.jpg)
កីឡាករអេស្ប៉ាញ Nadal វាយកូនបាល់ត្រឡប់ទៅគូប្រកួតវិញ អំឡុងការប្រកួត កម្មវិធី French Open 2020 ជុំទី១ កាលពីម្សិលមិញ។
ក្រុងប៉ារីស: Rafael Nadal បានចាប់ផ្ដើមដំណើរការការប៉ុនប៉ងរបស់ខ្លួន ក្នុងការឈ្នះពានលំដាប់ Grand Slam ក្នុងកម្មវិធីវាយកូនបាល់ (តិន្នីស) អាជីពផ្នែកបុរស ឲ្យបានស្មើនឹងចំនួន ២០ លើក ជាមួយនឹងជ័យជម្នះ ៣ សិតជាប់ៗគ្នា អំឡុងការប្រកួត ក្នុងព្រឹត្តិការណ៍ French Open 2020 ខណៈកីឡាការិនី Serena Williams ប្រើពេលយូរ តែនៅតែចាប់ផ្ដើមដោយជោគជ័យ។
កីឡាករសញ្ជាតិអេស្ប៉ាញ Nadal ត្រូវការជើងឯកម្ដងទៀតប៉ុណ្ណោះ ដើម្បីតាមទាន់កំណត់ត្រារបស់កីឡាករស្វីស Roger Federer តែបានរអ៊ូរទាំចំពោះការការពារជើងឯកកម្មវិធី Roland Garros របស់ខ្លួននាឆ្នាំនេះថា ជាការលំបាកបំផុតមិនធ្លាប់ជួប ដោយសារអាកាសធាតុត្រជាក់ និងស្ថានភាពទីលានមានលក្ខណៈសើមសម្រាប់ព្រឹត្តិការណ៍ ដែលត្រូវបានពន្យារពេលដល់ទៅ ៤ ខែ ដោយសាររីករាលដាលនៃវីរុសកូរ៉ូណា។
តែទោះជាមានកង្វល់នឹងបញ្ហាផ្សេងៗក្ដី ក៏កីឡាករវ័យ ៣៤ ឆ្នាំរូបនេះ នៅចាប់ផ្ដើមបានយ៉ាងល្អ ដោយទម្លាក់កីឡាករបេឡារុស Egor Gerasimov ដែលមានចំណាត់ថ្នាក់ទី៨៣ ពិភពលោក ជាមួយនឹងលទ្ធផលមិនឱ្យតដៃបាន ៦-៤ ៦-៤ និង ៦-២ ដើម្បីធ្វើដំណើរទៅរកការប្រជែងយកពាន French Open ជាលើកទី១៣ ក្នុងចំណោមរយៈពេល ១៥ ឆ្នាំ គិតតាំងពីពេលចូលរួមប្រកួតប្រជែងលើកដំបូង។
នៅចំពោះមុខអ្នកគាំទ្រតិចតួចចំនួន ១ ០០០ នាក់ ដែលត្រូវបានអនុញ្ញាតឱ្យចូលមើលការប្រកួតប្រចាំថ្ងៃនេះ កីឡាករ Nadal បាននិយាយថា៖ «និយាយដោយស្មោះ ខ្ញុំរីករាយ។ ខ្ញុំបានធ្វើអ្វី ដែលខ្ញុំត្រូវធ្វើ។ ខ្ញុំមិនរំពឹងអ្វីឱ្យលើសពីនេះទៀតទេ។ ខ្ញុំពិតជារីករាយមែនទែន ដែលបានត្រឡប់មកកាន់ទីលាន Chatrier។ ដោយក្ដីសង្ឃឹមខ្ពស់ សព្វយ៉ាងនឹងត្រឡប់មកសភាពប្រក្រតីវិញនៅឆ្នាំក្រោយ ហើយខ្ញុំនឹងបានលេងនៅចំពោះមុខអ្នកគាំទ្រដ៏គួរឱ្យស្រលាញ់នេះ»។
យ៉ាងណា នេះជាលើកដំបូងដែលអត្តពលិកវ័យ ៣៤ ឆ្នាំ បង្ហាញវត្តមាននៅក្រុងប៉ារីស ដោយមិនមានទំនុកចិត្តក្នុងការឈ្នះពានរង្វាន់ពីកម្មវិធីប្រកួតលើទីលានដីឥដ្ឋ ខណៈមុនហ្នឹងបានដកខ្លួនចេញពីព្រឹត្តិការណ៍ US Open នៅអាមេរិក ដោយសារការបារម្ភពីការឆ្លងជំងឺកូវីដ ១៩។
