ក្រុងឡុងដ៍៖ ក្លិប Liverpool បានឆ្លងផុតពីដំណាក់កាលគ្រោះថ្នាក់នៃក្របខ័ណ្ឌ Champions League ពីថ្ងៃអង្គារ ក្រោយពីកីឡាករ Alex Oxlade-Chamberlain បានជួយឲ្យពួកគេឈ្នះ ២-១ ទៅលើក្រុម Genk ដើម្បីឈរនៅលើកំពូលតារាងនៃពូល E។
កីឡាករ Oxlade-Chamberlain រកបានគ្រាប់បាល់ទី ២ នៅនាទីទី ៥៣ សម្រាប់ក្រុម Liverpool ក្រោយពីកីឡាករ Mbwana Samatta រកបាន ១ គ្រាប់ សម្រាប់ក្រុម Genk នៅនាទីទី ៤១ ដើម្បីលុបគ្រាប់បើកឆាករបស់កីឡាករ Georginio Wijnaldum ក្នុងនាទីទី ១៤។
លោក Jurgen Klopp បានប្រាប់ BT Sport ថា៖ «យើងមិនបានបញ្ចប់ស្ថានភាពរបស់យើងដូចយើងអាចធ្វើបាននោះទេ។ យើងមានឱកាសច្រើនដូចពេលធម្មតា ប៉ុន្តែយើងមិនធ្វើបែបនោះទេ គឺយើងទុកឲ្យការប្រកួតនេះបើកចំហ»។
គ្រូបង្វឹករូបនេះបានបន្ថែមថា៖ «ប្រសិនបើអ្នករកបានតែ ១ គ្រាប់ ហើយពួកគេរកបាន ១ គ្រាប់ដែរ ពេលនោះយើងនឹងខំប្រឹងកាន់តែខ្លាំង។ ការប្រកួតចាប់ផ្តើមជាថ្មីនៅតង់ទី ២ ពិតជាល្អណាស់ ប៉ុន្តែផែនការ គឺចង់ឈ្នះការប្រកួត ហើយយើងធ្វើបានសម្រេច»។
ជ័យជម្នះនេះបានធ្វើឲ្យក្រុម Liverpool មាន ១ ពិន្ទុនាំមុខក្រុម Napoli ដែលអាចត្រឹមស្មើគ្នា ១-១ ជាមួយក្រុម Salzburg ដែលឈរនៅលេខ ៣ នៅ មុនពេលក្រុម Liverpool ជួប ជាមួយក្រុម Napoli ក្នុងទឹកដីក្លិប Liverpool នៅខែនេះ។
ក្រុម Liverpool ក៏បាននាំមុខក្រុម Salzburg ៥ ពិន្ទុផងដែរ ហើយពួកគេនឹងប្រកួតជាមួយគ្នានៅពេលខាងនេះផងដែរ។
ការប្រកួតរវាងក្រុម Liverpool និងក្លិប Napoli គឺជាការប្រកួតអស្ចារ្យមួយ ខណៈក្លិបអ៊ីតាលីកំពុងជួបបញ្ហានៅក្របខ័ណ្ឌ Serie A ដោយសារឈ្នះតែ ១ ប្រកួត ក្នុង ៥ ប្រកួត ចំណែកក្រុមហង្សក្រហមមានកំណត់ត្រាមិនធ្លាប់ចាញ់ក្នុងទឹកដីខ្លួនឯងតាំងពីចាញ់ក្រុម Real Madrid កាលពី ៥ ឆ្នាំមុន។
ទន្ទឹមនេះដែរ ក្លិប Salzburg បានរារាំងក្លិប Napoli មិនឲ្យក្លាយជាក្រុមទី ២ ដែលបានឡើងទៅលេងនៅក្របខ័ណ្ឌ Champions League នៅវគ្គ ១៦ ពីថ្ងៃអង្គារ ខណៈក្លិបអ៊ីតាលីនេះបានប្រកួតស្មើគ្នា ១-១ នៅទីក្រុង Naples ប្រទេស អ៊ីតាលី។
ខ្សែប្រយុទ្ធវ័យក្មេងន័រវែស Erling Haaland រកបាន ១ គ្រាប់ ជួយឲ្យក្លិបអូទ្រីសមួយនេះនាំមុខនៅនាទីទី ១១ នៅមុនពេលកីឡាករម៉ិកស៊ិក Hirving Lozano រកបាន ១ គ្រាប់វិញ ដើម្បីតាមស្មើនៅមុនពេលបញ្ចប់ដោយគ្រាប់បាល់ដំបូងរបស់គេនៅកីឡដ្ឋាន San Paolo។
ក្រុម Napoli នៅតែស្ថិតនៅលើផ្លូវឡើងទៅវគ្គបន្ត ដោយសារពួកគេកំពុងឈរនៅលេខ ២ មាន ៨ ពិន្ទុ គឺនាំមុខ ៤ ពិន្ទុទៅលើក្រុម Salzburg ខណៈក្រុមបែលហ្ស៊ិក Genk មាន ១ ពិន្ទុ ក្នុង ៤ ប្រកួតដូចគ្នា។
ប្រធានក្រុម Lorenzo Insigne នៃក្លិប Napoli បាននិយាយថា៖ «វាជាពេលវេលាគ្មានសំណាងសោះសម្រាប់យើង ព្រោះយើងបានព្យាយាមគ្រប់គ្រាន់ហើយ។ វាជាទម្រង់លេងល្អមួយ ប៉ុន្តែយើងនៅតែមិនអាចរកបានគ្រាប់បាល់ថែមទៀតដដែល»។
ប្រធានក្រុមរូបនេះបានបន្ថែមថា៖ «យើងត្រូវរង់ចាំ និងបន្តលេងទៀត។ ប្រសិនបើយើងលេងដូចរាត្រីនេះ មិនយូរទេជ័យជម្នះនឹងវិលមកវិញ»៕ AFP/SN