.jpg)
កីឡាករវ័យក្មេងរបស់ថៃ Op Sai មកជម្រះបញ្ជីជាមួយ យុគ យក្សផ្លែ។ រូប សហការី
ភ្នំពេញៈ ការប្រកួតពានរង្វាន់ TV5 Boxing Knock-Out Serie (K-Cement) បានឈានដល់វគ្គជម្រុះចុងក្រោយនៃជុំទី ១ នៅសង្វៀនប៉ុស្តិ៍លេខ ៥ នាថ្ងៃសៅរ៍ ខណៈគូឯកអន្តរជាតិអមកម្មវិធី ដើម្បីឲ្យអ្នកទស្សនាជក់ចិត្តប្រចាំសប្តាហ៍បានផ្តល់ឱកាសឲ្យកីឡាករថៃ Op Sai សងសឹកជាមួយ យុគ យក្សផ្លែ។
នៅជុំទី ១ ដែលមានការប្រកួតជម្រុះរវាងកីឡាករ ៣២ នាក់នោះ គឺបានប្រកួត ៧ សប្តាហ៍ហើយ និងបានរកឃើញអ្នកឈ្នះឡើងទៅវគ្គទី ២ ចំនួន ១៤ នាក់រួចហើយដោយនៅខ្វះតែ ២ នាក់ទៀតប៉ុណ្ណោះ។ ចំណែកនៅសប្តាហ៍នេះ កីឡាករជើងថ្មី ញឹម សារិទ្ធ របស់ក្លិបអរុណរះកីឡាត្រូវជួបជើងថ្មី គិន ខ្លឹម ក្លិបទ័ពឆត្រយោង ៩១១ ហើយ ម៉ាក់ សាមុត ក្លិបតាឡីដំរីមានរិទ្ធ ត្រូវប៉ះ លីន វណ្ណៈ របស់ក្លិបបូរីរាជសីហ៍មានរិទ្ធ។
អ្នកឈ្នះនៅក្នុងការប្រកួតនេះនឹងទទួលបានឱកាសឡើងទៅវគ្គទី ២ ឬវគ្គ ១៦ នាក់ចុងក្រោយ ប៉ុន្តែកម្រិតសមត្ថភាពកីឡាករជើងថ្មីទាំង ៤ នេះ បើទោះបីជាអ្នកណាឈ្នះ គឺគ្រាន់តែជាការឡើងទៅកំដរកីឡាករជើងចាស់មួយចំនួននៅក្នុងវគ្គ ១៦ នាក់ចុងក្រោយនេះមាន ម៉ន ភិរម្យ, ចាន់ សាន់, ឡុង លាងសៅ, គឿម សុវណ្ណឌឿត, ខេម ចាន់, ឬទ្ធិ សាស្ត្រាវុទ្ធ, សូត្រ វាសនា, អេភូថង អេអាំងម៉ារិន្ទ, ជី ឆៃលី, សេក សារ៉ាន់ និង លី តក់ ជាដើម។
ជាមួយគ្នានេះគណៈកម្មការផ្គូផ្គងប្រចាំសង្វៀនបានដាក់ឲ្យគូមិត្តភាពអន្តរជាតិកម្ពុជាថៃ Op Sai ឡើងសង្វៀន ដើម្បីសងសឹកកីឡាករ យុគ យក្សផ្លែ ព្រោះតាមប្រវត្តិជួបគ្នាចំនួន ២ លើកកន្លងមក គឺ យក្សផ្លែ បានឈ្នះទាំង ២ លើក តែកីឡាករថៃរូបនេះនៅមិនទាន់អស់ចិត្ត ទើបសុំឡើងប្រកួតសងសឹកម្តងទៀត។
ប្រភពពីគណៈកម្មការផ្គូផ្គងឲ្យដឹងថា កីឡាករ Op Sai ថៃរូបនេះធ្លាប់ប្រកួតបានចំនួន ៦១ ដង ឈ្នះ ៥២ និងចាញ់ ៩ ដង ចំណែកកីឡាករ យុគ យក្សផ្លែ មានបទពិសោធប្រកួតបានចំនួន ១៦៣ ដង ឈ្នះ ១៣៣ ចាញ់ ២៦ និងស្មើ ៤ ដង។
បន្ទាប់ពីផ្លាស់មកនៅក្នុងក្លិបបុរីរាជសីហ៍មានរិទ្ធមក កីឡាករ យក្សផ្លែ វ៉ៃបានល្អ និងមានឱកាសបានឡើងប្រកួតជាគូអន្តរជាតិញឹកញាប់ផងដែរ។ លោក ឡុង ស៊ីលីន គ្រូបង្វឹករបស់ យុគ យក្សផ្លែ បាននិយាយថា៖ «មួយរយៈនេះ យក្សផ្លែ ប្រកួតទទួលបានលទ្ធផលល្អ ដោយសារព្យាយាមហ្វឹកហាត់បានខ្ជាប់ខ្ជួន»។
សម្រាប់ជំនួបប្រកួតលើកនេះលោក ឡុង ស៊ីលីន បានសង្ឃឹមខ្ពស់ថា យក្សផ្លែ នៅតែអាចរក្សាការពារជ័យជម្នះបាន ១០០ ភាគរយ ប៉ុន្តែមានលក្ខណៈលំបាកតឹងតែងខ្លះដែរ ព្រោះកីឡាករថៃរូបនេះល្អជង្គង់ និងស្នៀតទាត់ ហេតុនេះបើការប្រកួតនេះអូសបន្លាយពេលរហូតដល់ ៥ ទឹកគឺ យក្សផ្លែ អាចចាញ់កម្លាំង ឬក្បាច់ឱបឡើងជង្គង់នេះ។
ចំណែកលោក ថៃ អ៊ូ អ្នកនាំកីឡាករថៃមកប្រកួតបាននិយាយថា៖ «គូនេះគឺ កីឡាករថៃធ្លាប់ចាញ់ យក្សផ្លែ ចំនួន ២ ដងហើយ ប៉ុន្តែវាមិនអស់ចិត្ត។ ការសុំសងសឹកនេះគឺវាហ្វឹកហាត់បានល្អ ហើយលទ្ធផលប្រកួតមិនអាចទស្សន៍ទាយមុនបានទេ ព្រោះកីឡាករ Op Sai រូបនេះល្អជង្គង់ ហេតុនេះបើគេគេចផុតពីកណ្តាប់ដៃ យក្សផ្លែ គឺអាចមានឱកាសឈ្នះច្រើន»៕
