.jpg)
ប៉ារីស៖ កីឡាករវាយកូនបាល់ (តិន្នីស) អាជីព Rafael Nadal ផ្ដើមជាមួយអ្វីដែលគេយល់ថា ជាការលំបាកបំផុតមិនធ្លាប់មាននៅ Roland Garros ខណៈកីឡាការិនី Serena Williams ចាប់ផ្ដើមការប៉ុនប៉ងជាថ្មី ក្នុងការឈ្នះពាន Grand Slam ជាលើកទី២៤។
Nadal ដែលមានឈ្មោះថា «King of Clay» (ស្ដេចតារាងដីឥដ្ឋ) ត្រូវការពានធំ ១ ទៀតប៉ុណ្ណោះ ដើម្បីស្មើជាមួយកំណត់ត្រារបស់កីឡាកស្វ៊ីស Roger Federer ២០ លើក តែអត្តពលិកសញ្ជាតិអេស្ប៉ាញធ្វើដំណើរមកដល់ប៉ារីសជាមួយនឹងពេលវេលាតិច ក្នុងការត្រៀមខ្លួន និងការមិនពេញចិត្តចំពោះជម្រើសប្រើកូនបាល់ថ្មីក្នុងកម្មវិធី French Open 2020។
កីឡាករចំណាត់ទី២ ពិភពលោកថា៖ «ស្ថានភាពទីនេះ ទំនងជាលំបាកបំផុតមិនធ្លាប់មានសម្រាប់ខ្ញុំក្នុងកម្មវិធី Roland Garros នេះ ដោយគិតលើកត្តាផ្សេងៗជាច្រើន។ កូនបាល់ គឺខុសពីមុនទាំងស្រុង។ វាមានល្បឿនយឺត និងធ្ងន់។ អាកាសធាតុត្រជាក់ណាស់»។
Nadal ឈ្នះជើងឯកលើកដំបូងក្នុងចំណោមពានទាំង ១២ ក្នុងកម្មវិធី French Open នេះ ក្នុងឆ្នាំ ២០១៥ ហើយចាញ់តែ ២ ដងប៉ុណ្ណោះ ក្នុងចំណោមការប្រកួតទាំង ៩៥ លើកនៅទីនេះ តែពេលនេះត្រូវសម្របខ្លួនជាមួយនឹងអាកាសធាតុរងាខុសពីឆ្នាំរាល់ដង ដោយសារតែកម្មវិធីនេះ ត្រូវបានពន្យារពេលដោយសារវិបត្តិវីរុសកូរ៉ូណា។
ព្រឹត្តិការណ៍ដ៏ធំប្រចាំឆ្នាំនេះ បានចាប់ផ្ដើមកាលពីថ្ងៃអាទិត្យក្រោមតំណក់ទឹកភ្លៀងប្រុយៗ ជាមួយនឹងសីតុណ្ហភាព ១០ អង្សាសេ ដោយទិដ្ឋភាពនេះ ត្រូវបានកីឡាការិនី Victoria Azarenka ដែលឡើងដល់វគ្គផ្ដាច់ព្រ័ត្រនៅកម្មវិធី US Open ឱ្យឈ្មោះថា «ចម្លែក»។
ផ្នែកនារីវិញ កីឡាការិនី Williams ត្រឡប់មកមានសកម្មភាពជាថ្មី ទាំងរបួសសរសៃពួរកែងជើងមិនទាន់ជាស្រួលបួលកាលពីលេងនៅកម្មវិធី US Open ដែលនាងធ្លាក់ត្រឹមវគ្គពាក់កណ្ដាលផ្ដាច់ព្រ័ត្រ។
អតីតកីឡាការិនីលំដាប់លេខ ១ ពិភពលោក សញ្ជាតិអាមេរិកបានទម្លាក់ចោលកម្មវិធីនៅក្រុងរ៉ូម ប្រទេសអ៊ីតាលី ដោយសារតែរបួសនេះ តែហាក់មានទំនុកចិត្តខ្ពស់ថា អាចប្រកួតប្រជែងដើម្បីឈ្នះពានពីកម្មវិធី Roland Garros ជាលើកទី៤ នៅក្រុងប៉ារីសនេះបាន៕ AFP/VN
