ក្រុងក្លាសស្គូ: ក្រុម Rangers បានឈានដល់កិច្ចសន្យាយកកីឡាករ Ianis Hagi ជាផ្លូវការហើយ ក្រោយមានលក្ខខណ្ឌ ដែលបានព្រមព្រៀងជាមួយក្រុម KRC Genk របស់បែលហ្ស៊ិក ក្នុងទិញយកខ្សែបម្រើស្លាប។ នេះបើតាមក្លិបនៅក្របខ័ណ្ឌ Premiership របស់ស្កុតឡេន បានឲ្យដឹងកាលពីថ្ងៃពុធ។
កីឡាករ Ianis ដែលជាកូនប្រុសអតីតខ្សែបម្រើរបស់ក្លិបអ្នកមានបុណ្យ Barcelona និងអធិរាជស Real Madrid គឺ Gheorghe ស៊ុតបញ្ចូលទីបាន ៣ គ្រាប់ ជាមួយនឹងការបង្ហាញខ្លួន ១២ ប្រកួតឲ្យក្រុម Rangers ក្រោយមកចូលរួមជាមួយក្រុម កាលពីខែមករា ក្នុងកិច្ចសន្យាខ្ចីជើងរយៈពេល ៦ ខែ។
ក្រោយមានកិច្ចព្រមព្រៀងនេះ Ianis ដែលបង្ហាញខ្លួនជាមួយក្រុមជម្រើសជាតិរូម៉ានី ១០ ដងបានប្រាប់ឲ្យដឹងក្នុងសេចក្ដីប្រកាសថា៖ «បើទោះជាមានការចាប់អារម្មណ៍ពីក្លិបផ្សេងៗ តែជម្រើសទី១ របស់ខ្ញុំ តែងតែក្រុងក្លាសស្គូជានិច្ច ព្រោះខ្ញុំចង់លេងឲ្យ Rangers។ ខ្ញុំមានក្ដីសុខណាស់សម្រាប់រយៈពេលខ្ចីជើង នៅកីឡដ្ឋាន Ibrox ហើយតែងតែគិតគូរចង់មកលេងនៅចំពោះមុខអ្នកគាំទ្រឆាប់ៗវិញ តែពេលនេះ ខ្ញុំសង្ឃឹមថា អ្នកគាំទ្រក្រុម Rangers និងក្រុមគ្រួសាររបស់ពួកគេទាំងអស់ កំពុងមានសុវត្ថិភាព និងសុខភាពល្អ ក្នុងពេលមានវិបត្តិជំងឺកូវីដ ១៩ នេះ»។
ចំណែកក្រុម Rangers បានឲ្យដឹងថា កិច្ចសន្យាផ្លូវការ នឹងត្រូវធ្វើរួចរាល់ ពេលទីផ្សារដោះដូរកីឡាកររដូវក្ដៅ បើកដំណើរការ ហើយជាមយយគ្នានេះ គ្រូបង្វឹករបស់ក្រុម លោក Steven Gerrard បាននិយាយថា៖ «ខ្ញុំអាចអភិវឌ្ឍន៍ទំនាក់ទំនងជាមួយ Ianis បានលឿន។ គេរីករាយទទួលការរៀនសូត្រ ដោយព្យាយាមអភិវឌ្ឍន៍ខ្លួនបានយ៉ាងល្អប្រសើរបន្តិចម្ដងៗ ហើយខ្ញុំដឹងហើយថា គេត្រៀមខ្លួនរួចជាស្រេចរដូវកាលក្រោយ»។
កីឡាករ Ianis ដែលទើបមានវ័យ ២១ ឆ្នាំ បានធ្វើឲ្យអ្នកស្មោះស្ម័គ្រក្រុមនៅទឹកដី Ibrox ស្រលាញ់ចូលចិត្ត ពេលដែលរូបគេ បានរួមចំណែកយ៉ាងធំធេង ក្នុងការជួយក្រុម Rangers ឡើងទៅវគ្គ ១៦ ក្រុមចុងក្រោយ ក្របខ័ណ្ឌ Europa League ក្រោយពីបានស៊ុតបញ្ចូលទី ២ គ្រាប់ ក្នុងប្រកួតទល់នឹងក្រុម SC Braga របស់ព័រទុយហ្គាល់៕ AFP/VN