ភ្នំពេញ: គណៈកម្មាធិការជាតិអូឡាំពិកកម្ពុជា (NOCC) និងតំណាងសហព័ន្ធកីឡាចំនួន ៣៦ រួមទាំងមន្ត្រីជាន់ខ្ពស់ និងអ្នកជំនាញកីឡាមកពីក្រសួងអប់រំ យុវជន និងកីឡា និងមកពីគណៈកម្មាធិការជាតិអូឡាំពិកកម្ពុជាសរុបចំនួន ២០០ នាក់បានចូលរួមក្នុងមហាសន្និបាតបូកសរុបការងារឆ្នាំ ២០១៨ និងលើកទិសដៅសម្រាប់ឆ្នាំ ២០១៩ នៅទីស្នាក់ការ NOCC រយៈពេលពេញ ១ ថ្ងៃនៅថ្ងៃទី ២១ ខែកុម្ភៈ ឆ្នាំ ២០១៩។
ថ្លែងក្នុងមហាសន្និបាតកាលពីម្សិលមិញលោក ថោង ខុន រដ្ឋមន្ត្រីក្រសួងទេសចរណ៍ និងជាប្រធានគណៈកម្មាធិការជាតិអូឡាំពិកកម្ពុជាបានមានប្រសាសន៍ថា៖ «ឆ្នាំ ២០១៨ ជាឆ្នាំនៃរបត់កំណែទម្រង់លើរបបគ្រប់គ្រងវិស័យកីឡាជាតិ និងសហព័ន្ធកីឡាជាតិឲ្យដើរលើផ្លូវត្រូវដើម្បីអនុវត្តឲ្យចំជំនាញ»។
លោកបានប្រាប់បន្តថា៖ «ជាមួយគ្នានេះបញ្ហាដែលត្រូវត្រួសត្រាយ និងជម្នះឧបសគ្គទាំងឡាយដែលរាំងស្ទះដំណើរការវិវត្តនៃវិស័យកីឡាត្រូវតែវះកាត់ និងព្យាបាលរួមទាំងសហព័ន្ធកីឡាជាតិគណៈកម្មាធិការជាតិអូឡាំពិកកម្ពុជា និង ក្រសួងអប់រំ យុវជន និងកីឡារួមគិត រួមធ្វើ និងរួមទទួលខុសត្រូវដោយផ្អែកតាមគោលនយោបាយកីឡាក្នុងកម្រិតស្តង់ដាអន្តរជាតិស្របតាមកំណែទម្រង់ស៊ីជម្រៅរបស់រាជរដ្ឋាភិបាលផងដែរ»។ លោក ថោង ខុន មានប្រសាសន៍ថា៖ «កំណែទម្រង់ស៊ីជម្រៅលើវិស័យអប់រំកាយ និងកីឡា ពិសេសអនុវត្តឲ្យបានតាមផែនការមេឆ្ពោះទៅមុខដែលរាជរដ្ឋាភិបាលបានអនុម័តតាំងពីថ្ងៃទី ២២ ខែមេសា ឆ្នាំ ២០១៦ ដើម្បីឆ្ពោះទៅធ្វើម្ចាស់ធ្វើជាម្ចាស់ផ្ទះកីឡា SEA Games លើកទី ៣២ ឆ្នាំ ២០២៣ ដែលកម្ពុជាធ្វើម្ចាស់ផ្ទះឲ្យបានលទ្ធផលល្អ»។
លោកបានបញ្ជាក់ថា៖ «លើសពីនេះយើងទាំងអស់គ្នាជាមហាគ្រួសារកីឡាជាតិ ជាអង្គការកីឡាជាតិ ស្ថាប័នកីឡាជាតិដែលមានតួនាទីភារកិច្ចទទួលខុសត្រូវខ្ពស់លើជោគវាសនាកីឡាជាតិទៅថ្ងៃអនាគត ដើម្បីរៀបចំកីឡាស៊ីហ្គេមលើកទី ៣២ ឆ្នាំ ២០២៣ ឲ្យមានលទ្ធផលល្អពោលគឺមានមេដាយមានប្រៀបជាងគេ»។ លោក វ៉ាត់ ចំរើន អគ្គលេខាធិការ NOCC និងជារដ្ឋលេខាធិការក្រសួងទេសចរណ៍មានប្រសាសន៍ថា៖ «សមិទ្ធផលក្នុងឆ្នាំ ២០១៨ គឺជាសច្ចភាពប្រវត្តិសាស្ត្រដែលយើងបានខិតខំប្រឹងប្រែងធ្វើដោយឆន្ទៈមោះមុតរួមគ្នាក្នុងស្មារតីទទួលខុសត្រូវខ្ពស់ ចំពោះប្រវត្តិសាស្ត្រ ហើយក៏មានមោទនភាពខ្លាំងបំផុត»។
លោក វ៉ាត់ ចំរើន បានបង្ហាញនូវរបាយការណ៍ច្បាស់លាស់ពីសមិទ្ធផលឆ្នាំចាស់ថា៖ «មានសហព័ន្ធកីឡាជាតិចំនួន ២៣ ក្នុងចំណោម ៥៥ សហព័ន្ធបានចេញទៅប្រកួតលក្ខណៈអន្តរជាតិ ហើយជាលទ្ធផលកម្ពុជាឈ្នះមេដាយមាសចំនួន ១០ មេដាយប្រាក់ចំនួន ២២ មេដាយសំរឹទ្ធ ៥២ សរុបចំនួន ៨៤»។
លោក វ៉ាត់ ចំរើន បានលម្អិតដែរថា៖ «សហព័ន្ធកីឡាជាតិដែលទទួលបានមេដាយមានខេមរៈសហព័ន្ធតេក្វាន់ដូ សហព័ន្ធការ៉ាតេដូកម្ពុជាសហព័ន្ធប៊ូល និងប៉េតង់កម្ពុជាសហព័ន្ធសីដក់ សហព័ន្ធកីឡារាំកម្ពុជា សហព័ន្ធគុនដាវកម្ពុជា សហព័ន្ធទូកក្តោងកម្ពុជា សហព័ន្ធវាយកូនឃ្លីលើតុកម្ពុជា សហព័ន្ធសូហ្វតិន្នីសកម្ពុជា និងសហព័ន្ធកីឡាចំបាប់កម្ពុជា»។
ទោះជាយ៉ាងណាលោកក៏បានរាយការណ៍ពីចំណុចខ្សោយមួយចំនួនដែលនៅតែមានដូចជាការដឹកនាំរបស់សហព័ន្ធមួយចំនួននៅមិនទាន់មានយន្តការ ឬរដ្ឋបាលកីឡាជំនាញ។
សហព័ន្ធមួយចំនួនមិនទាន់មានទីលានហ្វឹកហាត់តាមស្តង់ដាបច្ចេកទេស មន្ត្រីបច្ចេកទេសនៅមានកម្រិតមិនទាន់ខ្ពស់ ខ្វះសម្ភារហ្វឹកហាត់ដោយសម្ភារកីឡាប្រភេទខ្លះមានតម្លៃខ្ពស់ពេក និងមិនទាន់មានដៃគូសហការ អាជ្ញាកណ្តាលចៅក្រមសហព័ន្ធខ្លះមិនទាន់មានកម្រិតអន្តរជាតិ និងធនធានគ្រូបង្វឹកជំនាញមកពីបរទេសដែលជាសេចក្តីត្រូវការ ប៉ុន្តែសហព័ន្ធខ្លះខ្វះនូវលទ្ធភាពជួលមកបង្វឹកជាដើម៕