ភ្នំពេញ: ប្រមុខនៃគណៈកម្មាធិការជាតិអូឡាំពិកកម្ពុជា (NOCC) លោកថោង ខុន បានជួបពិភាក្សាជាមួយលោក Chung Won Choue ប្រធានសហព័ន្ធតេក្វាន់ដូពិភពលោក WTF កាលចុងសប្តាហ៍មុននេះនៅទីស្នាក់ការគណៈកម្មាធិការជាតិអូឡាំពិកកម្ពុជា ដើម្បីឯកភាពទៅនឹងកិច្ចសហប្រតិបត្តិការរវាងកីឡាតេក្វាន់ដូពិភពលោក និងតេក្វាន់ដូកម្ពុជា ពិសេសប្រទេសកូរ៉េខាងត្បូង ដែលតែងតែសហការផ្តល់ជានិច្ចនូវបច្ចេកទេស សម្ភារ និងធនធានគ្រូបង្វឹក។
លោក ថោង ខុន បានថ្លែងអំណរគុណចំពោះសហព័ន្ធកីឡាតេក្វាន់ដូពិភពលោក ពិសេសសហព័ន្ធកីឡាតេក្វាន់ដូសាធារណរដ្ឋកូរ៉េ ដែលបានជួយដល់ខេមរសហព័ន្ធតេក្វាន់ដូតាំងពីទសវត្សរ៍ ១៩៩០ មកម្ល៉េះ។
លោកថោង ខុន បានសំណូមពរដល់សហព័ន្ធកីឡាតេក្វាន់ដូពិភពលោកថា៖ «ឆ្នាំ ២០២០ ក្នុងព្រឹត្តិការណ៍កីឡាអូឡាំពិកនៅទីក្រុងតូក្យូ ខ្ញុំសុំឲ្យសហព័ន្ធជួយយ៉ាងណាឲ្យតេក្វាន់ដូកម្ពុជាបានចូលរួមក្នុងការប្រកួតជម្រុះ ឬអាចបានទទួលសិទ្ធិអនុគ្រោះ (Wild Card) ដើម្បីទទួលបានឱកាសក្នុងការប្រកួតកីឡាពិភពលោកនេះនៅប្រទេសជប៉ុន ឆ្នាំ ២០២០»។
លោកថោង ខុន មានប្រសាសន៍ថា៖«ខ្ញុំចង់ឲ្យកីឡាតេក្វាន់ដូកម្ពុជាដណ្ដើមបានមេដាយមាសអូឡាំពិកពិភពលោកលើប្រភេទកីឡាតេក្វាន់ដូតែម្ដងដោយអ្វីៗគឺជាការជួយជ្រោមជ្រែងសហការជួយបង្វឹក និងផ្តល់ជូនដល់ខេមរសហព័ន្ធតេក្វាន់ដូឲ្យមានការហ្វឹកហាត់ក្រៅប្រទេសឲ្យបានខ្លាំងក្លាចាប់ពីបច្ចុប្បន្ននេះទៅ»។
លោកបានបញ្ជាក់ថា៖ «ដោយសារតែគ្រូបង្វឹកតេក្វាន់ដូមកពីប្រទេសកូរ៉េនេះហើយ បានធ្វើឲ្យការដណ្តើមមេដាយមាសកម្រិតអាស៊ី ធ្លាក់មកលើ ស៊ន សៀវម៉ី ដែលជាការឈ្នះជាប្រវត្តិសាស្ត្ររបស់ប្រទេសយើង»។
ជាមួយគ្នានេះ ប្រមុខអូឡាំពិកកម្ពុជា ក៏បានសំណូមពរបន្ថែមឲ្យសាធារណរដ្ឋកូរ៉េ ក៏ដូចជាសហព័ន្ធកីឡាតេក្វាន់ដូពិភពលោក ជួយផ្ដល់សម្ភារហ្វឹកហាត់ និងប្រកួតកម្រិតស្តង់ដារអន្តរជាតិនានាដល់កម្ពុជា។
លោក Chung Won Choue ប្រធានសហព័ន្ធតេក្វាន់ដូពិភពលោក WTF ដែលជាជនជាតិកូរ៉េផងនោះបានឲ្យដឹងថា៖ «សាធារណរដ្ឋកូរ៉េបានជួយផ្ដល់ឱកាសដល់កីឡាករតេក្វាន់ដូកម្ពុជា បាន ហ្វឹកហាត់ជារៀងរហូតមក និងបានសហការជួយទាំងគ្រូបង្វឹក សម្ភារ និងការហ្វឹកហាត់ដើម្បីដណ្ដើមបានមេដាយមាសក្នុងព្រឹត្តិការណ៍ប្រកួតកីឡាអាស៊ីនៅអ៊ីនឆ័ន កាលពីឆ្នាំ ២០១៤ ដែលកាលនោះជាសករាជថ្មីរបស់កម្ពុជានៅក្នុងការប្រកួតកីឡាអាស៊ីក្នុងរយៈពេល ៦០ ឆ្នាំ ដែលបានមេដាយមាសលើកដំបូងគឺកីឡាតេក្វាន់ដូនេះឯង»។
ប្រមុខតេក្វាន់ដូពិភពលោករូបនេះបានបន្តថា៖ «ប្រសិនបើកម្ពុជាបញ្ចូលតេក្វាន់ដូទៅក្នុងកម្មវិធីសិក្សាចាប់ពីបឋមសិក្សាទៅនោះ កម្ពុជា នឹងទទួលបានការគាំទ្រ និងមានផលប្រយោជន៍ជាច្រើនពីអង្គការនានានៅក្នុងប្រទេសកូរ៉េ ដែលជាអង្គការជួយកុមារក្រីក្រឲ្យហ្វឹកហាត់តេក្វាន់ដូ ហើយកម្ពុជានឹងមានធនធានកីឡាករ-កីឡាការិនីល្អៗរឹងមាំមិនខាន»។
លោកបានបញ្ជាក់ថា៖ «សព្វថ្ងៃនេះ សមាជិករបស់តេក្វាន់ដូពិភពលោកមានចំនួន ២០៩ ប្រទេស ហើយកម្ពុជាត្រូវបានគេស្គាល់ខ្លាំងតាមរយៈការឈ្នះមេដាយកីឡាតេក្វាន់ដូនេះ»។
លោក Chung Won បានបន្ថែមថា៖ «នៅបណ្ដាប្រទេសមួយចំនួនដូចជា ចិន និងនេប៉ាល់ តេក្វាន់ដូរបស់ពួកគេត្រូវបានបញ្ចូលទៅក្នុងកម្មវិធីសិក្សាតាំងពីបឋមសិក្សាមកម្ល៉េះ ហើយនៅម៉ាឡេស៊ី និងប្រទេសមួយចំនួនទៀតក្នុងអាស៊ីអាគ្នេយ៍ គេបញ្ចូលតេក្វាន់ដូទៅក្នុងកម្មវិធីសិក្សាចាប់ពីបឋមសិក្សារហូតដល់សាកលវិទ្យាល័យ»៕