ក្រុងឡុងដ៍៖ លោក Bill Sweeney នាយកប្រតិបត្តិសហព័ន្ធបាល់ឱបអង់គ្លេស (RFU) និយាយថា សហព័ន្ធកំពុងស្វះស្វែងឲ្យមានភាពច្បាស់លាស់អំពីថា តើគោលការណ៍គម្លាតរាងកាយអាចត្រូវបានកាត់បន្ថយពី ២ ម៉ែត្រទៅ ១ ម៉ែត្រ បានឬអត់ ដើម្បីពួកគេអាចអនុញ្ញាតឲ្យអ្នកគាំទ្រចំនួន ៤ ម៉ឺននាក់ ចូលកីឡដ្ឋាន Twickenham សម្រាប់ការប្រកួតអន្តរជាតិខែវិច្ឆិកា។
កីឡាសំខាន់ៗនៅក្នុងប្រទេសអង់គ្លេស ត្រូវបានផ្តល់ភ្លើងខៀវឲ្យវិលត្រឡប់មកមានសកម្មភាពវិញនៅខែនេះ ដោយគ្មានអ្នកទស្សនាចូលរួមក្នុងពេលមានការរាតត្បាតនៃជំងឺកូវីដ ១៩ តែទោះបីយ៉ាងណា RFU ជឿជាក់ថា អ្នកគាំទ្រនឹងត្រូវបានអនុញ្ញាតឲ្យចូលរួមការប្រកួតនៅខែវិច្ឆិកា ខាងមុខ ដែលប្រទេសអង់គ្លេស គ្រោងធ្វើជាម្ចាស់ផ្ទះរៀបចំការប្រកួតជាមួយក្រុមនូវែលសេឡង់ (រហស្សនាម All Blacks), អាហ្សង់ទីន តុងហ្គា និងអូស្រ្តាលី នាកីឡដ្ឋាន Twickenham ដែលអាចផ្ទុកអ្នកទស្សនាបានដល់ទៅ ៨២ ០០០ នាក់។
កាសែត Guardian ស្រង់សម្តីលោក Sweeney ដែលនិយាយថា៖ «បើអ្នកកំពុងប្រើប្រាស់វិធី ២ ម៉ែត្រ អ្នកកំពុងនិយាយថា ចន្លោះសុវត្ថិភាពសរុបចម្ងាយ ៤ ម៉ែត្រ ពោលគឺមនុស្សម្នាក់ត្រូវមានចន្លោះ ១ ម៉ែត្រជុំវិញ។ បើអ្នកប្រើគោលការណ៍ ២ ម៉ែត្រនេះ ក្នុងកីឡដ្ឋានមួយមាន ៨ ម៉ឺនកៅអី ហើយបញ្ហាក្នុងការធ្វើចរាចរណ៍ ដូចជាមនុស្សម្នាក់ដែលចង់ទៅប្រើប្រាស់បន្ទប់ទឹកដោយមិនដើរកាត់មនុស្សម្នាក់ ហើយពួកគេមិនប៉ះពាល់គ្នា ឃើញថា វិធីនេះនឹងកាត់បន្ថយបរិមាណមនុស្សមកត្រឹមចន្លោះពី ៩ ០០០ ទៅ ៩ ៥០០ នាក់»។
លោក Sweeney បន្តទៀតថា៖ «ខ្ញុំមានការភ្ញាក់ផ្អើលណាស់ មិនគិតសោះថា មានចំនួនតិចដល់ថ្នាក់ហ្នឹង។ តែបើជាមួយគម្លាត ១ ម៉ែត្រ ដែលជាការណែនាំរបស់អង្គការសុខភាពពិភពលោកវិញនោះ អ្នកនឹងមានអ្នកចូលរួមជិត ៤០ ០០០ នាក់»។
លោក Sweeney លើកឡើងថា RFU ត្រៀមការខាតទឹកប្រាក់ប្រមាណជិត $៤ លាន ក្នុង ១ ប្រកួត ក្រោមគោលការណ៍សុវត្ថិភាព ២ ម៉ែត្រនេះ តែថានឹងមិនបង្កើនចំនួនដាច់ខាត ដរាបណាពួកគេមិនទទួលបានការអនុញ្ញាតពីរដ្ឋាភិបាលទេ។
លោក Sweeney ថា៖ «យើងនឹងមិនបង្កើនបរិមាណមនុស្ស ប្រឈមនឹងហានិភ័យឡើយ ហើយមិនអនុវត្តផ្ទុយនឹងសេចក្ដីណែនាំរបស់រដ្ឋាភិបាលទេ។ តែយើងគ្រាន់តែចង់ដឹងថា តើច្បាប់ ២ ម៉ែត្រ ពិតជាចាំបាច់ ឬ ១ ម៉ែត្រ អាចបានដែរ?»៕ AFP/VN