ក្រុងមីឡាន៖ ខ្សែប្រយុទ្ធ Franck Ribery បាននិយាយថា រូបគេអាចនឹងរីកចម្រើនក្នុងរយៈពេលប៉ុន្មានឆ្នាំនេះ ប៉ុន្តែនៅលើទីលានរូបគេនៅតែមានអារម្មណ៍ថា នៅក្មេងនៅឡើយក្រោយពីបានជួយឲ្យក្រុម Fiorentina ឈ្នះក្រុម AC Milan ៣-១ កាលពីថ្ងៃអាទិត្យ។
ខ្សែប្រយុទ្ធជើងចាស់បារាំងរូបនេះ រកបានគ្រាប់ទី ៣ សម្រាប់ក្រុមរបស់ខ្លួននៅកីឡដ្ឋាន San Siro ហើយរូបគេត្រូវបានអបអរដោយអ្នកគាំទ្រក្នុងស្រុក ក្រោយពីស៊ុតបញ្ចូលទីមុនពេលត្រូវបានដកឲ្យចេញពីការប្រកួត។
ខ្សែប្រយុទ្ធ Ribery គឺជាបន្លាមួយសម្រាប់ក្រុម Milan ដែលនៅសល់គ្នា ១០ នាក់ នៅពេលអតីតតារាប្រចាំក្លិប Bayern Munich រូបនេះបានប៉ះទង្គិចគ្នាជាមួយកីឡាករ Mateo Musacchio របស់ក្រុម AC Milan ក្នុងការប្រកួតពីថ្ងៃអាទិត្យដែលក្រុម Fiorentina បាននាំមុខ ៣ គ្រាប់ ក្នុងនោះគ្រាប់ទី ៣ រកបានដោយកីឡាករ Ribery ក្នុងនាទីទី ៧៨ មុនពេលកីឡាករ R. Leao រកបាន ១ គ្រាប់ឲ្យក្រុម Milan ក្នុងនាទីទី ៨០។
ឥឡូវនេះខ្សែប្រយុទ្ធជើងចាស់ Ribery មានអាយុ ៣៦ ឆ្នាំហើយ ប៉ុន្តែរូបគេបាននិយាយថា គេស្រឡាញ់ចូលចិត្តបាល់ទាត់ទើបធ្វើឲ្យរូបគេនៅតែមានទម្រង់លេងល្អបែបនេះ។
ខ្សែប្រយុទ្ធបារាំងរូបនេះបានប្រាប់ Sky Sport Italia ថា៖ «ខ្ញុំសប្បាយចិត្តនៅពេលបានលេងនៅកីឡដ្ឋាន San Siro ព្រោះវាតែងតែពិសេស និងជាទីលានធំបំផុតដែលអាចផ្ទុកអ្នកគាំទ្របានជាច្រើន»។
ខ្សែប្រយុទ្ធ Ribery បាននិយាយទៀតថា៖ «វាពិតជាលំបាកបន្តិចសម្រាប់អ្នកគាំទ្រក្រុម AC Milan ឥឡូវនេះ ដោយសារយើងបានបំពេញតួនាទីបានល្អដែលជារឿងសំខាន់សម្រាប់ក្រុមយើង»។
ខ្សែប្រយុទ្ធរូបនេះបានបន្ថែមថា៖ «ខ្ញុំចាស់បន្តិចហើយ ប៉ុន្តែខ្ញុំមានអារម្មណ៍ថា នៅក្មេងនៅលើទីលានប្រកួតព្រោះបាល់ទាត់ គឺជាជីវិតរបស់ខ្ញុំ ហើយខ្ញុំស្រឡាញ់ចូលចិត្តវា។ ខ្ញុំស្រេកឃ្លានចង់ប្រកួតនៅពេលខ្ញុំមកចូលរួមក្រុម Fiorentina ហើយវាធ្វើឲ្យខ្ញុំរំភើបចិត្តដែលបានឃើញក្រុមធ្វើបានល្អបែបនេះ»។
ខ្សែប្រយុទ្ធដដែលនេះបានបន្តទៀតថា៖ «ខ្ញុំបានមកជួយក្លិប Fiorentina កីឡាករ និងអ្នកគាំទ្ររបស់ក្លិបនេះ។ ខ្ញុំសប្បាយចិត្តណាស់ ប៉ុន្តែខ្ញុំត្រូវហ្វឹកហាត់រាល់ថ្ងៃ និងរាល់សប្តាហ៍ គឺដូចជាអ្វីដែលខ្ញុំបានបង្ហាញនៅរាត្រីដ៏អស្ចារ្យនេះឯង»។
កីឡាករ Ribery បានបន្ថែមថា៖ «Federico គឺជាកីឡាករល្អម្នាក់ ហើយខ្ញុំតែងតែជជែកលេងជាមួយគាត់ និងស្ដាប់គាត់ ហើយវាសំខាន់សម្រាប់គាត់ និងសម្រាប់ក្រុមទាំងមូលផងដែរ»។
លោក Vincenzo Montella ជាគ្រូបង្វឹកក្លិប Fiorentina និងជាអតីតគ្រូបង្វឹកក្លិប Milan បានស្រែកខ្លាំងៗពេញ ១ ការប្រកួតនេះដោយកោតសរសើរចំពោះទម្រង់លេងដ៏អស្ចារ្យរបស់កីឡាករ Ribery។
គ្រូបង្វឹកលោក Montella បាននិយាយថា៖ «ខ្ញុំបានដក Ribery ចេញពីការប្រកួតនេះព្រោះខ្ញុំរឹពឹងថា អ្នកគាំទ្រនឹងទទួលបានការទះដៃអបអរចំពោះរូបគាត់»។
គ្រូបង្វឹករូបនេះបានបន្ថែមទៀតថា៖ «គាត់តែងតែចូលរួមការប្រកួត តែងតែមានការសម្រេចចិត្តល្អ និងមានសមត្ថភាពលើសពីការរំពឹងទុកបើទោះជាគាត់មិនមានការផ្លាស់ប្ដូរជំហានដែលគាត់ធ្លាប់ធ្វើកាលពី ៥ ឬ ៦ ឆ្នាំមុនក៏ដោយ»៕ AFP/SN