារ្យសម្រាប់ខ្ញុំ»។
Nadal ទទួលបាននូវការរៀបចំពិសេសមួយ ដើម្បីអបអរសមិទ្ធផលនេះ ក្រោយបញ្ចប់ការប្រកួតនៅទីលាន ដែលស្ទើរគ្មានមនុស្សសោះ Bercy Arena ដោយសារព្រឹត្តិការណ៍ត្រូវធ្វើដោយបិទទ្វារ បន្ទាប់ពីបារាំងប្រកាសបិទទ្វារប្រទេសជាលើកទី២ ទប់ស្កាត់វីរុសកូរ៉ូណានាសប្ដាហ៍មុន។
នៅជុំទី៣ Nadal វ័យ ៣៤ ឆ្នាំ ដែលប៉ងឈ្នះពានកម្មវិធី Paris Masters ជាលើកដំបូង នឹងត្រូវប្រឈមជាមួយកីឡាករអូស្ត្រាលី Jordan Thompson ដែលប្រកួតឈ្នះ Borna Coric របស់ក្រូអាស៊ី ក្នុងលទ្ធផល ២-៦ ៦-៤ និង ៦-២៕ AFP/VN
