ក្រុងប៊ែរឡាំង: ក្លិបកំពុងជួបវិបត្តិ Schalke របស់ក្របខ័ណ្ឌ Bundesliga អាល្លឺម៉ង់ មានពិន្ទុនឹងគេហើយសម្រាប់រដូវកាលនេះ ក្រោយកីឡាករ Goncalo Paciencia ធ្វើបានសម្រេច ១ គ្រាប់ នៅវគ្គទី ២ ជួយក្រុមម្ចាស់ផ្ទះស្មើ ១-១ ជាមួយក្រុម Union Berlin អំឡុងការប្រកួត កាលពីថ្ងៃអាទិត្យម្សិលមិញ។
ការតែតរបស់ខ្សែប្រយុទ្ធសញ្ជាតិព័រទុយហ្គាល់ នៅនាទីទី៦៩ បានបញ្ចប់នូវការចេញដំណើរដ៏អាក្រក់ នារដូវកាលនេះ របស់ក្រុម Schalke ដែលចាប់ផ្ដើមដោយគ្មានសូម្បី ១ ពិន្ទុ និងគ្រាប់បាល់ ១ គ្រាប់ សម្រាប់ការប្រកួត ៣ លើកដំបូងរបស់ខ្លួន។
ក្រោយត្រូវក្រុមភ្ញៀវនាំមុខ នៅនាទីទី៥៥ ដែលស៊ុតបញ្ចូលទី ដោយ Marvin Friedrich គ្រូបង្វឹករបស់ Schalke លោក Manuel Baum ដែលចូលមកជំនួស លោក David Wagner កាលពីខែមុន បានឆ្លើយតបដោយដាក់ Paciencia ជំនួស Vedad Ibisevic នៅ ១ នាទីបន្ទាប់ ហើយជាលទ្ធផល នៅ ២០ នាទីក្រោយ កីឡាករវ័យ ២៦ ឆ្នាំ ក៏ទម្លុះសំណាញ់ទីដោយក្បាលជួយឱ្យក្រុមតាមស្មើវិញ។
លទ្ធផលស្មើនេះ បានជួយរុញក្រុម Schalke ឱ្យឡើងផុតពីបាតតារាង ១ លេខ ហើយជួយក្រុមលោក Baum ជួបនូវភាពប្រសើរឡើងវិញបន្តិចមុននឹងជួបក្រុមគូប្រជែង Borussia Dortmund នៅសប្ដាហ៍ក្រោយ។
តែយ៉ាងណា អតីតម្ចាស់ជើងឯកលីគកំពូលអាល្លឺម៉ង់ ៧ សម័យកាលនេះ នៅមិនទាន់ស្គាល់ជ័យជម្នះនៅឡើយទេ ក្នុងចំណោមការប្រកួត ២០ លើកចុងក្រោយ គិតតាំងពីខែមករាមក៕ AFP/VN