ក្រុងមីឡាន៖ ខ្សែប្រយុទ្ធ Cristiano Ronaldo និងកីឡាករ Miralem Pjanic បានជួយឲ្យក្រុម Juventus ឈ្នះក្រុម Bologna ២-១ ដើម្បីឈរនៅលើកំពូលតារាងនៃក្របខ័ណ្ឌអ៊ីតាលី Serie A កាលពីថ្ងៃសៅរ៍។
កីឡាករ Ronaldo បានបើកឆាក ១ គ្រាប់ នៅនាទីទី ១៩ ជាគ្រាប់បាល់ទី ៧០១ របស់ខ្លួនក្នុងប្រកួតទាំងអស់ ហើយកីឡាករ Danilo រកបាន ១ គ្រាប់វិញ សម្រាប់ក្រុម Bologna ក្នុងនាទីទី ២៦ ប៉ុន្តែនៅនាទីទី ៥៤ កីឡាករ Pjanic បានបន្ថែម ១ គ្រាប់ទៀត ឲ្យម្ចាស់ជើងអ៊ីតាលីធ្វើឲ្យឈ្នះ Bologna ២-១។
ជ័យជម្នះនេះបានធ្វើឲ្យក្លិប Juve មាន ២២ ពិន្ទុក្នុង ៨ ប្រកួត និងកំពុងនាំមុខដាច់ ៤ ពិន្ទុទៅលើក្រុម Inter Milan ដែលឈរនៅលេខ ២ ជាមួយការនៅសល់ ១ ប្រកួតទៀត។
ចំណែកក្រុម Atalanta ស្ថិតនៅលេខទី ៣ ក្រោយពីបានខ្ជះខ្ជាយគ្រាប់បាល់នាំមុខ ៣ គ្រាប់ដោយធ្វើឲ្យក្រុម Lazio បានតាមស្មើវិញ ៣-៣ ខណៈក្រុម Napoli បានឈរនៅលេខ ៤ នៅក្នុងក្របខ័ណ្ឌ Serie A នេះដែរ។
គ្រូបង្វឹកក្លិប Juventus លោក Maurizio Sarri ដែលក្រុមរបស់គាត់នឹងស្វាគមន៍ក្រុម Lokomotiv Moscow ក្នុងការប្រកួតក្របខ័ណ្ឌ Champions League នៅថ្ងៃអង្គារ បាននិយាយថា៖ «នេះជាផ្លូវត្រឹមត្រូវហើយ ប៉ុន្តែយើងត្រូវធ្វើការបន្តថែមទៀត ព្រោះវាជាការប្រកួតល្អមួយមែន ប៉ុន្តែយើងនៅតែមានកំហុសខ្លះៗនៅឡើយ»។
គ្រូបង្វឹកក្រុម Bologna លោក Sinisa Mihajlovic បានត្រឡប់ទៅចូលរួមការប្រកួតនេះនៅក្នុងទីក្រុងទូរីន ប្រទេស អ៊ីតាលី ក្រោយពីបានសម្រាកព្យាបាលជំងឺមហារីករបស់គាត់ជាលើកទី ២ រួចហើយ។
ចំណែកគ្រូបង្វឹកក្រុម Atalanta លោក Gian Piero Gasperini បាននិយាយដោយធ្វើការរិះគន់ថា៖ «ជាការពិន័យបាល់ ១១ ម៉ែត្រ គឺគ្មាននរណាអាចយល់ពីរឿងមួយនេះទេសព្វថ្ងៃនេះ»។
ទន្ទឹមនេះដែរ ក្លិប Barcelona បានត្រឡប់ទៅឈរលើកំពូលតារាងជាថ្មីពីថ្ងៃសៅរ៍ ប៉ុន្តែបានចោទជាបញ្ហាសម្រាប់ក្រុម Real Madrid ក្រោយពីបានចាញ់ជាលើកដំបូងក្នុងប្រកួតជាមួយក្រុម Real Mallorca ក្នុងក្របខ័ណ្ឌអេស្ប៉ាញ La Liga នៅរដូវកាលនេះ។
ក្លិប Barcelona បានប្រកួតឈ្នះក្លិប Eibar ៣-០ ដែលគ្រាប់ទី ១ រកបានដោយកីឡាករ Griezmann ទី ២ ដោយកីឡាករ Messi និងទី ៣ គឺជារបស់កីឡាករ Suarez។
ចំណែកកីឡាករ L. Junior រកបានតែ ១ គ្រាប់ ក្នុងនាទីទី ៧ ដើម្បីជួយឲ្យក្រុម Mallorca ឈ្នះក្រុម Madrid របស់លោក Zinedine Zidane ពីថ្ងៃសៅរ៍។
គ្រូបង្វឹកលោក Zidane បាននិយាយថា៖ «បញ្ហាគឺថា យើងត្រូវបង្ហាញរាល់ ៣ ថ្ងៃម្ដងពីទម្រង់លេងល្អរបស់យើង ប៉ុន្តែនោះជាអ្វីមួយដែលយើងមិនចង់បាននោះទេ គឺយើងត្រូវតែមានទំនុកចិត្ត។ យើងត្រូវតែដាក់ជីវិតរបស់យើងឲ្យខ្លាំងថែមទៀតនៅក្នុងការប្រកួតរបស់យើងប្រសិនបើយើងចង់សម្រេចបានអ្វីមួយនៅក្នុងរដូវកាលនេះ»៕ AFP/SN