.jpg)
លោក Ashley ដែលរងការរិះគន់ពីអ្នកនយោបាយអង់គ្លេស។ រូប AFP
ក្រុងឡុងដ៍៖ ក្លិប Newcastle United បាននិយាយការពារម្ចាស់ក្លិប គឺលោក Mike Ashley ក្រោយរងការរិះគន់ពីអ្នកនយោបាយអង់គ្លេសលោក Jeremy Corbyn។
ថ្នាក់ដឹកនាំគណបក្សការងារលោក Corbyn បានចាត់ទុកលោក Ashley ជា «ម្ចាស់ក្លិបដ៏អាក្រក់ម្នាក់» ក្នុងចំណោម ជាច្រើននាក់ទៀត ដែលបាន «ដាក់ផលប្រយោជន៍ពាណិជ្ជកម្មរបស់ខ្លួននៅមុនពេលអ្វីៗទាំងអស់ដោយមិនខ្វល់ពីអ្នកគាំទ្រ និងដាក់សន្តិសុខហិរញ្ញវត្ថុនៃក្លិបនេះក្នុងហានិភ័យ»។
លោក Corbyn បាននិយាយទៅកាន់អ្នកគាំទ្រគណបក្សការងារ ដើម្បីបង្ហាញពីការប្តេជ្ញាចិត្តរបស់គណបក្សរបស់គាត់ក្នុងការហាមឃាត់កិច្ចសន្យាសូន្យម៉ោង និងបង្ហាញពីការដំឡើងប្រាក់ឈ្នួលថ្នាក់ជាតិ សម្រាប់បុគ្គលិកនៅគ្រប់ក្លិបទាំងអស់ដែលនៅក្របខ័ណ្ឌ Premier League។
លោក Ashley មិនសូវមានប្រជាប្រិយភាពជាយូរមកហើយជាមួយក្រុមអ្នកគាំទ្រក្លិប Newcastle ប៉ុន្តែទោះជាមានរបាយការណ៍ពីការទទួលបានផលប្រយោជន៍ពីអ្នកទិញមួយចំនួនក្នុងរយៈពេលប៉ុន្មានឆ្នាំថ្មីៗនេះក៏ដោយ ក្លិបនេះនៅតែស្ថិតក្រោមភាពជាម្ចាស់កម្មសិទ្ធិរបស់គាត់ដដែល។
ទោះបីជាយ៉ាងណាក៏ដោយ របាយការណ៍របស់ក្លិប Newcastle ចេញផ្សាយកាលពីថ្ងៃអង្គារបានរិះគន់លោក Corbyn ចំពោះការបញ្ចេញ«មតិយោបល់បំផ្លិចបំផ្លាញ និងផ្ដល់ព័ត៌មានមិនត្រឹមត្រូវ» ពីលោក Ashley និងកិច្ចការងាររបស់គាត់នៅកីឡដ្ឋាន St James ''Park នៃក្លិប Nescastle។
ក្លិបនេះបាននិយាយថា៖ «ដោយមើលទៅលើអភិបាលកិច្ច និងបទប្បញ្ញត្តិដែលមានស្រាប់ក៏ដូចជាផលប៉ះពាល់វិជ្ជមានយ៉ាងខ្លាំងដែលក្លិប Newcastle និងក្លិបអាជីពផ្សេងទៀតមាននៅក្នុងសហគមន៍របស់ពួកគេនោះ លោក Corbyn បានបង្ហាញពីកង្វះចំណេះដឹងដ៏គួរឱ្យភ្ញាក់ផ្អើលអំពីការប្រកួតថ្នាក់ជាតិរបស់យើង»។
ក្លិបនេះបានបន្ថែមថា៖ «គិតតាមហិរញ្ញវត្ថុ ក្រៅពីចំនួនដែលផ្ដល់ឲ្យក្លិបនេះក្នុងរយៈពេលខ្លី និងគ្មានការប្រាក់ព្រមទាំងសងទៅគាត់វិញតាមការចង់បាននោះ យើងចង់បញ្ជាក់ឱ្យច្បាស់ថា លោក Mike Ashley មិនបានយកប្រាក់មួយកាក់ចេញពី Newcastle United ជាការប្រាក់ ប្រាក់ខែ ឬភាគលាភដែលជាទម្លាប់នៅតាមក្លិបជាច្រើននោះទេ»។
ក្លិប Newcastle បានបន្ថែមទៀតថា៖ «យើងសូមអញ្ជើញលោក Corbyn មកមើលកម្មវិធីផ្ដួចផ្ដើម ១ ក្នុងចំណោមជាច្រើនទៀត ដើម្បីឃើញផ្ទាល់ភ្នែកពីការងារដែលជាមូលដ្ឋានគ្រឹះនៅក្នុងសហគមន៍របស់យើងរៀងរាល់ថ្ងៃ»៕ SN
