ក្រុងឡុងដ៍៖ លោក Jose Mourinho បានរងបរាជ័យលើកដំបូងក្រោមថ្វីជើងរបស់ក្លិប Man Utd ខណៈខ្សែប្រយុទ្ធ Marcus Rashford រកបាន ២ គ្រាប់ ក្នុងជ័យជម្នះ ២-១ ទៅលើក្រុម Tottenham កាលពីរាត្រីថ្ងៃពុធ។
បរាជ័យលើកដំបូងរបស់លោក Mourinho តាំងពីចូលដឹកនាំក្រុម Spurs នេះបានបន្ថយសម្ពាធទៅលើលោក Ole Gunnar Solskjaer ខណៈក្លិប Man Utd បានឡើងមកឈរលើក្រុម Spurs នៅលេខ ៦ នៅក្នុងតារាងក្របខ័ណ្ឌ Premier League។
កីឡាករ Rashford បានបើកឆាក ១ គ្រាប់ សម្រាប់ក្រុមម្ចាស់ផ្ទះ Man Utd មុនពេលកីឡាករ Dele Alli រកបាន ១ គ្រាប់វិញ សម្រាប់ក្រុមភ្ញៀវប៉ុន្តែនៅនាទី ៤៩ កីឡាករ Rashford បានបន្ថែម ១ គ្រាប់ទៀត ដោយការស៊ុតបាល់ពិន័យ ១១ ម៉ែត្រយ៉ាងល្អ ដើម្បីជួយឲ្យក្រុមម្ចាស់ផ្ទះបាន ៣ ពិន្ទុទៀត។
លោក Solskjaer បាននិយាយថា៖ «៣ ពិន្ទុ គឺច្រើនណាស់សម្រាប់យើង»។
គ្រូបង្វឹករូបនេះបានបន្ថែមថា៖ «យើងមានការប្រកួតស្មើគ្នាច្រើននៅរដូវកាលនេះ ធ្វើឲ្យយើងរបូតពិន្ទុច្រើនដែលមិនបានឡើងចំណាត់ថ្នាក់ថែមទៀត។ វាជាមេរៀនអស្ចារ្យក្នុងការប្រកួត ២ លើកចុងក្រោយ គឺជាមួយក្លិប Sheffield United និង Aston Villa ហើយយើងបានបង្កើតភាពអស្ចារ្យត្រឡប់មកវិញ»។
លោក Mourinho ដែលត្រូវបានបណ្ដេញចេញពីក្រុម Man Utd កាលពីខែធ្នូឆ្នាំមុននោះបានចាត់ទុកការទទួលស្វាគមន៍ចំពោះគាត់នៅក្លិប Old Trafford នេះថា «ល្អប្រសើរ និងគួរសម»។
គ្រូបង្វឹករូបនេះបានបន្ថែមថា៖ «នេះជាជំហានថយក្រោយមួយក្នុងការប្រកួតជាមួយក្រុមដែលកំពុងតែមានបំណងដូចយើងដែរ គឺព្យាយាមឡើងទៅឈរនៅចំណាត់ថ្នាក់ទី ៦។ យើងត្រូវតែបន្តទៅមុខទៀត។ យើងមានកំហុស ប៉ុន្តែយើងមិនត្រូវយំសោកពីបញ្ហានេះទេ»។
ទន្ទឹមនោះដែរក្លិប Leicester បានប្រកួតឈ្នះក្រុម Wortford ២-០ បាន ៣ ពិន្ទុទៀត ដើម្បីវ៉ាក្លិប Man City ឡើងទៅឈរនៅលេខ ២ បន្ទាប់ពីក្រុម Liverpool ដែលមាន ៤២ ពិន្ទុ។
ជ័យជម្នះនេះបានធ្វើឲ្យក្រុម Leicester បំបែកកំណត់ត្រាឈ្នះជាប់គ្នា ៧ លើកក្នុងការប្រកួតលីកកំពូលរបស់ពួកគេ ខណៈក្រុម Chelsea បានត្រឡប់ឈ្នះវិញ ក្រោយរងបរាជ័យជាប់គ្នា ២ លើកដោយបានឈ្នះក្រុម Aston Villa ២-០ នៅរាត្រីថ្ងៃពុធជាមួយគ្នានោះ។
ក្រុម Watford របស់លោក Brendan ត្រូវបានពិន័យបាល់ ១១ ម៉ែត្រ នៅពេលកីឡាករ Jonny Evans ត្រូវបានធ្វើឲ្យដួលនៅក្នុងតំបន់គ្រោះថ្នាក់ ហើយកីឡាករ Jamie Vardy បានស៊ុតបាល់ពិន័យនោះចូលទីយ៉ាងល្អមុនពេលកីឡាករ James Maddison បានបន្ថែម ១ គ្រាប់ទៀតសម្រាប់ក្រុមម្ចាស់ផ្ទះនៅក្នុងនាទីទី ៩០។
ចំណែកខ្សែប្រយុទ្ធ Tammy Abraham នៅក្លិប Chelsea បានបើកឆាក ១ គ្រាប់ ក្នុងទឹកដីខ្លួនឯងមុនពេលកីឡាករ Trezeguet រកបាន ១ គ្រាប់វិញ សម្រាប់ក្រុមភ្ញៀវ Aston Villa ប៉ុន្តែនៅនាទី ៤៨ កីឡាករ Mason Mount បានជួយឲ្យក្រុមម្ចាស់ផ្ទះឈ្នះជាមួយគ្រាប់បាល់ចុងក្រោយរបស់ខ្លួន៕ AFP/SN