.jpg)
Oxlade (ឆ្វេង) គ្រប់គ្រងបាល់ក្នុងការប្រកួតលីកអង់គ្លេស កាលពីថ្ងៃទី ៣០ ខែវិច្ឆិកា។ រូបថត AFP
ក្រុងឡុងដ៍៖ ខ្សែបម្រើ Alex Oxlade-Chamberlain ជឿថា ផ្នត់គំនិតរបស់ក្រុម Liverpool គឺសំខាន់ខ្លាំងណាស់ចំពោះការមានប្រៀបទៅលើក្របខ័ណ្ឌ Premier League រហូតមកដល់រដូវកាលនេះ។
ក្រុម Liverpool របស់លោក Jurgen Klopp បាននាំមុខគេដាច់ ៨ ពិន្ទុ ឈរនៅលើកំពូលតារាងតាមរយៈការប្រកួត ១៤ លើក ក្នុងនោះបានឈ្នះ ១៣ លើក និងស្មើ ១ លើក ក្នុងក្របខ័ណ្ឌ Premier League។
ខ្សែបម្រើ Oxlade-Chamberlain អាយុ ២៦ ឆ្នាំ បាននិយាយថា ជំនឿចិត្តរបស់ក្រុម Liverpool បានធ្វើឲ្យអ្វីៗកាន់តែងាយស្រួល ខណៈពួកគេកំពុងត្រៀមខ្លួនប្រកួតនៅកីឡដ្ឋាន Anfield ជាមួយក្លិប Everton នៅថ្ងៃពុធនេះ។
ខ្សែបម្រើរូបនេះបានប្រាប់ប្រព័ន្ធផ្សព្វផ្សាយអង់គ្លេសតាមរយៈតេឡេក្រាមថា៖ «ផ្នត់គំនិតដែលយើងមាននៅពេលយើងដើរចូលទីលានប្រកួតនោះ គឺថា យើងនឹងប្រកួតយកឈ្នះឲ្យខាងតែបាន ហើយខ្ញុំគិតថា នោះគឺជាអ្វីដែលយើងមានក្នុងចិត្តទាំងអស់គ្នា»។
ខ្សែបម្រើ Oxlade បានបន្ថែមទៀតថា៖ «យើងនឹងចូលរួមការប្រកួតដោយរំពឹងថានឹងយកឈ្នះ និងទទួលបានអ្វីផ្សេងទៀតដែលយើងបានខកចិត្តកន្លងមក»។
ខ្សែបម្រើរូបនេះបានបន្ថែមទៀតថា៖ «មានពេលខ្លះនៅក្នុងអាជីពរបស់ខ្ញុំ គឺខ្ញុំពិតជាមិនបានចូលលេងក្នុងការប្រកួតទាំងអស់ដោយជឿជាក់ ១០០ ភាគរយថា ក្រុមនេះនឹងទទួលបានជ័យជម្នះនៅក្រៅទឹកដីនោះ ប៉ុន្តែជាមួយនឹងក្រុមនេះខ្ញុំតែងតែមានជំនឿចិត្តចំពោះពួកយើងជានិច្ច»។
ខ្សែបម្រើដដែលនេះបានបន្តទៀតថា៖ «ប្រសិនបើយើងកំពុងលេងក្នុងការប្រកួតមួយដែលយើងគ្មានឆន្ទៈក្នុងចិត្តនោះ ជាការពិតជ័យជម្នះប្រហែលជាមិនកើតឡើងគ្រប់ពេលនោះទេ ប៉ុន្តែនៅពេលដែលអ្នកចូលលេងជាមួយផ្នត់គំនិត និងជំនឿចិត្តនោះ វានឹងធ្វើឲ្យយើងងាយស្រួល និងបានជោគជ័យ»៕ AFP/SN
