.jpg)
Ramos របស់អេស្ប៉ាញ ស៊ុតបាល់ពិន័យ ១១ ម៉ែត្រ តែអត់សម្រេច។ AFP
ក្រុងបាសែល៖ ប្រធានក្រុម Sergio Ramos ស៊ុតបាល់ពិន័យ ១១ ម៉ែត្រ អត់ចូល ២ លើក ខណៈក្រុមអេស្ប៉ាញត្រូវពឹងលើគ្រាប់បាល់ចុងម៉ោងរបស់កីឡាករ Gerard Moreno ទើបអាចស្មើជាមួយក្រុមម្ចាស់ផ្ទះស្វ៊ីស អំឡុងការប្រកួតនៃកម្មវិធី Nations League កាលពីថ្ងៃសៅរ៍។
Ramos បានធ្វើការបង្ហាញវត្តមានជាលើកទី១៧៧ ឱ្យអេស្ប៉ាញ ដែលចំនួននេះ នាំឱ្យខ្សែការពារចាស់វស្សារូបនេះ ក្លាយជាកីឡាករនៅអឺរ៉ុប លេងក្នុងក្រុមជម្រើសជាតិច្រើនជាងគេបំផុតក្នុងប្រវត្តិសាស្ត្រ ពោលគឺលើសកំណត់ត្រារបស់អ្នកចាំទីអ៊ីតាលី Gianluigi Buffon ចំនួន ១ លើក។
តែជំនួសឱ្យការអបអរចំពោះកំណត់ត្រា នៅក្រុងបាសែលនេះ វាបែរជាបានក្លាយទៅជាយប់ ដែលមិនអាចបំភ្លេចបានសម្រាប់កីឡាករវ័យ ៣៤ ឆ្នាំ ទៅវិញនោះ គឺការស៊ុតបាល់ប៉េណាល់ទីអត់ផុតដៃអ្នកចាំទី Yann Sommer ២ដង។
យ៉ាងណាក្ដី លោក Luis Enrique គ្រូបង្វឹកអេស្ប៉ាញនៅតែនិយាយការពារ Ramos ថា៖ «តួលេខប៉េណាល់ទីរបស់ Ramos គឺហួសកម្រិតពិភពលោកហើយ។ បើមានការទាត់លើកទី៣ គេនឹងនៅតែទទួលបន្ទុកហ្នឹងដដែល»។
Ramos ស៊ុតបញ្ចូលទីបានសម្រេច ២៥ គ្រាប់ បន្តបន្ទាប់គ្នាសម្រាប់ការទាត់ ១ ទល់នឹង ១ ជាមួយអ្នកចាំទី ក្នុងប្រអប់គ្រោះថ្នាក់ តែការភ្លាត់លើកនេះ នឹងធ្វើក្រុមអេស្ប៉ាញ ដាច់ខាតត្រូវឈ្នះអាល្លឺម៉ង់ នៅប្រកួតចុងក្រោយនាក្រុង Sevilla នៅថ្ងៃអង្គារ ទើបអាចឡើងទៅវគ្គ ៤ ក្រុមចុងក្រោយ។
កីឡាករ Moreno ដែលស៊ុតឱ្យអេស្ប៉ាញតាមស្មើនិយាយថា៖ «យើងចង់បានជ័យជម្នះ ហើយក្រុមព្យាយាមរហូតដល់ទីបញ្ចប់។ វាមិនសមតាមបំណងយើង តែយើងនៅមានឱកាសឆ្លងទៅវគ្គបន្ត បើទោះជាយើងត្រូវប្រឈមជាមួយការប្រកួតដ៏លំបាកក៏ដោយ»។
ក្រុមរបស់លោក Enrique រកបានតែ ៣ គ្រាប់ប៉ុណ្ណោះ ក្នុងចំណោមការប្រកួត ៥ លើកចុងក្រោយ ហើយជាថ្មីម្ដងទៀត បានប្រឹងប្រែងយ៉ាងខ្លាំង ដើម្បីបំបែកកំពែងរបស់ក្រុមស្វ៊ីស ដែលមានការរៀបចំយ៉ាងល្អ ជាមួយនឹងឱកាសនាំមុខមុននៅនាទីទី២៦ ដោយកីឡាករ Remo Freuler។
ក្រោយត្រូវម្ចាស់ផ្ទះបំប៉ោងសំណាញ់ទីខ្លួន ក្រុមអេស្ប៉ាញបានព្យាយាមរកចន្លោះស៊ុតបញ្ចូលទីវិញ ហើយក៏មានឱកាសស៊ុតបាល់ពិន័យ ១១ ម៉ែត្រ ២លើក នៅនាទីទី៥៧ និង៨០ តែគួរឱ្យស្ដាយកីឡាករ Ramos ធ្វើឱ្យក្រុមទាំងមូលបានត្រឹមខកចិត្តប៉ុណ្ណោះ។
ការពិន័យផ្ដល់បាល់ ១១ ម៉ែត្រលើកទី២ ឱ្យអេស្ប៉ាញនោះ ក្រុមស្វ៊ីសក៏ត្រូវបាត់បង់សមាជិកម្នាក់ដែរ ក្រោយខ្សែការពារ Nico Elvedi បានកាតលឿងលើកទី ២ ដែលស្មើកាតក្រហម ដោយសារបានផ្ដួលខ្លួនស្កាត់ខ្សែប្រយុទ្ធ Alvaro Morata។
១០ នាទីចុងក្រោយ ក្រោយមានចំនួនកីឡាករច្រើនជាងអេស្ប៉ាញក៏ធ្វើការវាយសម្រុកម្ដងហើយម្ដងទៀត រហូតចុងក្រោយក៏មានគ្រាប់បាល់តាមស្មើបានវិញ ដោយ Moreno នាទីទី៨៩។
ក្រុមអេស្ប៉ាញពេលនេះកំពុងឈរនៅលេខ ២ ក្នុងគ្រុបទី៤ លីគ A ជាមួយនឹង ៨ ពិន្ទុ ដោយតាមពីក្រោយក្រុមលេខ ១ អាល្លឺម៉ង់ ១ ពិន្ទុ ខណៈអ៊ុយក្រែន មាន ៦ ពិន្ទុ នៅលេខ ៣ ហើយស្វ៊ីសបាតតារាង មាន ៣ ពិន្ទុ៕ AFP/VN
