.jpg)
Joshua (ឆ្វេង) និង Pulev ថតរូបជាមួយគ្នា អំឡុងការផ្គូផ្គងកន្លងមក។ AFP
ក្រុងសូហ្វ៊ីយ៉ា៖ អ្នកប្រដាល់សញ្ជាតិប៊ុលហ្គារី Kubrat Pulev បានបញ្ជាក់កាលពីថ្ងៃចន្ទ ថា ខ្លួននឹងប្រឈមជាមួយម្ចាស់ជើងឯកទម្ងន់ធ្ងន់ពិភពលោក Anthony Joshua ដើម្បីប្រកួតដណ្តើមខ្សែក្រវាត់នៅក្រុងឡុងដ៍ ប្រទេសអង់គ្លេស នាថ្ងៃទី ១២ ខែធ្នូ។
ដំបូងឡើយកីឡាករ Joshua របស់ចក្រភពអង់គ្លេសគ្រោងនឹងឡើងសង្វៀនប្រកួតទល់នឹង Pulev នៅថ្ងៃទី ២០ ខែមិថុនា ជាមួយនឹងកាលបរិច្ឆេទត្រៀមបន្ទាប់ នៅខែកក្កដា ចំពេលមានការរាតត្បាតនៃវីរុសកូរ៉ូណា។
«ផ្លូវការហើយ! ការប្រកួតរវាង Pulev និង Joshua គឺថ្ងៃទី ១២ ខែធ្នូ ខាងមុខនេះ»។ នេះជាសារ ដែល Pulev សរសេរផូស្តនៅលើគេហទំព័រផ្លូវការរបស់ខ្លួន ដោយមានបន្ថែមទាំងកាលបរិច្ឆេទ និងទីកន្លែងចុងក្រោយ ព្រមទាំងការចុះហត្ថលេខាក្នុងកិច្ចសន្យាដែរ។
បន្ទាប់មកកីឡាករវ័យ ៣៩ ឆ្នាំ បានផូស្តតាមបណ្ដាញសង្គម Facebook ថែមទៀតថា៖ «គ្មានផ្លូវត្រឡប់ក្រោយ គ្មានការពន្យារពេល និងគ្មានការកែប្រែកាលបរិច្ឆេទទៀតទេ។ ទុកឱ្យអ្នកខ្លាំងជាអ្នកឈ្នះ»។
តែយ៉ាងណា រូបគេមិនបានអះអាងថា តើការប្រកួតហ្នឹងនឹងរៀបចំឡើងដោយគ្មានអ្នកចូលរួម ដោយសារការរឹតបន្តឹងទប់ស្កាត់ជំងឺកូវីដ ១៩ ដូចដើមឬអត់ រហូតធ្វើឱ្យអ្នកផ្គូផ្គងរបស់ Joshua លោក Eddie Hearn ចង់យកការប្រកួតនេះទៅធ្វើនៅមជ្ឈិមបូព៌ាវិញ បើទស្សនិកជន ត្រូវបានអនុញ្ញាតនៅទីនោះ។
Joshua វ័យ ៣០ ឆ្នាំ បានផ្ដួលកីឡាករអាមេរិក Andy Ruiz ដើម្បីគ្រងខ្សែក្រវាត់ទម្ងន់ធ្ងន់ ៤ ស្ថាប័ន គឺ WBA, IBF, WBO និង IBO អំឡុងការប្រកួតនៅអារ៉ាប៊ី សាអ៊ូឌីត កាលពីខែធ្នូ ឆ្នាំទៅ។
សម្រាប់ Pulev បានរង់ចាំឱកាសជួប Joshua ជិត ៣ ឆ្នាំហើយ ក្រោយមានរបួសស្មា ដែលបង្ខំឱ្យរូបគេផ្អាកប្រកួតដណ្ដើមខ្សែក្រវាត់ពិភពលោក ក្នុងខែ តុលា ឆ្នាំ ២០១៧។
ការប្រកួតនេះ អាចជាការឡើងសង្វៀនចុងក្រោយរបស់ Joshua មុនប៉ះជាមួយម្ចាស់ខ្សែក្រវាត់ WBC គឺ Tyson Fury សម្រាប់ការប្រកួតរបស់អ្នកប្រដាល់ឈាមជ័រអង់គ្លេសតែមួយ នៅឆ្នាំខាងមុខ។
Fury ត្រៀមឡើងការពារខ្សែក្រវាត់របស់ខ្លួនមុនថ្ងៃបុណ្យណូអែល មុនអ្វីដែលបណ្ដាញសារព័ត៌មាននៅចក្រភពអង់គ្លេសរាយការណ៍ថា នឹងមានការប្រកួតមួយនៅឯកីឡដ្ឋានជាតិ Wembley របស់អង់គ្លេស ដែលជឿថា ការរឹតបន្តឹងចំនួនមនុស្សទប់ស្កាត់ជំងឺឆ្លងនឹងត្រូវលុបចោលនាពេលនោះ។
កាសែត Daily Mail បានរាយការណ៍ថា ការប្រកួតឡើងវិញរវាង Fury ជាមួយ Deontay Wilder ត្រូវលុបចោល ដោយសារការជិតផុតកំណត់នៃសិទ្ធិចុះកិច្ចសន្យារបស់អ្នកប្រដាល់អាមេរិក ចំពោះប្រកួតទី ៣ រវាងអត្តពលិកទាំង ២ ទើបបើកផ្លូវឱ្យមានកម្មវិធីប្រកួតសម្រាប់អ្នកប្រដាល់ រហស្សនាមថា «Gypsy King» ជាមួយ Joshua តែម្ដង៕ AFP/VN
