.jpg)
Cilic វាយកូនបាល់ត្រឡប់ទៅគូប្រកួតវិញ អំឡុងប្រកួត កាលពីថ្ងៃចន្ទ។ AFP
ប៉ារីស៖ ការប្រកួតវាយកូនបាល់ (តិន្នីស) កម្មវិធី Paris Masters ចាប់ផ្ដើមដំណើរការហើយនៅទីលានដែលស្ទើរតែគ្មានអ្នកទស្សនាសោះ Bercy Arena កាលពីថ្ងៃចន្ទ ចំពេលបារាំងបិទប្រទេសជាលើកទី ២ ដើម្បីទប់ស្កាត់ការឆ្លងវីរុសកូរ៉ូណា ខណៈអតីតម្ចាស់ជើងឯក Karen Khachanov បានធ្លាក់ចេញពីកម្មវិធីត្រឹមជុំដំបូងនេះ។
កីឡាកររុស្ស៊ី Khachanov ដែលឈ្នះពាន ក្នុងឆ្នាំ ២០១៨ បានបរាជ័យក្រោមថ្វីដៃរបស់កីឡាករអេស្ប៉ាញ Alejandro Davidovich Fokina ក្នុងលទ្ធផល ២ សិតទល់នឹង ១ គឺ ៦-៣ ២-៦ និង ៦-២។
អ្នករៀបចំព្រឹត្តិការណ៍នេះ បានរំពឹងថា នឹងអាចទទួលទស្សនិកជនចំនួន ១ ០០០ នាក់ ក្នុង ១ ថ្ងៃ តែផ្ទុយទៅវិញ បែរជាត្រូវសងថ្លៃសំបុត្រទៅអ្នកទិញ ពេលប្រធានាធិបតីបារាំង លោក Emmanuel Macron បានប្រកាសថា នឹងបិទទ្វារប្រទេសជាថ្មីម្ដងទៀត កាលពីសប្ដាហ៍មុន។
ប្រាក់រង្វាន់ឆ្នាំនេះ ត្រូវបានបន្ថយមកត្រឹមជាង ២ លានអឺរ៉ូ ($២,៣៣ លាន) តិចជាងឆ្នាំមុន ពេលពាននេះជារបស់កីឡាករសញ្ជាតិស៊ែប៊ី Novak Djokovic ដែលអវត្តមាននៅលើកនេះ។
ម្នាក់ក្នុងចំណោមកីឡាករឆ្នើមផ្សេងទៀត គឺ Marin Cilic ទៅពីក្រូអាស៊ី ដែលជាម្ចាស់ពានលំដាប់ Grand Slam កម្មវិធី US Open 2014 បានធ្វើដំណើរទៅជុំទី២ ក្រោយឈ្នះកីឡាករវ័យក្មេងសញ្ជាតិកាណាដា Felix Auger-Aliassime ជាមួយនឹងពិន្ទុ ៦-០ ៣-៦ និង ៦-៣។
ទោះបានឆ្លងទៅជុំបន្ទាប់ ក៏Cilic នៅនិយាយថា៖ «ខ្ញុំនៅមិនទាន់ធ្វើបានល្អទេនារដូវកាលនេះ រដូវកាលមុនក៏ដូចគ្នា ប្រៀបនឹង ២-៣ ឆ្នាំចុងក្រោយមុនហ្នឹង។ ខ្ញុំចង់និយាយថា ការប្រកួតវាយកូនបាល់កម្រិតនេះ គឺពិតជាប្រសើរសម្រាប់ការផ្ដល់ទំនុកចិត្តឱ្យខ្ញុំ។ ខ្ញុំមានអារម្មណ៍ថា ការប្រកួតនេះ ពិតជាមានកម្រិតខ្ពស់ណាស់»។
ចំណែកឯកីឡាករចាស់វស្សាសញ្ជាតិអេស្ប៉ាញ Feliciano Lopez នឹងត្រូវជួបជាមួយមិត្តរួមជាតិ Rafael Nadal ដែលទើបលើកពាន Grand Slam នៅក្រុងប៉ារីសនេះ គឺ French Open ជាលើកទី១៣ ក្រោយពីមានជ័យជម្នះលើកីឡាករស៊ែប៊ី Filip Krajinovic ៧-៦ និង ៦-១។
ជាមួយគ្នានេះ Lopez បាននិយាយពីស្ថានការណ៍បច្ចុប្បន្នថា កីឡាករត្រូវទទួលស្គាល់ថា ព្រឹត្តិការណ៍ប្រកួតអាចនឹងមិនទាន់ត្រឡប់មករកភាពប្រក្រតីបានវិញទេ ក្នុងរយៈពេលច្រើនខែទៀត ដោយសារការផ្ទុះឡើងជាលើកទី២ នៃការឆ្លងវីរុស កំពុងកើតមានទូទាំងទ្វីបអឺរ៉ុប។
កីឡាករវ័យ ៣៩ ឆ្នាំ និយាយថា៖ «យើងត្រូវដឹងពីស្ថានភាពដែលពិភពលោកកំពុងតែជួបប្រទះ ហើយត្រូវដឹងថា តើម្នាក់ៗ កំពុងប្រឈមនឹងពេលដ៏លំបាកជុំវិញពិភពលោកយ៉ាងដូចម្ដេច។ ស្ថានការណ៍ពេលនេះ ខ្ញុំមិនរំពឹងប្រាក់រង្វាន់នោះទេ។ ខ្ញុំគិតថា វានឹងស្ថិតនៅក្នុងស្ថានភាពបែបនេះ មួយរយៈទៀត»៕ AFP/VN
