ភ្នំពេញ៖ ថ្នាក់ដឹកនាំរបស់គណៈកម្មាធិការជាតិអូឡាំពិកកម្ពុជា (NOCC) កាលពីថ្ងៃពុធ បានចូលរួមប្រជុំមហាសន្និបាតក្រុមប្រឹក្សាកីឡាអូឡាំពិកអាស៊ីលើកទី៣៩ តាមវីដេអូ Conference ជាមួយសមាជិកចំនួន ៤៥ ប្រទេសផ្សេងទៀត ក្នុងទ្វីបអាស៊ី ដើម្បីពិភាក្សាគ្នាពីវឌ្ឍនភាពកីឡាប្រចាំតំបន់មួយនេះ។
មន្ត្រីជាន់ខ្ពស់ទទួលផ្នែកកីឡាសំខាន់ៗ មាន លោកបណ្ឌិត ថោង ខុន ជាប្រធាន NOCC និងជារដ្ឋមន្ត្រីក្រសួងទេសចរណ៍ លោកនាយឧត្តមសេនីយ៍ សៅ សុខា លោក អ៊ុក សិទ្ធិជាតិ ជាអនុប្រធាន និង វ៉ាត់ ចំរើន អគ្គលេខាធិការ NOCC សុទ្ធតែបានចូលរួមក្នុងកិច្ចប្រជុំតាមអនឡាញក្នុងមហាសន្និបាតប្រចាំឆ្នាំ របស់ក្រុមប្រឹក្សាកីឡាអូឡាំពិកអាស៊ី (OCA) មួយនេះ។
ចំពោះខ្លឹមសារនៅក្នុងកម្មវិធីប្រជុំប្រចាំឆ្នាំមួយនេះ ត្រូវបាន លោក វ៉ាត់ ចំរើន ប្រាប់ថា គឺពិនិត្យមើលលើរបាយការណ៍វឌ្ឍនភាពការងារក្នុងស្ថានភាពវិបត្តិជំងឺកូវីដ ១៩ នៃបណ្តាចលនាអូឡាំពិកក្នុងទ្វីបអាស៊ីព្រមទាំងរបៀបវារៈមួយចំនួនទៀត ស្តីពីការរៀបចំព្រឹត្តិការណ៍ប្រកួតនានា។
លោកបន្តថា៖ «ការចូលរួមនេះ ទទួលបានការឯកភាពពី OCA ដើម្បីឱ្យ NOCC ដឹកនាំដោយឯកឧត្តម ថោង ខុន ដែលជាសមាជិកក្រុមប្រឹក្សាកីឡាអូឡាំពិកអាស៊ី រៀបចំគណៈប្រតិភូរបស់ខ្លួនចូលរួមប្រជុំតាមវីដេអូ Conference ជាមួយប្រតិភូមកពីចំនួន ៤៥ ប្រទេស ក្នុងទ្វីបអាស៊ី ដើម្បីស្តាប់នូវសារសំឡេងរបស់ប្រធានគណៈកម្មាធិការអូឡាំពិកអន្តរជាតិ លោក Thomas Bach និង ព្រះអង្គម្ចាស់ Sheikh Ahmad ប្រធាន OCA ថ្លែងពីរបាយការណ៍ប្រចាំឆ្នាំ និងវឌ្ឍនភាពការងារ ដោយសារយើងជួបវិបត្តិកូវីដ ១៩ ធ្វើឱ្យសកម្មភាពកីឡាត្រូវពន្យារពេលកាត់បន្ថយខ្លះ និងប្រែប្រួលទៅតាមភាពជាក់ស្តែង»។
ជាមួយគ្នានោះ កិច្ចប្រជុំបានលើកឡើងនូវបញ្ហានានានៃបណ្តាប្រទេស ដែលត្រៀមទទួលធ្វើម្ចាស់ផ្ទះកីឡាក្នុងទ្វីបអាស៊ី ដូចជាការប្រកួតកីឡាអាស៊ីតំបន់ឆ្នេរ នៅ Sanya ប្រទេសចិន ការប្រកួតកីឡាអាស៊ីក្នុងសាល និងយុទ្ធគុនលើកទី៦ នៅបាងកក និងចាន់បូរី ប្រទេសថៃ ឆ្នាំ ២០២១ ប្រកួតកីឡាអាស៊ីលើកទី១៩ នៅ Hangzhou ប្រទេសចិន និងការប្រកួតកីឡាយុវជនអាស៊ីលើកទី៣ ឆ្នាំ ២០២១ នៅចិន ដោយបណ្តាម្ចាស់ផ្ទះទាំងនោះ ធ្វើរបាយការណ៍វឌ្ឍនភាពការងារបង្ហាញជូនក្នុងកិច្ចប្រជុំនេះ ពីសក្តានុភាព និងភាពប្រឈម។
ក្រៅពីនេះក៏មានការបោះឆ្នោតជ្រើសរើសបេក្ខភាពទីក្រុងដែលត្រៀមធ្វើម្ចាស់ផ្ទះកីឡាអាស៊ី ឆ្នាំ ២០៣០ ដែលមានទីក្រុង ២ ប្រជែងគ្នា គឺទីក្រុងដូហា នៃប្រទេសកាតា និងទីក្រុង Riyadh ប្រទេស Saudi Arabia។ លោក វ៉ាត់ ចំរើន រំពឹងថា៖ «ក្រោយមហាសន្និបាតក្រុមប្រឹក្សាកីឡាអូឡាំពិកអាស៊ី នឹងទទួលបានជោគជ័យ ដែលនឹងប្រារព្ធធ្វើតាមផែនការកំណត់ ខណៈដែលបញ្ហាអនាម័យការពារជំងឺឆ្លងកូវីដ ១៩ ជារឿងសំខាន់»។
ចំណែកឯលោក ថោង ខុន ប្រធានគណៈកម្មាធិការជាតិអូឡាំពិកកម្ពុជាមានប្រសាសន៍ថា៖ «កម្ពុជាបានបង្ហាញនូវមុខមាត់កិត្តិយសរបស់ខ្លួនតាមរយៈកិច្ចប្រជុំតាមអនឡាញក្នុងឋានៈជាប្រទេសមួយដែលធ្វើម្ចាស់ផ្ទះ ការប្រកួតស៊ីហ្គេមក្នុងពេលខាងមុខ ហើយប្រទេសកម្ពុជា ជាសមាជិកពេញសិទ្ធិនៃក្រុមប្រឹក្សាកីឡាអូឡាំពិកអាស៊ីស្មើមុខមាត់ ដូចប្រទេសដទៃជាមួយនឹងភាពរីកចម្រើន»៕