.jpg)
ឡុងដ៍៖ លោក Brendan Rodgers និយាយសរសើរទម្រង់លេងរបស់ Jamie Vardy ថា មានកម្រិតពិភពលោក ក្រោយខ្សែប្រយុទ្ធរូបនេះបំប៉ោងសំណាញ់ទីដោយក្បាលរបស់ខ្លួន នៅចុងម៉ោង ជួយឱ្យក្រុម Leicester City ឈ្នះ Arsenal ១-០ នៅក្រៅផ្ទះ អំឡុងការប្រកួតក្នុងក្របខ័ណ្ឌ Premier League កាលពីថ្ងៃអាទិត្យ។
Vardy ត្រឹមបានអង្គុយកៅអីកីឡាករបម្រុងប៉ុណ្ណោះ ដោយសារមិនទាន់ជា ១០០ ភាគរយពីរបួសកំភួនជើង តែគ្រូបង្វឹក លោក Rodgers សម្រេចដាក់ឱ្យទៅធ្វើព្យុះភ្លៀងនៅតំបន់ប្រយុទ្ធអំឡុងពេលការប្រកួតនៅសល់ ៣០ នាទី ហើយក៏បានផល ពេលកីឡាករសញ្ជាតិអង់គ្លេស អាចធ្វើបានសម្រេចគ្រាប់ទី៦ របស់ខ្លួន នារដូវកាលនេះ នៅនាទីទី៨០។
Vardy វ័យ ៣៣ ឆ្នាំហាក់មានទម្លាប់ធ្វើឱ្យក្រុមកាំភ្លើងធំឈឺចាប់ ព្រោះបើសរុបគ្រាប់បាល់ដែលគេរកបានក្នុងចំណោមនៃការចូលលេង ១២ លើក នៅ Premier League ទល់ក្រុមរបស់លោក Mikel Arteta មានចំនួន ១១ គ្រាប់ហើយ ខណៈនេះ គឺជាការជួយឱ្យក្រុម Leicester ឈ្នះនៅទឹកដី Arsenal លើកដំបូង គិតតាំងពីឆ្នាំ ១៩៧៣ មក។
លោក Rodgers និយាយដូច្នេះថា៖ «ផែនការរបស់យើងតែងតែដាក់បញ្ចូល Vardy ក្នុងការប្រកួតជានិច្ច។ គេតែងបានរួមចំណែកយ៉ាងធំធេង ក្នុងប្រកួតសំខាន់ៗ។ ទម្រង់នោះ បង្ហាញឱ្យយើងឃើញថា កម្រិតលេងរបស់គេ គឺលំដាប់ពិភពលោក។ ពិតជាសំណាងល្អណាស់ដែលមានកូនក្រុមដូចគេ»។
ជ័យជម្នះនេះ មិនត្រឹមតែរុញ Leicester ឱ្យឡើងទៅលំដាប់ទី៤ ក្នុងតារាងជាមួយនឹង ១២ ពិន្ទុប៉ុណ្ណោះទេ តែថែមទាំងជាការស្ដារមុខមាត់ឡើងវិញ ពីបរាជ័យចំនួន ២ ប្រកួតជាប់ៗគ្នាកន្លងមកផងដែរ។
លោក Rodgers បានបន្តថា៖ «យើងស័ក្តិសមនឹងបានជ័យជម្នះ ពោលគឺយើងបានលេងទល់នឹងក្រុម ដែលមានគុណភាពល្អ និងមានកីឡាករ ដែលអាចលេងពេញកម្លាំងរហូតលើសម៉ោងក៏បាន។ ការរក្សាកុំឱ្យរបូតគ្រាប់បាល់បន្ត និងការលេងប្រកបដោយគុណភាព និងភាពនឹងធឹងគឺជារឿងល្អបំផុត»៕ AFP/VN
