.jpg)
Modric (ស្ដាំ) ស៊ុតគ្រាប់ជ័យជម្នះចុងក្រោយ ឱ្យ Real ឈ្នះ Barca ៣-១ ក្នុងជំនួប El Clasico ។ AFP
បាសេឡូណា៖ ក្រុម Real Madrid ទប់ស្កាត់វិបត្តិដោយវិធីដ៏ល្អបំផុត កាលពីថ្ងៃសៅរ៍ ដោយការយកឈ្នះក្រុម Barcelona ៣-១ ក្នុងជំនួប El Clasico ដែលធ្វើឡើងដោយគ្មានអ្នកគាំទ្រក្នុងកីឡដ្ឋានជាលើកដំបូងក្នុងប្រវត្តិសាស្ត្រ។
ក្រុម Barca ក្នុងនាមជាម្ចាស់ផ្ទះ មានឱកាសយកជ័យជម្នះជាលើកទី ៣ ជាប់ៗគ្នា លើក្រុមគូប្រជែងស្លាប់រស់ ហើយបន្ថែមសម្ពាធកាន់តែខ្លាំងលើលោក Zinedine Zidane តែផ្ទុយទៅវិញ ក្លិបកាតាឡាន់មួយនេះ បែរជាបរាជ័យ ហើយបណ្ដោយឱ្យ Real នាំមុខដាច់ ៦ ពិន្ទុ ក្នុងតារាងក្របខ័ណ្ឌ La Liga។
លោក Zidane គ្រូបង្វឹករបស់ក្រុមភ្ញៀវ ក្រោយការប្រកួតបញ្ចប់ទៅនិយាយថា៖ «វាត្រឹមតែ ៣ ពិន្ទុប៉ុណ្ណោះ តែយើងត្រូវរីករាយជាមួយវាជាពិសេស ក្រោយគ្រប់យ៉ាង ដែលនិយាយពាក់ព័ន្ធនឹងក្រុម»។
២ គ្រាប់ នៅវគ្គទី ២ ដោយការស៊ុតបាល់ពិន័យ ១១ ម៉ែត្ររបស់ Sergio Ramos និងការទម្លុះសំណាញ់ទីនៅចុងម៉ោងរបស់ Luka Modric បានផ្ដាច់ជីវិតក្រុមរបស់លោក Ronald Koeman ខណៈ Federico Valverde របស់ Real និង Ansu Fati របស់ Barca ផ្លាស់វេនគ្នាធ្វើបានសម្រេចម្នាក់ម្ដង នៅដើមវគ្គទី ១ ធ្វើឱ្យការប្រកួតនៃក្លិបយក្ស ២ នៅអេស្ប៉ាញកាន់តែរន្ថើនឡើងៗ។
ប្រធានក្រុមអធិរាជស Ramos និយាយថា៖ «វាតែងតែមានពេល ដែលក្រុមធ្វើមិនបានល្អ ក្នុងរដូវកាល ១ ជាមិនខានតែសង្ឃឹមថា ពេលវេលាអាក្រក់នេះ នឹងមានត្រឹមតែ ១ សប្ដាហ៍ចុះ។ ការឈ្នះនៅផ្ទះរបស់ក្រុមគូសត្រូវដ៏យូរអង្វែង គឺតែងតែមានក្ដីរីករាយជានិច្ច»។
ក្រុម Barca ទំនងជាមានអារម្មណ៍តឹងចិត្តខ្លាំង ជាពិសេសពេលអាជ្ញាកណ្ដាលផ្ដល់បាល់ប៉េណាល់ទីឱ្យក្រុមគូបដិបក្ខ ក្រោយពិនិត្យវីដេអូជំនួយការអាជ្ញាកណ្ដាល ( VAR) ហើយការដួល ដែលមើលទៅហួសពីការពិត (ការធ្វើពុតដួល) របស់ Ramos ក្រោយការទាញអាវពី Clement Lenglet។
លោក Koeman គ្រូបង្វឹករបស់ក្រុមម្ចាស់ផ្ទះ និយាយពាក់ព័ន្ធនឹង VAR ថា៖ «ប្រហែលជាថ្ងៃណាមួយ អ្នកអាចធ្វើការពន្យល់ថា តើ VAR កំពុងធ្វើការយ៉ាងដូចម្ដេច នៅទីនេះ ក្នុងប្រទេសអេស្ប៉ាញ។ យើងមានការប្រកួត ៥ លើក ក្នុងលីគ ហើយ VAR ឃើញតែធ្វើអន្តរាគមន៍ជាមួយក្រុម Barca»។
នេះជាការប្រកួត ក្នុងជំនួប El Clasico លើកដំបូងរបស់លោក Koeman ក្នុងនាមជាអ្នកចាត់ការរបស់ Barca ហើយសម្ពាធ ដែលមានចំពោះលោក Zidane ឥឡូវនេះ នឹងត្រូវផ្ទេរទៅកាន់បុរសសញ្ជាតិហូឡង់វិញ ដែលដឹកនាំក្រុមឈ្នះបានតែ ៣ លើកប៉ុណ្ណោះ ក្នុងចំណោម ៦ ប្រកួតកន្លងមកនេះ។
Barca នឹងត្រូវប្រឈមនឹងក្រុមយក្សអ៊ីតាលី Juventus នៅកណ្ដាលសប្ដាហ៍ ក្នុងប្រកួត Champions League ដោយគ្មានវត្តមានរបស់ខ្សែការពារឆ្នើម Gerard Pique ដោយសារតែជាប់ពិន័យ។
រាល់លទ្ធផលមិនល្អរបស់ Barca ឥឡូវនេះ កំពុងឆ្លុះបញ្ចាំងពីអនាគតរបស់ប្រធានក្រុម Lionel Messi ដែលនេះអាចជាជំនួប El Clasico ចុងក្រោយរបស់គេ នៅ Camp Nou ខណៈខ្សែប្រយុទ្ធអន្តរជាតិអាហ្សង់ទីន ដែលប៉ុនប៉ងចេញពីក្រុមមិនបានសម្រេច នៅតែអាចរកគ្រាប់បាល់បានពីការចូលលេង ដែលប្រកបដោយហានិភ័យនារដូវកាលនេះ។
ក្រុមជើងឯកចាស់ Real ឈរទី ១ បណ្ដោះអាសន្នក្នុងតារាង La Liga ដោយមាន ១៣ ពិន្ទុ ក្រោយបញ្ចប់ ៦ ប្រកួត ពោលគឺនាំមុខ ២ ពិន្ទុលើ Atletico Madrid ដែលប្រកួតតិចជាង ១ លើក ខណៈ Barca នៅលេខ ១២ មាន ៧ ពិន្ទុ ក្រោយប្រកួត បាន ៥ ដង៕ AFP/VN
