ទីក្រុងប៉ារីសៈ ខ្សែបម្រើប្រយុទ្ធដ៏មានសក្តានុពល Paul Pogba នៃក្រុមជម្រើសជាតិបារាំងបាននិយាយនៅសប្ដាហ៍នេះថា រូបគេសប្បាយចិត្តដែលបានស្ថិតនៅក្នុង Manchester United ប៉ុន្តែ Real Madrid ជាក្លិបស្ថិតនៅក្នុងក្ដីសុបិនរបស់គេ។
កីឡាករខ្សែបម្រើរូបនេះបានប្រាប់សន្និសីទកាសែតនៅមូលដ្ឋានហ្វឹកហាត់ប្រទេសបារាំងថា ការលេងឲ្យក្រុម Real Madrid គឺ «ជាក្ដីសុបិនមួយសម្រាប់ក្មេងៗ និងគ្រប់កីឡាករបាល់ទាត់ទាំងអស់»។
កីឡាករវ័យ ២៦ ឆ្នាំរូបនេះបានបញ្ជាក់ថា៖ «វាជាក្លិបដ៏ធំបំផុតមួយនៅក្នុងពិភពលោក ហើយខ្ញុំតែងនិយាយថាក្រុម Real Madrid គឺជាក្ដីសុបិនរបស់កីឡាករទាំងអស់»។
ថ្មីៗនេះក្លិបរបស់ប្រទេសអេស្ប៉ាញ Real Madrid បានសម្រេចចិត្តជ្រើសយកអតីតខ្សែបម្រើសញ្ជាតិបារាំងដែលធ្លាប់ឈ្នះព្រឹត្តិការណ៍ World Cup គឺលោក Zinedine Zidane ឲ្យវិលត្រឡប់មកធ្វើជាគ្រូបង្វឹករបស់ខ្លួនជាលើកទី ២ ដើម្បីជំនួសតំណែងរបស់លោក Santiago Solari។
ជុំវិញការផ្ដាស់ប្ដូរគ្រូបង្វឹកនេះ ក្រុម Manchester United របស់ Pogba ក៏បានផ្លាស់ប្ដូរគ្រូបង្វឹករបស់ខ្លួននៅរដូវកាលនេះផងដែរដោយបានដាក់លោក Ole Gunnar Solskjaer ជំនួសឲ្យលោក Jose Mourinho ដែលត្រូវបានបណ្ដេញចេញកាលពីកន្លងមកនេះ។
ខ្សែបម្រើប្រយុទ្ធដ៏ល្បីឈ្មោះ Pogba របស់ក្រុម Man United បាននិយាយបន្ថែមទៀតថា៖ «នៅពេលនេះ ខ្ញុំសប្បាយចិត្តនឹងលេងឲ្យក្រុម Manchester ព្រោះក្រុមយើងមានគ្រូបង្វឹកថ្មីហើយ»។
ជុំវិញការបណ្ដេញគ្រូបង្វឹករបស់ក្រុម Man United នេះ ទូរទស្សន៍ប្រទេសអង់គ្លេសបានសម្ភាស Pogba កាលពីថ្ងៃព្រហស្បតិ៍ដោយបានសួរថា៖ «តើគ្រូបង្វឹករូបនេះមានកំហុសអ្វីដែរ?»។
ជាមួយនឹងសំណួរនេះ Pogba បានឆ្លើយថា៖ «យើងអត់ឈ្នះការប្រកួត ដូច្នេះហើយបានជាយើងប្ដូរគ្រូបង្វឹកបែបនេះ។ យើងមិនចាំបាច់និយាយច្រើនពេកនោះទេគឺថាប្រសិនបើលទ្ធផលល្អច្រើន នោះគ្រូនឹងបន្តស្ថិតនៅជាមួយយើងជាបន្តទៀត»៕ SN