The Phnom Penh Post Search

Search form




Logo of Phnom Penh Post newspaper Phnom Penh Post - Osaka ប្រឹងប្រែង​រហូត​ក្លាយ​ជា​ជើងឯក Grand Slam ៤ សម័យកាល​យ៉ាង​ឆាប់




Osaka ប្រឹងប្រែង​រហូត​ក្លាយ​ជា​ជើងឯក Grand Slam ៤ សម័យកាល​យ៉ាង​ឆាប់

Content image - Phnom Penh Post
Osaka កាន់​ពាន​រង្វាន់បង្ហាញ​ជាមួយ​ស្នាមញញឹម ក្រោយ​ដណ្ដើម​បាន។ AFP

Osaka ប្រឹងប្រែង​រហូត​ក្លាយ​ជា​ជើងឯក Grand Slam ៤ សម័យកាល​យ៉ាង​ឆាប់

ក្រុង​មែលប៊ន៖ កីឡាការិនី​វាយ​កូន​បាល់ (តិន្នីស) អាជីព Naomi Osaka ធ្វើ​ការ​ប្រកួតប្រជែង​រហូត​ឈ្នះ​ជើងឯក​ពាន Grand Slam លើក​ទី៤ យ៉ាង​ឆាប់​រហ័ស​ទាំង​មិន​គួរ​ឱ្យ​ជឿ បន្ទាប់​ពី​យក​ជ័យ​ជម្នះ​លើ​កីឡាការិនី​អាមេរិក Jennifer Brady ក្នុង​លទ្ធផល ៦-៤ និង ៦-៣ អំឡុង​ការ​ប្រកួត​វគ្គ​ផ្ដាច់ព្រ័ត្រ កម្មវិធី Australian Open នៅ​ប្រទេស​អូស្ត្រាលី កាល​ពី​ថ្ងៃ​សៅរ៍។

ការ​មាន​សតិអារម្មណ៍​នឹង​ធឹង និង​ភាព​ប្រាកដប្រជា​ប្រកប​ដោយ​ភាព​ថ្លៃថ្នូរ​របស់ Osaka វ័យ ២៣ ឆ្នាំ ទាំង​នៅ​ក្នុង និង​ក្រៅ​ទីលាន ជួយ​ជំរុញ​នាង​ឱ្យ​មាន​កម្រិត​ក្បែរៗ​នឹង​កីឡាការិនី Serena Williams ក្នុង​នាម​ជា​អត្តពលិក​ស្រី​ដ៏​មាន​កេរ្តិ៍ឈ្មោះ​បំផុត នៅ​លើ​ផែនដី​នេះ។

ជាមួយ​គ្នា​នេះ អាកប្បកិរិយា​សុភាពរាបសា​ដែល​តែង​មាន​ជានិច្ច នៅ​ក្រៅ​ទីលាន​ប្រកួត​ដោយ​គួប​ផ្សំ​ជាមួយ​ការ​គ្រប់គ្រង​អារម្មណ៍​បាន​ល្អ នៅ​គ្រប់​ការ​ប្រកួត​បាន​ធ្វើ​ឱ្យ​នាង​លេចធ្លោ​កាន់​តែ​ខ្លាំង។

រឿង ១ ទៀត ដែល​គួរ​ឱ្យ​កត់​សម្គាល់ នោះ​គឺ Osaka តែង​និយាយ​យ៉ាង​ឱន​លំទោន ដើម្បី​ផ្ដល់​ក្ដី​គោរព​ដល់​គូប្រកួត​របស់​នាង ក្នុង​នោះ​ក៏​មាន Williams ផង​ដែរ បន្ទាប់​ពី​នាង​បាន​ទម្លាក់​អាយដល (និមិត្តរូប) របស់​ខ្លួន ដែល​ជា​ម្ចាស់​ជើងឯក Grand Slam ២៣ សម័យកាល ក្នុង​វគ្គ ៤ នាក់​ចុងក្រោយ។

