ម៉ា្រឌីដ៖ ក្រុម Real Madrid មានឱកាសឡើងផុតវគ្គសន្សំពិន្ទុតាមពូលបន្តិចហើយ នៅ Champions League ក្រោយពីកីឡាករបម្រុង Rodrygo បំប៉ោងសំណាញ់ទី នៅចុងម៉ោង ១ គ្រាប់ ជួយក្រុមឱ្យមានជ័យជម្នះលើក្រុម Inter Milan ទាំងប្រផុតប្រផើយ ៣-២ អំឡុងការប្រកួតដ៏គួរឱ្យជាប់ចិត្ត ក្នុងពូល B កាលពីយប់ថ្ងៃអង្គារ។
លទ្ធផលនេះ ធ្វើឱ្យ Real ដែលជាក្រុមដំបូង ឈ្នះពានកំពូលរបស់អឺរ៉ុបនេះ ១៣ លើកមាន ៤ ពិន្ទុ ស្មើ Shakhtar Donetsk ដោយតាមពីក្រោយក្រុមលេខ ១ Moenchengladbach ១ ពិន្ទុ និងនាំមុខ ២ ពិន្ទុលើក្រុមបាតតារាង Inter។
យ៉ាងណា ប្រកួតនេះ Real ប៊ិះនឹងយ៉ាប់ដែរ ក្រោយភ្លាត់ឱ្យក្រុមភ្ញៀវ Inter តាមស្មើពីការនាំមុខ ២-០ ដែលស៊ុតបញ្ចូលទីដោយ Karim Benzema និង Sergio Ramos តែសំណាងល្អ ខ្សែប្រយុទ្ធវ័យ ១៩ ឆ្នាំ Rodrygo អាចរកឃើញគ្រាប់ជ័យជម្នះ នៅ ១០ នាទី មុនប្រកួតបញ្ចប់ផ្លូវការ។
គ្រូបង្វឹកលោក Zinedine Zidane និយាយថា៖ «យើងត្រូវតែឈ្នះ ហើយយើងធ្វើបាន ជាមួយនឹងភាពនឹងនររបស់ក្រុមពោល គឺក្រោយពីរងបរាជ័យដោយសារគូប្រជែងដ៏ខ្លាំងកន្លងមក។ មិនមែនរឿងស្រួលទេ»។
ក្រុមទាំង ២ ត្រូវគេរំពឹងថា នឹងប្រជែងគ្នាយកតំណែងលេខ ១ និងលេខ ២ ក្នុងពូល តែបែរជាផ្ដើមប្រកួតដំបូងយ៉ាប់ដូចគ្នា ដោយInter ស្មើ Moenchengladbach ហើយ Real លេងចាញ់ Shakhtar។
ចំណែកគ្រូបង្វឹករបស់ Inter លោក Antonio Conte លើកឡើងថា៖ «យើងដឹងការប្រកួតនេះ លំបាកយ៉ាងម៉េច។ យើងលេងល្អ តែបង្កើតកំហុសខ្លះៗ។ មិនគួរឱ្យរឿងហ្នឹងកើតឡើងសោះ ក្នុងប្រកួតកម្រិតនេះ។ Real មានកីឡាករប្រកបដោយបទពិសោធយ៉ាងច្រើន។ ពួកគេដឹង ពេលត្រូវបញ្ចប់ការប្រកួតទាំងស្រុង»៕ AFP/VN