.jpg)
Neymar (ឆ្វេង) របស់ PSG បណ្ដើរបាល់គេចពីកីឡាករ Freuler។ AFP
លីសបោន៖ ក្រោយបរាជ័យជាច្រើនឆ្នាំ ក្នុងការបង្ហាញមុខមាត់របស់ខ្លួននៅអឺរ៉ុប ក្រុម Paris Saint-Germain (PSG) កំពុងស្ថិតក្នុងរង្វង់ ៩០ នាទី ក្នុងការមានឱកាសបង្ហាញខ្លួននៅវគ្គផ្ដាច់ព្រ័ត្រនៃក្របខ័ណ្ឌ Champions League ដោយសារដណ្ដើមបានជ័យជម្នះដ៏មិនគួរឲ្យជឿពីក្រុម Atalanta កាលពីថ្ងៃពុធ ខណៈលទ្ធផលនេះ បានធ្វើឲ្យគ្រូបង្វឹកលោក Thomas Tuchel ឥឡូវដឹងហើយថា គ្រប់យ៉ាងនឹងអាចកើតមានចំពោះក្រុមរបស់លោក។
ក្រុម PSG កំពុងស្ថិតនៅលើមាត់ជ្រោះនៃការខកចិត្តជាថ្មីម្ដងទៀត ក្នុងការខ្ទាតចេញពី Champions League នេះដោយសារក្រុមអ្នកមានទៅពីបារាំង ត្រូវបានក្រុម Atalanta នាំមុខ ១-០ រហូតដល់នាទីទី ៨៩-៩០ ក្នុងការប្រកួតនៅក្រុងលីសបោន ប្រទេសព័រទុយហ្គាល់ ជាកន្លែងសម្រាប់រៀបចំការប្រកួតដំណាក់កាលចុងក្រោយនៃក្របខ័ណ្ឌកំពូលរបស់អឺរ៉ុបឡើងវិញ ក្រោយផ្អាកយ៉ាងយូរ ដោយសារការរីករាលដាលនៃវីរុសកូរ៉ូណា។
តែគួរឲ្យស្ដាយគ្រាប់បាល់របស់កីឡាករ Mario Pasalic នៅនាទីទី២៧ ដែលជួយឲ្យក្រុមទៅពីអ៊ីតាលីនាំមុខនោះ ត្រូវលុបចោលដោយកីឡាករ Marquinhos ដែលជួយឲ្យក្រុម PSG តាមស្មើនៅដង្ហើមចុងក្រោយ ហើយបន្ទាប់មកនាទីទី ៣ នៅក្នុងម៉ោងបន្ថែមបង្គ្រប់ ខ្សែប្រយុទ្ធឆ្នើម Kylian Mbappe មានឱកាសបញ្ជូនបាល់ទៅកីឡាករបម្រុង Eric Choupo-Moting ស៊ុតទម្លុះសំណាញ់ទីជួយឲ្យក្រុមឈ្នះទាំងមិនគួរឲ្យជឿ។
ក្រោយពីដឹកនាំក្រុមឡើងទៅវគ្គ ១/២ ជាលើកដំបូងតាំងពីឆ្នាំ ១៩៩៥ គ្រូបង្វឹក លោក Tuchel បាននិយាយថា៖ «គ្រាប់បាល់កើតឡើងយឺតណាស់ តែយើងស័ក្ដិសមបានជ័យជម្នះ។ យើងមិនបោះបង់ជំនឿចិត្ត ឬការវាយសម្រុកឡើយ។ កីឡាករដែលប្ដូរចូលមានឥទ្ធិពលធំធេងណាស់។ យើងសមទទួលបានលទ្ធផលនេះ។ យើងបានលេង ដោយសមត្ថភាពរបស់ក្រុមពិតៗ មិនពឹងសំណាងតែម្យ៉ាងទេ»។
ទំហំទឹកប្រាក់ ដែលដាក់បញ្ចូលទៅក្នុងក្រុមជើងឯកលីកកំពូលរបស់បារាំង ដោយម្ចាស់ក្លិបបានបង្កើនសម្ពាធកាន់តែខ្លាំងលើក្រុម PSG ក្នុងការផ្ដល់ផលតបមកវិញ ហើយបើចាញ់ក្រុម Atalanta នឹងនាំឲ្យមានការរិះគន់កាន់តែខ្លាំងចំពោះក្លិប ដែលមានកំណត់ត្រា ក្នុងប្រកួតបែបនេះ មិនល្អទាល់តែសោះ។
អ្វីដែលសំខាន់នោះ គឺបើបរាជ័យក្រោមថ្វីជើងរបស់ក្រុមមួយដែលការចំណាយសម្រាប់កីឡាករក្នុងក្រុមទាំងមូល ត្រូវបានគេជឿថា ស្មើនឹងប្រាក់ខែរបស់កីឡាករ Neymar ១ ឆ្នាំ ($៤២,៥ លាន) នោះ ជារឿងអាម៉ាស់ខ្លាំងណាស់។
ដោយសារអវត្តមានក្នុងការប្រកួតនៅក្របខ័ណ្ឌកំពូលអឺរ៉ុបដ៏សំខាន់នេះ នៅ ២ រដូវកាលចុងក្រោយ ព្រោះមានរបួសនៅក្រុងលីសបោន នាពេលនេះ កីឡាករ Neymar ពិតជាអស្ចារ្យណាស់ ដោយសារគេ គឺជាអ្នកបង្កើតឱកាសឲ្យមានគ្រាប់ស្មើ និងរួមចំណែកយ៉ាងសំខាន់ក្នុងជ័យជម្នះនេះ។
យ៉ាងណា ក្រុម PSG បានធ្វើដំណើរទៅមុខ ១ ជំហានធំហើយ សម្រាប់ការប៉ុនប៉ងឈ្នះពានកំពូលរបស់អឺរ៉ុបនេះ ក៏ដូចជាសម្រាលការរិះគន់បានខ្លះ តែមិនមែនមានន័យថា ពួកគេនឹងសម្រាកបានស្រួល ក្រោយឆ្លងផុតវគ្គនេះឡើយ ព្រោះនៅវគ្គ ១/២ ដែលត្រូវទៅចាំជួបគូរវាងក្រុម Atletico Madrid (អេស្ប៉ាញ) និង RB Leipzig (អាល្លឺម៉ង់) នោះ ពិតជាមិនងាយស្រួលប៉ុន្មានទេ ជាពិសេស ប្រសិនបើប៉ះក្រុម Atletico នោះរឹតតែលំបាកខ្លាំងទ្វេដង ដោយសារសូម្បីតែក្រុមជើងឯកចាស់ Liverpool ក៏ធ្លាក់ដោយសារក្រុមនេះហើយដែរ៕ AFP/VN