Osaka នឹង​ឡើង​ទៅ​ដល់​ចំណាត់​ថ្នាក់​លេខ ២ ពិភពលោក ពេល​ការ​ចាត់​ចំណាត់​ថ្នាក់​ថ្មី ត្រូវ​បាន​បញ្ចេញ​នៅ​សប្ដាហ៍​ក្រោយ បន្ទាប់​ពី​បញ្ចប់​យុទ្ធនាការ​នេះ​ដោយ​រលូន ហើយ​វា​នឹង​ជំរុញ​ឱ្យ​មាន​ការ​ជឿជាក់​កាន់​តែ​ខ្លាំង​ឡើង​ថា កីឡាការិនី ដែល​មាន​សញ្ជាតិ ២ ជប៉ុន-អាមេរិក នឹង​ឡើង​មក​កាន់​តំណែង​ជា​ស្ដេច​ស្រី​របស់​កីឡា​តិន្នីស។

វា​ខុស​ពី​ឆ្នាំ​មុន​ឆ្ងាយ ពេល Osaka មាន​អារម្មណ៍​ខក​ចិត្ត ព្រោះ​ការ​ការពារ​ជើងឯក​កម្មវិធី Australian Open របស់​នាង ត្រូវ​បាន​បំផ្លាញ​យ៉ាង​គួរ​ភ្ញាក់​ផ្អើល ដោយសារ​តែ​ប្រកួត​ចាញ់​គូប្រជែង​វ័យ​ទើប ១៥ ឆ្នាំ Coco Gauff ក្នុង​ជុំ​ទី៣។

«នាង​មើល​ទៅ​អន្ទះអន្ទែង ពោល​គឺ​នាង​ដាក់​សម្ពាធ​ខ្លួន​ឯង។ មើល​ទៅ​នាង​ពិត​ជា​មាន​អារម្មណ៍​បែប​ហ្នឹង គ្រាន់តែ​នាង​មិន​បញ្ចេញ​ឱ្យ​ឃើញ»។ នេះ​ជាស​ម្ដី​គ្រូបង្វឹក​របស់​នាង លោក Wim Fissette ដែល​និយាយ​ដល់​ការ​ធ្លាក់​របស់​នាង​នៅ​ពេល​នោះ។

ក្រោយ​ឈ្នះ​ពានរង្វាន់​ដ៏​ធំ​ប្រចាំ​ឆ្នាំនេះ កីឡាការិនី Osaka បាន​និយាយ​នៅ​ក្នុង​កិច្ច​សម្ភាសន៍​ថា៖ «ខ្ញុំ​មិន​រំពឹង​ឈ្នះ​គ្រប់​ការ​ប្រកួត​ទេ នៅ​ឆ្នាំ​នេះ។ អ្នក​ខ្លះ​អាច​នឹង​ឱ្យ​មេដាយ​មក​ខ្ញុំ ប្រសិន​បើ​ខ្ញុំ​ឈ្នះ​គ្រប់​ប្រកួត​ឆ្នាំ​នេះ តែ​ខ្ញុំ​មិន​គិត​ថា វា​អាច​ទៅ​រួច​នោះ​ឡើយ»។

ជាមួយ​គ្នា​នេះ នាង​បាន​រំឭក​ដល់​កាល​នាង​ធ្លាក់​ពី​ឆ្នាំ​មុន​ថា៖ «ខ្ញុំ​នៅ​ចាំ​បាន​យ៉ាង​ច្បាស់​នូវ​អ្វី ដែល​ជា​អារម្មណ៍​នៃ​ការ​ចាញ់​ការ​ប្រកួត។ ខ្ញុំ​ចាំ​បាន​វា​កើត​ឡើង នៅ​ទីនេះ ហើយ​ខ្ញុំ​ចាំ​ថា តើ​កំពុង​មាន​អារម្មណ៍​យ៉ាង​ម៉េច ហើយ​ថា តើ​អ្វី​ដែល​កំពុង​នៅ​ក្នុង​គំនិត​របស់ខ្ញុំ»។

ពាន​រង្វាន់ Grand Slam ទាំង ៤ របស់ Osaka រួម​មាន Australian Open ២ ដង (២០១៩ និង ២០២១) និង US Open ២ ដង (២០១៨ និង ២០២០)៕ AFP/VN

អត្ថបទគួរចាប់អារម្មណ៍