ក្រុងមីឡាន៖ ក្លិប Roma កាលពីថ្ងៃអាទិត្យបានចេញលិខិតសុំទោសចំពោះក្រុមអ្នកគាំទ្ររបស់ខ្លួនពាក់ព័ន្ធនឹងការបៀតបៀនជាតិសាសន៍ទៅលើខ្សែបម្រើអង់គ្លេស Ronaldo Vieira នៅក្លិប Sampdoria ក្នុងការប្រកួតស្មើគ្នា ០-០ នៃក្របខ័ណ្ឌ Serie A។
ក្លិប Roma បាននិយាយតាមប្រព័ន្ធ Twitter ថា៖ «ក្នុងនាមជាក្លិប Roma ទាំងមូល យើងសូមធ្វើការសុំទោសកីឡាករ Ronaldo Vieira ចំពោះការបំពានជាតិសាសន៍ទៅលើរូបគាត់»។
ក្លិបនេះបានបន្ថែមថា៖ «ក្រុម Roma នឹងមិនអនុគ្រោះចំពោះទម្រង់ការបៀតបៀនជាតិសាសន៍គ្រប់រូបភាពទាំងអស់ ហើយក្លិបនេះនឹងគាំទ្រឲ្យក្រុមអាជ្ញាធរកំណត់អត្តសញ្ញាណ និងឃាត់ខ្លួនបុគ្គលណាដែលត្រូវបានរកឃើញថា មានទោសកំហុសពាក់ព័ន្ធនឹងការបៀតបៀនជាតិសាសន៍ចំពោះខ្សែបម្រើរូបនេះ»។
សូមរំឭកថា ជនបង្កហេតុបានស្រែកបែបចំអកសំដៅទៅរកកីឡាករ Vieira អាយុ ២១ ឆ្នាំ នៅចុងតង់ទី ១ នៃការប្រកួតកាលពីថ្ងៃអាទិត្យជាហេតុធ្វើឲ្យគេបានប្រកាសតាមឧបករណ៍បំពងសំឡេងនៅកីឡដ្ឋានឲ្យផ្អាកទង្វើបៀតបៀននោះ ប៉ុន្តែទង្វើនេះមិនបង្កឲ្យផ្អាកការប្រកួតនោះទេ។
កីឡាករជម្រើសជាតិអង់គ្លេសក្រោមអាយុ ២១ ឆ្នាំរូបនេះ កើតនៅប្រទេស ហ្គីណេប៊ីសូ (Guinea Bissau) ប៉ុន្តែរូបគេបានធំដឹងក្ដីនៅប្រទេស ព័រទុយហ្គាល់ និងនៅអង់គ្លេស ហើយបានចូលរួមលេងនៅក្លិប Sampdoria នៅប្រទេស អ៊ីតាលី នៅឆ្នាំ ២០១៨ ក្រោយចេញពីក្លិប Leeds United។
កីឡាករ Vieira បានប្រាប់ទូរទស្សន៍អ៊ីតាលី Rai Sport ថា៖ «រឿងបែបនេះបានកើតឡើងញឹកញាប់ពេកទៅហើយ ដែលវាមិនគួរណាកើតឡើងបែបនេះទេ»។
ក្រោយមកកីឡាករអង់គ្លេសរូបនេះ បានសរសេរតាមប្រព័ន្ធ Instagram ថា៖ «បាល់ទាត់មានការទទួលខុសត្រូវចំពោះការផ្ដន្ទាទោស និងអប់រំមនុស្សអាក្រក់នៅក្នុងកីឡដ្ឋាននៅថ្ងៃនេះ ហើយយ៉ាងណាក៏ដោយ វាជាចំណុចល្អមួយសម្រាប់ក្រុមនេះផងដែរ»។
បន្ទាប់មក ក្រុម Sampdoria បានថ្លែងអំណរគុណក្លិប Roma តាមរយៈប្រព័ន្ធផ្សព្វផ្សាយសង្គមចំពោះសាររបស់ពួកគេ ដោយសរសេរថា៖ «សូមអរគុណ ការរួបរួមគ្នាតែងតែធ្វើឲ្យវិស័យបាល់ទាត់ល្អប្រសើរ គឺរួមគ្នាបញ្ឈប់ការរើសអើងជាតិសាសន៍បែបនេះ»។
បញ្ហារើសអើងជាតិសាសន៍ គឺជាបញ្ហាដែលកើតឡើងជារឿយៗនៅក្នុងវិស័យបាល់ទាត់នៅប្រទេស អ៊ីតាលី។
សូមបញ្ជាក់ថា ក្នុងរដូវកាលនេះដែរ ខ្សែប្រយុទ្ធបែលហ្ស៊ិក Romelu Lukaku លេងនៅក្លិប Inter Milan និងខ្សែបម្រើសញ្ជាតិកូដឌីវ័រ Franck Kessie លេងនៅក្លិប AC Milan បានរងគ្រោះ ដោយការស្រែកចំអកពីក្រុមអ្នកគាំទ្រ ប៉ុន្តែគ្មានទណ្ឌកម្មណាមួយត្រូវបានអនុវត្តនោះឡើយ។
ទន្ទឹមនេះដែរ ក្លិប Atalanta ត្រូវបានពិន័យជាប្រាក់ចំនួន ១០ ០០០ អឺរ៉ូ ប្រហែលចំនួន ១១ ០០០ ដុល្លារអាមេរិក នៅដើមខែនេះពាក់ព័ន្ធនឹងការបៀតបៀនជាតិសាសន៍ដែលក្រុមអ្នកគាំទ្ររបស់ក្លិបនេះបានស្រែកចំអកទៅរកខ្សែការពារប្រេស៊ីល Dalbert នៅក្លិប Fiorentina។
ជាងនេះទៅទៀត កីឡាករ Blaise Matuidi, Kalidou Koulibaly និងកីឡាករ Moise Kean ក៏ធ្លាប់ជាជនរងគ្រោះនៃការបៀតបៀនជាតិសាសន៍កាលពីរដូវកាលមុនផងដែរ៕ AFP/SN