ក្រុងអាសង់ស្យុង: អតីតវីរបុរសរបស់ក្រុមជម្រើសជាតិបាល់ទាត់ប្រេស៊ីល Ronaldinho អាចនឹងត្រូវដោះលែងឲ្យមានសេរីភាព នៅថ្ងៃទី ២៤ ខែសីហា ខាងមុនេះ ក្រោយត្រូវឃុំឃាំងរយៈពេល ៥ ខែ នៅប្រទេសប៉ារ៉ាហ្គាយ ពីបទប្រើប្រាស់លិខិតឆ្លងដែនក្លែងក្លាយ។ នេះបើតាមការឲ្យដឹងពីប្រភពមន្ត្រីតុលាការប្រាប់ AFP កាលពីថ្ងៃចន្ទ។
អតីតកីឡាកររបស់ក្រុមធំៗនៅអឺរ៉ុប ដូចជាក្រុម Barcelona (អេស្ប៉ាញ), ក្រុម AC Milan (អ៊ីតាលី) និង Paris Saint-Germain (បារាំង) ត្រូវបានចាប់ឃុំខ្លួនជាមួយនឹងបងប្រុសរបស់គេ Roberto de Assis Moreira កាលពីថ្ងៃទី ៦ ខែមីនា ដោយត្រូវបានចោទប្រកាន់ថា ចូលប្រទេសប៉ារ៉ាហ្គាយជាមួយនឹងលិខិតឆ្លងដែនក្លែងក្លាយ។
ទាំង ២ នាក់បងប្អូន បានជាប់ពន្ធនាគារ ១ ខែមុន មុននឹងមានការធានាខ្លួន ដោយការចំណាយទឹកប្រាក់ $១,៦ លាន ហើយត្រូវបានដោះលែង ដោយតម្រូវឲ្យមកជាប់ឃុំនៅផ្ទះជំនួសវិញ នៅឯសណ្ឋាគារទំនើប Palmaroga នាក្រុងអាសង់ស្យុង ដែលជារដ្ឋធានីនៃប្រទេសប៉ារ៉ាហ្គាយ។ ពេលនេះ លោកចៅក្រម Gustavo Amarilla បានកំណត់ថ្ងៃទី ២៤ ខែសីហា ដើម្បីធ្វើការជំនុំជម្រះករណីរបស់បងប្អូនទាំង ២ នាក់។
ក្រុមរដ្ឋអាជ្ញាបានធ្វើការស្នើទៅចៅក្រម ដែលនឹងឲ្យលោក Ronaldinho វ័យ ៤០ ឆ្នាំ បង់ប្រាក់ពិន័យ $៩០ ០០០ ដើម្បីប៉ះប៉ូវការខូខាតផ្នែកសង្គម តែអនុញ្ញាតឲ្យត្រឡប់ទៅផ្ទះនៅឯប្រទេសកំណើតវិញ ដែលនៅទីនោះ រូបគេត្រូវបង្ហាញខ្លួននៅចំពោះមុខចៅក្រមរៀងរាល់ ៣ ខែម្ដង រយៈពេល ១ ឆ្នាំ។
យ៉ាងណាអតីតកីឡាករឆ្នើម Ronaldinho មកទល់ពេលនេះ នៅតែបដិសេធមិនដឹងមិនឮរឿងលិខិតឆ្លងដែនហ្នឹង ខណៈបងប្រុសរបស់គេដែលត្រូវបានចោទថា ដឹងរឿងនេះនឹងត្រូវបង់ប្រាក់ពិន័យ $១១០ ០០០ ហើយត្រូវមកបង្ហាញវត្តមាននៅចំពោះមុខតុលាការរៀងរាល់ ៣ ខែម្ដង រយៈពេល ២ ឆ្នាំ។
បងប្អូនទាំង ២ នាក់ បានធ្វើដំណើរមកដល់ប្រទេសប៉ារ៉ាហ្គាយ នៅថ្ងៃទី ៤ ខែមីនា ដោយគ្មានបញ្ហាអ្វីឡើយ ដោយលោក Ronaldinho ដែលជាអតីតម្ចាស់ជយលាភីពាន Ballon d''Or ឆ្នាំ ២០០៥ ត្រៀមចូលរួមកម្មវិធីដែលធ្វើឡើង ដើម្បីគាំទ្រក្មេងៗក្រីក្រ តែភ្លាមៗ ក្រោយពីការមកដល់ហ្នឹង ពួកគេក៏ត្រូវបាននាំខ្លួនទៅកាន់មន្ទីរឃុំឃាំងរបស់ប៉ូលិស ពេលមានក្រុមអ្នកស៊ើបសម្រុកចោលសណ្ឋាគាររបស់ពួកគេ ក្រោយរកឃើញថា ២ នាក់បងប្អូនហ្នឹង បានក្លែងបន្លំឯកសារ៕ AFP/VN