ក្រុងឡុងដ៍៖ អ្នកចាត់ការក្រុមមេឃខៀវ Manchester City លោក Pep Guardiola (Pep) បានតែងតាំងលោក Juan Manuel Lillo ជាជំនួយការថ្មីរបស់ខ្លួន។ នេះបើតាមក្លិបនៅក្របខ័ណ្ឌ Premier League បានប្រាប់ឲ្យដឹងកាលពីថ្ងៃអង្គារ។
លោក Lillo ដែលបច្ចុប្បន្ន មានវ័យ ៥៤ ឆ្នាំ នឹងមកចាប់ផ្ដើមធ្វើតួនាទី ដែលនៅទំនេរ ក្រោយ Mikel Arteta បានចាកចេញទៅធ្វើជាគ្រូបង្វឹករបស់ក្រុមកាំភ្លើងធំ Arsenal ហើយបុរសសញ្ជាតិអេស្ប៉ាញរូបនេះ បានព្រមព្រៀងទទួលតំណែងនេះ ដោយសុខចិត្តដើរចេញពីក្រុម Qingdao Huanghai ដែលខ្លួនដឹកនាំឲ្យទទួលបានជោគជ័យ ដូចជាជួយក្រុមឲ្យឡើងមកក្របខ័ណ្ឌ Chinese League One និងបន្ទាប់មកឡើងទៅកាន់លីកលំដាប់ទី ១ របស់ប្រទេសចិន ទៀត គឺ Super League។
លោក Lillo ដែលពីមុនធ្លាប់ដឹកនាំក្រុមអេស្ប៉ាញទាំង ២ គឺ Real Sociedad និង Real Oviedo ព្រមទាំងក្រុមនៅជប៉ុន Vissel Kobe ដែរនោះ បានរួមការងារជាមួយកីឡាករដែលមានទេពកោសល្យកម្រិតពិភពលោកជាច្រើន មានដូចជាកីឡាករ Andres Iniesta, David Villa និង Yaya Toure ជាដើម ហើយអ្វីដែលសំខាន់លោកក៏ជាអតីតគ្រូបង្វឹករបស់លោក Pep ដែលបានលេងបាល់ទាត់ក្នុងនាមជាកីឡាករអាជីពចុងក្រោយ ក្នុងក្រុម Dorados de Sinaloa នៅម៉ិកស៊ិកផងដែរ។
ក្រោយទទួលបានការតែងតាំងនេះ លោក Lilo បានប្រាប់តាមរយៈវេបសាយរបស់ក្លិបថា៖ «ទំនាក់ទំនងរវាងខ្ញុំជាមួយ Pep មានជាយូរឆ្នាំមកហើយ ហើយខ្ញុំរំភើបណាស់ ដែលបានចូលរួមជាមួយគាត់ម្ដងទៀត ជាពិសេសក្លាយជាចំណែកមួយរបស់ក្រុមដ៏លេចធ្លោនេះ។ ក្លិប Manchester City ទទួលបានជោគជ័យយ៉ាងច្រើន នៅរយៈប៉ុន្មានរដូវកាលនេះ ដោយលេងបាល់ដ៏គួរឲ្យជក់ចិត្ត។ វាជារឿងរីករាយក្នុងការបានក្លាយជាផ្នែកមួយនៃក្រុមនេះ ហើយខ្ញុំសង្ឃឹមថា នឹងកា្លយជាចំណែកដ៏សំខាន់មួយក្នុងការជួយឲ្យក្លិបជោគជ័យកាន់តែខ្លាំងឡើងៗ»។
ដោយឡែកក្លិបមួយទៀតនៅក្របខ័ណ្ឌ Premier League ដែរ គឺ Watford បានឈានដល់កិច្ចព្រមព្រៀងជាមួយអ្នកចាំទី Ben Foster ហើយ ក្នុងការពន្យារកុងត្រាបន្ថែម ២ ឆ្នាំទៀត ដែលនេះមានន័យថា អតីតអ្នកឈរយាមបង្គោលទីឲ្យក្រុមជម្រើសជាតិអង់គ្លេសរូបនេះ នឹងមិនទាន់ចាកចេញទៅណាឡើយ គិតតាំងពីបានមកកាន់ទឹកដី Vicarage Road ក្នុងឆ្នាំ ២០១៨។
កីឡាករវ័យ ៣៧ ឆ្នាំ ជិតនឹងក្លាយជាកីឡាករគ្មានកិច្ចសន្យាទៅហើយ នៅចុងខែនេះ តែនៅពេលនេះ រូបគេនឹងនៅតែជាចំណែកមួយ ក្នុងការជួយក្រុម Watford ដើម្បីតស៊ូឲ្យមានជីវិតរស់រាននៅក្របខ័ណ្ឌកំពូលរបស់អង់គ្លេសបន្តទៀត ពេលពួកគេចាប់ផ្ដើមយុទ្ធនាការដំបូងរបស់ខ្លួនឡើងវិញ ដោយការប្រឈមជាមួយនឹងក្រុម Leicester City នាថ្ងៃទី ២០ ខែមិថុនា នេះ៕ AFP/VN