ភ្នំពេញ៖ អង្គភាពរៀបចំការប្រកួតក្បាច់គុនចម្រុះធំជាងគេនៅក្នុងទ្វីបអាស៊ី ONE Championship (ONE) បានប្រកាសនូវការចុះកិច្ចព្រមព្រៀង ជាមួយសែលកាត (Cellcard) ដើម្បីធ្វើការរួមគ្នា ក្នុងការចែករំលែកនូវសិល្បៈក្បាច់គុនចម្រុះ និងព័ត៌មានកីឡាដ៏សម្បូរបែបជាច្រើនទៀតរបស់ ONE ជូនដល់អ្នកគាំទ្រនៅទូទាំងប្រទេសកម្ពុជា។
លោក Hua Fung The នាយកប្រធានក្រុម ONE បានថ្លែងក្នុងសន្នីសីទកាសែតកាលពីថ្ងៃចន្ទថា៖ «ខ្ញុំមានសេចក្តីរីករាយក្នុងការចុះហត្ថលេខាលើកិច្ចសហការជាដៃគូយូរអង្វែងជាមួយសែលកាត ហើយ ONE និងសែលកាតនឹងធ្វើការចែករំលែកនូវប្រវត្តិ និងរឿងរ៉ាវ ជុំវិញសិល្បៈក្បាច់គុនរបស់វីរបុរសខ្មែរ ជូនដល់បងប្អូននៅទូទាំងប្រទេស ឲ្យបានស្គាល់កាន់តែស៊ីជម្រៅ»។
លោកបន្ថែមថា៖ «យើងនឹងចូលរួមជួយជំរុញទឹកចិត្តបងប្អូនខ្មែរ ឲ្យបន្តក្តីស្រមៃ ដើម្បីសម្រេចបាននូវគោលដៅ និងទទួលបានជោគជ័យនៅក្នុងជីវិត ហើយខ្ញុំមានអារម្មណ៍រំភើបក្រៃលែង ដែលមានឱកាសអាចនាំអ្នកគាំទ្រនៅកម្ពុជា ឲ្យបានស្គាល់ជាមួយជើងឯកល្បីៗរបស់ ONE»។
ចំណែកលោក អៀន វ៉ាតសុន នាយកប្រតិបត្តិក្រុមហ៊ុនសែលកាតបានថ្លែងថា៖ «កម្ពុជាជាប្រទេសមួយ ដែលនិយមវិស័យកីឡាបំផុត ជាពិសេសគឺកីឡាបែបចំបាប់ ហើយក្នុងនោះ យើងក៏ឃើញមានកីឡាករក្នុងស្រុក ដែលមានថ្វីដៃល្អៗជាច្រើនរូប អ៊ីចឹងតាមរយៈកិច្ចសហការនេះ យើងនឹងអាចជួយលើកស្ទួយក្រុមកីឡាករខ្មែរយើង ក៏ដូចជាចែករំលែកនូវរឿងរ៉ាវរបស់ពួកគាត់ ដើម្បីជំរុញទឹកចិត្ត ដល់អ្នកចង់ហាត់រៀនក្បាច់គុនដទៃទៀត»។
បន្ថែមលើនេះ ក្រុមកីឡាករខ្មែរឆ្នើមៗរបស់ ONE Championshis ក៏នឹងចូលរួមជួយផ្សព្វផ្សាយឲ្យកាន់តែស៊ីជម្រៅនៃក្បាច់គុនល្បុក្កតោដ៏វ័យចំណាស់របស់ខ្មែរឲ្យបានកាន់តែទូលំទូលាយផងដែរ ហើយកីឡាករឆ្នើម ចាន់ រតនា ដែលជាទូតសុច្ឆន្ទៈថ្មីរបស់ក្រុមហ៊ុនសែលកាត នឹងចែករំលែកនូវដំណើរជីវិត និងប្រវត្តិនៃការហាត់រៀនគុនខ្មែររបស់គាត់ ដើម្បីជួយជំរុញទឹកចិត្តយុវជនខ្មែរឲ្យមានកម្លាំងចិត្ត ឈោងចាប់ក្តីសុបិនរបស់ពួកគេ។
ទន្ទឹមនឹងនោះ សែលកាត ក៏នឹងសហការជាមួយកីឡាករ ចាន់ រតនា ដើម្បីជួយគាំទ្រដល់ពលរដ្ឋនៅក្នុងសហគមន៍ឲ្យទទួលបាននូវការបណ្តុះបណ្តាលវិធីការពារខ្លួន និងការហាត់រៀនក្បាច់គុនដោយឥតគិតថ្លៃ នៅតាមបណ្តាក្លិបហាត់ប្រាណ ដែលជាដៃគូរបស់ក្រុមហ៊ុនសែលកាត នៅទូទាំងប្រទេសកម្ពុជា ផងដែរ។
ជើងខ្លាំង ចាន់ រតនា ដែលជាកីឡាករឆ្នើមម្នាក់របស់ ONE បាននិយាយថា៖ «ខ្ញុំពិតជាមានកិត្តិយសខ្លាំងណាស់ ដែលមានឱកាសបានចូលរួមនៅក្នុងយុទ្ធនាការនាំយកក្បាច់គុនចម្រុះ មកបង្ហាត់បង្ហាញនៅក្នុងប្រទេសកម្ពុជា។
ក្នុងនាមជាកីឡាករជើងឯកម្នាក់របស់ ONE ខ្ញុំមានកាតព្វកិច្ចក្នុងការបង្ហាញជូនអ្នកគាំទ្រទាំងអស់នៅក្នុងប្រទេស ដែលជាទឹកដីកំណើតរបស់ខ្ញុំមួយនេះ នូវគុណតម្លៃពិតប្រាកដនៃការហាត់ក្បាច់គុន និងអំពីវិធីដែលយើងអាចកែប្រែជីវិតរបស់យើងឲ្យកាន់តែប្រសើរ តាមរយៈការអនុវត្តទៅតាមគោលការណ៍នៃការហាត់ក្បាច់គុននេះ»។
អ្នកប្រយុទ្ធមានជំនាញច្រើនប្រភេទកីឡារូបនេះ ចាន់ រតនា បានបន្ថែមថា៖ «ការទទួលបានងារជាទូតសុច្ឆន្ទៈផ្លូវការរបស់សែលកាត គឺជាកិត្តិយសដ៏ធំធេងមួយសម្រាប់រូបខ្ញុំ ហើយខ្ញុំពិតជាមានក្តីរំភើបជាខ្លាំង ដែលទទួលបានឱកាស ដើម្បីចែករំលែកនូវដំណើរជីវិតនៃការហាត់រៀនក្បាច់គុន និងវិធីការពារខ្លួនជូនដល់អ្នកគាំទ្រទាំងអស់នៅទូទាំងប្រទេសកម្ពុជា»៕