.jpg)
លោក Manuel Pellegrini ត្រូវបានតែងតាំងជាគ្រូបង្វឹកថ្មីរបស់ក្លិប West Ham។ AFP
ក្រុងឡុងដ៍: លោក Manuel Pellegrini បានសន្យាថា នឹងបង្កើតបដិវត្តន៍នៃទម្រង់លេងបែបវាយសម្រុកនៅឯក្លិប West Ham ក្រោយពីគ្រូបង្វឹកសញ្ជាតិស៊ីលីរូបនេះ ត្រូវបានតែងតាំងជាអ្នកចាត់ការទូទៅរបស់ក្លិបស្ថិតក្នុងក្របខ័ណ្ឌ Premier League មួយនេះ កាលពីថ្ងៃអង្គារ។
លោក Pellegrini អតីតគ្រូបង្វឹករបស់ក្រុម Manchester City បានចាកចេញពីតួនាទីរបស់លោកជាមួយនឹងក្លិប Hebei China Fortune កាលពីចុងសប្តាហ៍មុន និងបានធ្វើដំណើរទៅកាន់ទីក្រុងឡុងដ៍ ដើម្បីបំពេញការវិលត្រឡប់របស់លោកទៅកាន់ក្របខ័ណ្ឌកំពូលអង់គ្លេស ក្នុងកិច្ចសន្យារយៈពេល ៣ ឆ្នាំ។
ក្រុមញញួរធំបានជ្រើសរើសមិនរក្សាទុកលោក David Moyes ក្រោយពីកិច្ចសន្យារយៈពេលខ្លីរបស់លោកបានបញ្ចប់ ក្រោយពីការប្រកួតចុងក្រោយនៃក្របខ័ណ្ឌ Premier League រដូវកាលនេះ បើទោះបីគ្រូបង្វឹកសញ្ជាតិស្កុតឡេនរូបនេះ បានដឹកនាំឲ្យក្រុម West Ham គេចផុតពីតំបន់កាត់ចោល និងបញ្ចប់ក្នុងចំណាត់ថ្នាក់លេខ ១៣ នៅលើតារាងក៏ដោយ។
លោក Pellegrini បានដឹកនាំឲ្យក្រុម Man City ឈ្នះពានក្របខ័ណ្ឌ Premier League កាលពីឆ្នាំ ២០១៤ ឈានទៅវគ្គពាក់កណ្តាលផ្តាច់ព្រ័ត្រនៃក្របខ័ណ្ឌ Champions League និងក៏បានឈ្នះពាន League Cup ២ លើកផងដែរ អំឡុងពេលនៃការដឹកនាំរយៈពេល ៣ ឆ្នាំរបស់លោកក្នុងទីក្រុង Manchester។
ការឈ្នះពានជាមួយនឹងក្រុម West Ham អាចនឹងក្លាយជាសំណើដ៏យូរអង្វែងមួយ ប៉ុន្តែ គ្រូបង្វឹកវ័យ ៦៤ ឆ្នាំរូបនេះ បានកំណត់គោលដៅរបស់លោកទៅលើការបង្កើតក្រុមមានទម្រង់លេងដ៏រំភើប មានសមត្ថភាពផ្តល់ការរីករាយដល់អ្នកគាំទ្រ ដែលកំពុងតែខកចិត្តចំពោះភាពត្រដាបត្រដួសរបស់ក្លិបក្នុងរយៈពេលប៉ុន្មានឆ្នាំចុងក្រោយនេះ។
លោក Pellegrini បានឲ្យដឹងថា៖ «ខ្ញុំគិតថា West Ham បានជួបរដូវកាលដ៏លំបាកមួយកាលពីរដូវកាលមុន ហើយខ្ញុំសង្ឃឹមថា នៅរដូវក្រោយ យើងនឹងលេងកីឡាបាល់ទាត់ដែលនឹងផ្តល់ការរីករាយដល់អ្នកគាំទ្រ។ ខ្ញុំតែងតែលេងកីឡាបាល់ទាត់បែបវាយសម្រុក ហើយយើងត្រូវតែព្យាយាមឈានដល់គោលដៅដ៏សំខាន់ក្នុងរដូវកាលនេះ»។
ដោយខឹងសម្បាទៅលើការផ្លាស់ប្តូររបស់ក្លិប West Ham ពីកីឡដ្ឋានជាប្រវត្តិសាស្ត្រ Upton Park ទៅកាន់កីឡដ្ឋាន London កាលពី ២ ឆ្នាំមុន អ្នកគាំទ្រជាច្រើនបានធ្វើការតវ៉ាយ៉ាងខឹងសម្បាប្រឆាំងនឹងសហម្ចាស់ក្លិបលោក David Gold និងលោក David Sullivan អំឡុងពេលការរងបរាជ័យលើទឹកដីខ្លួនពេលប្រកួតជាមួយនឹងក្រុម Burnley តាមរយៈការរត់ចូលទីលានប្រកួត និងចោលកាំជ្រួចជាច្រើនទៅលើកន្លែងអង្គុយរបស់ប្រធានក្លិប។
លោក Pellegrini សង្ឃឹមថា លោកអាចបង្កើតឲ្យមានការសាមគ្គីក្នុងក្លិបនេះ តាមរយៈការទិញចូលកីឡាករថ្មីដែលអាចប្រតិបត្តិតាមទម្រង់លេងផ្នែកកីឡាបាល់ទាត់ដែលលោកចង់បាន។
លោក Pellegrini បានបញ្ជាក់ថា៖ «ខ្ញុំគិតថា West Ham គឺជាក្រុមដ៏ខ្លាំងមួយ។ ខ្ញុំស្គាល់រាល់កីឡាករទាំងអស់ ហើយខ្ញុំបានមើលការប្រកួតភាគច្រើនដែលពួកគេបានលេងកាលពីរដូវកាលមុន»៕
