.jpg)
កីឡាករប្រដាល់ Manny Pacquiao មិនចង់ឲ្យកូនប្រុសដើរតាមជំហានរបស់ខ្លួន។ AFP
ក្រុងម៉ានីល: វីរបុរសប្រដាល់ជើងចាស់របស់ហ្វីលីពីន Manny Pacquiao បានបញ្ជាក់កាលពីថ្ងៃពុធម្សិលមិញថា រូបគេបានជំរុញកូនប្រុសច្បងរបស់ខ្លួនឲ្យចេញឆ្ងាយពីសង្វៀន ក្រោយពីការបោះជំហានចូលភ្លាមៗរបស់យុវជនវ័យ ១៩ ឆ្នាំរូបនេះក្នុងកីឡាប្រយុទ្ធបានធ្វើឲ្យម្តាយរបស់គេទួញសោក។
Pacquiao ដែលជាកីឡាករប្រដាល់តែម្នាក់ក្នុងការឈ្នះខ្សែក្រវាត់ពិភពលោកក្នុងប្រភេទទម្ងន់ ៨ ផ្សេងគ្នានោះបាននិយាយថា រូបគេ និងភរិយារបស់គេបានសម្រេចចិត្តមិនឲ្យមានហ្គង់ និងសម្ភារកីឡាប្រដាល់នៅក្នុងផ្ទះឡើយ។
កីឡាករប្រដាល់រូបនេះដែលមានភាពល្បីល្បាញលើការមានដំណើរជីវិតចេញពីក្មេងរើសសំរាមតាមដងផ្លូវដើម្បីក្លាយជាអ្នកមានទ្រព្យម្នាក់នោះបានព្យាយាមជំរុញឲ្យកូនប្រុសរបស់ខ្លួនគឺ Emmanuel Jr ដែលត្រូវបានគេហៅថា Jimuel ឲ្យជ្រើសរើសផ្លូវដើរផ្សេង។
កីឡាករប្រដាល់ Pacquiao បានប្រាប់ទូរទស្សន៍ ABS-CBN ថា៖ «ខ្ញុំពិតជាឈឺចាប់ដែលរូបគេប្រកួតប្រដាល់ ពីព្រោះខ្ញុំដឹងពីផលវិបាករបស់កីឡានេះ។ ខ្ញុំបានប្រាប់កូនខ្ញុំថា «ប៉ាបានប្រកួតប្រដាល់ ដោយសារតែភាពក្រីក្រចំពោះកូនវិញមិនចាំបាច់ត្រូវតែប្រកួតប្រដាល់ឡើយ»។
Pacquiao បានប្រាប់បន្តថា៖ «ប៉ុន្តែរូបគេបាននិយាយថា «ប៉ា កូនក៏ស្រឡាញ់កីឡាប្រដាល់ដូចប៉ាដែរ។ ខ្ញុំចង់ប្រកួតតំណាងឲ្យប្រទេសនេះក្នុងនាមជាអត្តពលិកម្នាក់»។
កីឡាករជើងចាស់រូបនេះបានលើកឡើងបែបនេះ ក្រោយពីរូបភាពវីដេអូមួយរបស់ Jimuel ក្នុងពេលកំពុងធ្វើចលនាអំឡុងពេលនៃការប្រកួតបែបកម្សាន្តមួយត្រូវបានបង្ហោះនៅលើបណ្តាញសង្គម Facebook។
ទាក់ទងនឹងភរិយារបស់ខ្លួនគឺអ្នកស្រី Jinkee ដែលក៏បានជំរុញឲ្យកីឡាករវ័យ ៤០ ឆ្នាំរូបនេះចូលនិវត្តន៍ដែរនោះ Pacquiao បានឲ្យដឹងថា៖ «ម្តាយរបស់គេ បានទួញសោកជាច្រើនលើកក្រោយពីប្រាប់រូបគេថា កុំទៅប្រកួតប្រដាល់អីកូន។ ប៉ុន្តែរូបគេពិតជាចង់ប្រកួតណាស់»។
កូនប្រុសរបស់ Pacquiao មិនមែនជាកូនប្រុសដំបូងគេរបស់កីឡាករប្រដាល់ល្បីល្បាញម្នាក់ក្នុងការដើរតាមជំហានឪពុករបស់ខ្លួនឡើយ។
កូនប្រុសរបស់អតីតកីឡាករប្រដាល់ចក្រភពអង់គ្លេស Nigel Benn និង Chris Eubank ក៏ដូចជាកីឡាករអាមេរិក Joe Frazier សុទ្ធសឹងបានក្លាយជាកីឡាករប្រដាល់។
ទំព័រ Facebook បង្ហាញពីសកម្មភាពនៃកូនប្រុសរបស់ Pacquiao ដែលបានវាយឲ្យគូប្រកួតរបស់គេដួលនៅលើសង្វៀននោះ ប្រើចលនាប្រកួតដូចជាឪពុករបស់គេអ៊ីចឹង។
Jimuel បានពាក់ហ្គង់ និងប្រដាប់ការពារធ្មេញដែលមានសរសេរអក្សរថា «Pacman» ដែលជារហស្សនាមឪពុករបស់គេ។ Pacquiao បានទស្សនាការប្រកួតនោះតាមរយៈការវីដេអូមួយ និងត្រូវបានគេឃើញថាបាននិយាយទៅកាន់កូនប្រុសរបស់ខ្លួននៅមុនពេលការប្រកួតចាប់ផ្តើម៕ IS