កីឡាករលំដាប់លេខ ២ ពិភពលោកដែលត្រូវទៅជួបកីឡាករអាមេរិក Mackenzie McDonald នៅជុំទី២ បានបន្ថែមថា៖ «ខ្ញុំមិនចង់មានកំហុសនោះទេ។ វាជាព្រឹត្តិការណ៍ប្លែកជាងរាល់ដងមួយ សម្រាប់ Roland Garros ឆ្នាំនេះ ហើយលក្ខខណ្ឌអាកាសធាតុ គឺជាបញ្ហាប្រឈម តែយ៉ាងណាយើងមកទីនេះ ដើម្បីប្រឹងឱ្យអស់លទ្ធភាពតាម ដែលអាចធ្វើទៅបាន»។
កីឡាការិនីអាមេរិក Williams វាយកូនបាល់ត្រឡប់ទៅគូប្រកួតវិញ អំឡុងការប្រកួត កម្មវិធី French Open 2020 ជុំទី១ កាលពីម្សិលមិញ។
ចំណែកកីឡាការិនីអាមរិក Williams ពិតមែនពិបាកយកឈ្នះ នៅសិតទី១ តែនៅតែអាចទម្លាក់មិត្តរួមជាតិ Kristie Ahn ដែលឈរនៅលំដាប់លេខ ១០២ ពិភពលោក ក្នុងលទ្ធផល ៧-៦ និង ៦-០ ដើម្បីបន្ថែមក្ដីសង្ឃឹម ដែលចង់លើកពានលំដាប់កំពូលឱ្យបាន ២៤ ដង ពោលគឺតាមស្មើកំណត់ត្រារបស់អតីតកីឡាការិនីសញ្ជាតិអូស្ត្រាលី Margaret Court។
កីឡាការិនី Williams មិនសូវកាក់កបប៉ុន្មានទេ ក្នុងកម្មវិធី Roland Garros នេះ ព្រោះក្នុងចំណោមពានរង្វាន់ទាំង ២៣ ដែលនាងឈ្នះពីព្រឹត្តិការណ៍ធំៗប្រចាំឆ្នាំទាំង ៤ សម្រាប់ French Open នេះ នាងក្លាយជាជើងឯកតែ ៣ ដងប៉ុណ្ណោះ ខណៈបានចូលរួមប្រកួតប្រជែង ១៨ លើកហើយ ក្នុងការប្រកួតទីលានដីឥដ្ឋនេះ។
កីឡាការិនីវ័យ ៣៩ ឆ្នាំ Williams បាននិយាយពាក់ព័ន្ធនឹងការប្រកួតថា៖ «គូប្រកួតរបស់ខ្ញុំ នាងលេងបានល្អណាស់នៅសិតដំបូង។ វាមិនងាយស្រួលសម្រាប់ខ្ញុំឡើយ។ ភាពខុសគ្នាខ្លាំងបំផុត គឺទំនុកចិត្ត។ ខ្ញុំត្រូវតែលេងដោយទំនុកចិត្តជាងនេះ ឱ្យសមនឹងឈ្មោះ Serena Williams»។
កីឡាការិនីដែលធ្លាប់ឈរលេខ ១ តែឥឡូវធ្លាក់មកលេខ ៣៨៦ ពិភពលោក បានបន្ថែមថា៖ «ដើម្បីធ្វើបែបហ្នឹងបាន។ ខ្ញុំគ្រាន់តែចាប់ផ្ដើមលេងបែបហ្នឹង គឺលេងដោយទំនុកចិត្ត។ ខ្ញុំចូលចិត្តទីលានដីឥដ្ឋ ហើយខ្ញុំចាប់ផ្ដើមលេង ជាមួយនឹងអារម្មណ៍ចូលចិត្តនោះ ដូច្នេះ គ្រប់យ៉ាងក៏ចាប់ប្រសើរឡើងៗ»។
នៅជុំទី២ កីឡាការិនី Williams នឹងទៅជួបកីឡាការិនី Tsvetana Pironkova របស់ប៊ុលហ្គារី ដែលបានឈ្នះគូប្រកួតសញ្ជាតិអាល្លឺម៉ង់ Andrea Petkovic ២-០ សិត ៦-៣ និង ៦-៣៕ AFP/VN
