.jpg)
Cristiano Ronaldo បានវិលទៅកាន់ទីក្រុងម៉ាឌ្រីដវិញ ដើម្បីបង្ហាញខ្លួនក្នុងសវនាការមួយកាលពីថ្ងៃម្សិលមិញ។ AFP
Cristiano Ronaldo បានវិលទៅកាន់ទីក្រុងម៉ាឌ្រីដវិញ ដើម្បីបង្ហាញខ្លួនក្នុងសវនាការមួយកាលពីថ្ងៃម្សិលមិញ ខណៈដែលរូបគេអាចនឹងរងពិន័យជាទឹកប្រាក់ ១៨,៨ លានអឺរ៉ូ (ស្មើនឹង ២១,៤ លានដុល្លារអាមេរិក) សម្រាប់ការបន្លំការបង់ពន្ធដែលជាផ្នែកមួយនៃការព្រមព្រៀងគ្នាមួយជាមួយនឹងមន្ត្រីពន្ធដារអេស្ប៉ាញ។
ក្នុងនាមជាផ្នែកនៃការព្រមព្រៀងគ្នាមួយដែលត្រូវបានរៀបចំឡើងកាលពីខែមិថុនាជាមួយនឹងមេធាវីរបស់វីរបុរសនៃក្លិប Real Madrid រូបនេះមន្ត្រីរដ្ឋអាជ្ញាក៏បានស្នើសុំថា ខ្សែប្រយុទ្ធអន្តរជាតិព័រទុយហ្គាល់រូបនេះដែលបានចាកចេញពីក្លិបយក្សរបស់អេស្ប៉ាញទៅកាន់ក្លិប Juventus របស់អ៊ីតាលីកាលពីរដូវក្តៅមុននោះគួរតែរងនូវការកាត់ទោសឲ្យជាប់គុករយៈពេល ២៣ ខែ។
ប៉ុន្តែ Ronaldo នឹងមិនចំណាយពេលសូម្បីតែ ១ ថ្ងៃក្នុងគុកឡើយ ខណៈការកាត់ទោសឲ្យជាប់គុកតិចជាង ២ ឆ្នាំជាទូទៅត្រូវបានព្យួរនៅអេស្ប៉ាញសម្រាប់ការប្រព្រឹត្តកំហុសជាលើកទី ១ ក្នុងបទឧក្រិដ្ឋគ្មានអំពើហិង្សា៕ IS
