ក្រុងប៉ារីស៖ ម្ចាស់ជើងឯក ១២ សម័យកាល ក្នុងកម្មវិធីប្រកួតវាយកូនបាល់ (តិន្នីស) French Open ឬ Roland Garros នាក្រុងប៉ារីស ប្រទេសបារាំង គឺកីឡាករ Rafael Nadal បានឆ្លងទៅវគ្គ ៨ នាក់ចុងក្រោយជាលើកទី១៤ សម្រាប់ពានលំដាប់ Grand Slam នេះ ខណៈ Alexander Zverev បានធ្លាក់ចេញពីព្រឹត្តិការណ៍ ដែលត្រូវបានរំខានដោយវីរុសកូរ៉ូណា តែកីឡាករអាល្លឺម៉ង់ប្រាប់ថា ខ្លួនធ្វើការប្រកួតទាំងមានជំងឺ។
កីឡាករសញ្ជាតិអេស្ប៉ាញ Nadal ហាក់មិនជាលំបាកប៉ុន្មានឡើយ ក្នុងការយកឈ្នះកីឡាករអាមេរិក Sebastian Korda ជាមួយនឹងលទ្ធផល ៣ សិតទល់នឹង ០ គឺ ៦-១ ៦-១ និង ៦-២ ខណៈជោគជ័យនេះ ជួយជំរុញក្ដីសង្ឃឹមដែលចង់ឈ្នះពានឱ្យបានស្មើកំណត់ត្រា ២០ ដង របស់កីឡាករស្វីស Roger Federer នោះ កំពុងមានកាន់តែខ្ពស់ឡើងៗ។
នេះជាជ័យជម្នះលើកទី៩៧ របស់ Nadal សម្រាប់ការប្រកួតវាយតិន្នីសលើទីលានដីឥដ្ឋ ដោយក្នុងនោះ គឺចាញ់តែ ២ ដងប៉ុណ្ណោះ គិតតាំងពីកីឡាករវ័យ ៣៤ ឆ្នាំរូបនេះ លើកពាននៅរដ្ឋធានីនៃប្រទេសបារាំង នេះជាលើកដំបូង កាលពីឆ្នាំ ២០០៥។
«វាជាទម្រង់លេងល្អ ហើយខ្ញុំរីករាយជាមួយនឹងអ្វី ដែលខ្ញុំធ្វើបាននោះ»។ នេះជាសម្ដីខ្លីៗរបស់ Nadal ដែលគិតទាំងពេលនេះផង បានបង្ហាញវត្តមាននៅវគ្គ ៨ នាក់ចុងក្រោយ ជាលើកទី៤២ ហើយសម្រាប់ព្រឹត្តិការណ៍សំខាន់ៗ។
នៅវគ្គបន្ទាប់គូប្រជែងរបស់ Nadal គឺ Jannik Sinner ដែលបានក្លាយជាកីឡាករវ័យក្មេងបំផុតក្នុងការបានឡើងទៅវគ្គ ៨ នាក់ សម្រាប់កម្មវិធី Grand Slam ផ្នែកបុរសគិតតាំងពីកីឡាករស៊ែប៊ី Novak Djokovic ធ្វើបានកាលពីឆ្នាំ ២០០៦ ក្រោយពីកីឡាករអ៊ីតាលីវ័យ ១៩ ឆ្នាំ បានទម្លាក់កីឡាករ Zverev ជាមួយនឹងជ័យជម្នះ ៣-១ សិត ៦-៣ ៦-៣ ៤-៦ និង ៦-៣។
ក្រោយមិនអាចបន្តដំណើរទៅមុខទៀត កីឡាករ Zverev បាននិយាយថា៖ «ខ្ញុំពិតជាមានជំងឺតាំងតែពីយប់ប្រកួតជាមួយ Marco Cecchinato។ ខ្ញុំដកដង្ហើមមិនស្រួលសោះ ដូចអ្នកបានឮសំឡេងរបស់ខ្ញុំនាពេលនេះអ៊ីចឹង។ ខ្ញុំមិនទាន់មានសុខភាពប្រសើរពេញបរិបូរណ៍នៅឡើយទេ។ ការពិតខ្ញុំមិនគួរធ្វើការប្រកួតនោះទេ»។
ចំណែក Sinner ដែលជាកីឡាករទី១ ផងដែរ ក្នុងការបានឡើងដល់វគ្គនេះ ជាមួយនឹងការបង្ហាញខ្លួនលើកដំបូង នៅ Roland Garros បន្ទាប់ពី Nadal ក្នុងឆ្នាំ ២០០៥ បានប្រាប់ថា៖ «ថ្ងៃនេះ តឹងតែងណាស់ពេលដឹងថា ការប្រកួតនឹងត្រូវបន្តទៅយូរទៀត តែចុងក្រោយខ្ញុំរីករាយនឹងទម្រង់លេងរបស់ខ្ញុំ»។
ដោយឡែក កីឡាករលំដាប់កំពូល ១ រូបទៀត គឺ Dominic Thiem ក៏បានធ្វើដំណើរទៅវគ្គបន្តដែរ ក្រោយរួចជីវិតពីការប្រកួតចំនួន ៥ សិត ជាមួយនឹងជ័យជម្នះ ៦-៤ ៦-៤ ៥-៧ ៣-៦ និង ៦-៣ ខណៈលទ្ធផលនេះ ធ្វើឱ្យកីឡាករសញ្ជាតិអូទ្រីសនេះ អាចបង្ហាញខ្លួន នៅវគ្គ ៨ នាក់ ជាលើកទី៥ ក្នុងអំឡុងពេល ៨ ឆ្នាំចុងក្រោយនេះ។
បន្ទាប់ពីឆ្លងផុតកីឡាករបារាំង Hugo Gaston ក្នុងជុំទី៤ នេះ កីឡាករចំណាត់ថ្នាក់ទី៣ ពិភពលោក Thiem វ័យ ២៧ ឆ្នាំ ត្រូវឡើងទៅប្រឈមជាមួយនឹងកីឡាករអាហ្សង់ទីន Diego Schwartzman ដែលឈរនៅលំដាប់ទី១៤ របស់ពិភពលោក ដើម្បីប្រជែងគ្នាយកកៅអីនៅវគ្គពាក់កណ្ដាលផ្ដាច់ព្រ័ត្រ៕ AFP/VN