ក្រុងឡាសវ៉េហ្គាស: កីឡាករប្រដាល់ Manny Pacquiao បានបង្ហាញថា អាយុមិនមែនជាឧបសគ្គឡើយកាលពីថ្ងៃសៅរ៍ (ត្រូវនឹងព្រឹកថ្ងៃអាទិត្យ នៅកម្ពុជា) តាមរយៈការយកឈ្នះក្នុងការប្រកួត ១២ ទឹកពេញលើកីឡាករ Adrien Broner ដើម្បីការពារខ្សែក្រវាត់ក្នុងទម្ងន់ ៦៦,៧ គីឡូក្រាមក្នុងការប្រកួតជាលើកទី ១ របស់គេនៅលើទឹកដីអាមេរិកក្នុងរយៈពេល ២ ឆ្នាំ។
Pacquiao បានឈ្នះដោយឈ្នះជាមួយនឹងការបង្ហាញស្នៀតប្រកួតដ៏គួរឲ្យចាប់អារម្មណ៍ ខណៈការប្រើល្បឿនកណ្តាប់ដៃយ៉ាងរហ័ស និងមានថាមពលបានជួយឲ្យរូបគេឈ្នះដោយពិន្ទុជាឯកច្ឆន្ទលើកីឡាករវ័យក្មេងរបស់អាមេរិក នៅលើសង្វៀន MGM Grand Hotel ក្នុងទីក្រុង Las Vegas។
តារាប្រដាល់ដ៏ឆ្នើមរបស់ហ្វីលីពីនរូបនេះស្ទើរតែបានវាយឲ្យ Broner ដួល ២ លើកទៅហើយនៅទឹកទី ៧ និងទឹកទី ៩ ហើយបានបង្ហាញថារូបគេនៅតែជាកីឡាករខ្លាំងម្នាក់ក្នុងកម្រិតទម្ងន់របស់គេ បើទោះបីឈានចូលវ័យ ៤០ ឆ្នាំកាលពីខែមុនក៏ដោយ។ ក្នុងការប្រកួតជាលើកទី ៧០ របស់គេក្នុងនាមជាកីឡាករអាជីព Pacquiao បានការពារខ្សែក្រវាត់ WBA ចំនួន ២ របស់គេយ៉ាងជោគជ័យ និងអាចបង្កើតឲ្យមានការប្រកួតសងសឹកមួយជាមួយនឹងកីឡាករ Floyd Mayweather ដែលបានទស្សនាការប្រកួតនេះនៅក្បែរសង្វៀន។
Pacquiao បានធ្វើឲ្យកំណត់ត្រាឈ្នះរបស់គេកើនដល់ ៦១ លើកចាញ់ ៧ លើក និងស្មើ ២ លើកក្នុងនោះផ្តួលដៃគូឲ្យសន្លប់ ៣៩ លើក ក្រោយពីបានឈ្នះពិន្ទុជាឯកច្ឆន្ទពីចៅក្រមទាំង ៣ ក្នុងនោះរាប់បញ្ចូលទាំងការឈ្នះពិន្ទុមួយក្នុងលទ្ធផល ១១៧-១១១ ផងដែរ។ ចៅក្រម ២ នាក់ផ្សេងទៀតបានផ្តល់ពិន្ទុឈ្នះដូចគ្នាគឺ ១១៦ ទល់នឹង ១១២។ កីឡាករជើងចាស់រូបនេះបានចាប់ផ្តើមការវាយសម្រុកដ៏ខ្លាំងរបស់ខ្លួននៅទឹកទី ៧ តាមរយៈការវាយគូប្រកួតដែលមានវ័យត្រឹម ២៩ ឆ្នាំរបស់គេចំគោលយ៉ាងល្អជាច្រើនដៃ។
Broner បានព្យាយាមការពារក្នុងពេលរងការវាយឲ្យសន្ធាប់ ប៉ុន្តែបានរក្សាលំនឹងរបស់ខ្លួនរហូតបញ្ចប់ទឹកទី ៧ នោះ។ កីឡាករ Pacquiao បានបញ្ចេញកណ្តាប់ដៃយ៉ាងល្អបំផុតរបស់គេនៅទឹកទី ៩ តាមរយៈការវាយចំថ្គាមខាងស្តាំ ដែលបានធ្វើឲ្យ Broner វង្វេងបន្តិចនៅក្បែរខ្សែរេញ។
ប៉ុន្តែ Broner បានបង្ហាញថារូបគេអាចទទួលរងនូវកណ្តាប់ដៃដ៏ធ្ងន់នោះបាន ខណៈដែលរូបគេបានរក្សាលំនឹងរបស់គេ ដើម្បីគេចផុតពីការសន្លប់ ១ ទឹកផ្សេងទៀត។
បច្ចុប្បន្ន Pacquiao កំពុងតែសង្ឃឹមថាអាចមានឱកាសសងសឹកការចាញ់កាលពីឆ្នាំ ២០១៥ របស់គេក្រោមស្នាដៃរបស់ May-weather ក្នុងការប្រកួតតែ ១ ថ្ងៃដែលផ្តល់ចំណូលច្រើនជាងគេបំផុតក្នុងប្រវត្តិសាស្ត្រកីឡាប្រដាល់៕ IS