ក្រុងម៉ូស្គូ: Cristiano Ronaldo នឹងខិតខំព្យាយាមស្វែងរកទម្រង់លេងដ៏ល្អឥតខ្ចោះរបស់គេដូចក្នុងការប្រកួតបើកឆាកនៃ World Cup សម្រាប់ក្រុមបាល់ទាត់ជម្រើសជាតិព័រទុយហ្គាល់ នៅពេលប្រកួតជាមួយនឹងក្រុមជម្រើសជាតិម៉ារ៉ុក ដែលកំពុងតែឈឺចាប់ ក្រោយពីការចាញ់នៅនាទីចុងក្រោយ។
ការស៊ុតបាល់បញ្ចូលទី ៣ គ្រាប់ពីសំណាក់កីឡាករឆ្នើមប្រចាំឆ្នាំរបស់ពិភពលោក ៥ សម័យកាលរូបនេះ បានដណ្តើមយកលទ្ធផលស្មើ ៣-៣ សម្រាប់ក្រុមម្ចាស់ជើងឯកទ្វីបអឺរ៉ុបព័រទុយហ្គាល់ នៅពេលប្រកួតជាមួយនឹងក្រុមអេស្ប៉ាញ ក្នុងការប្រកួតដ៏សំខាន់ក្នុងពូល B ក្នុងទីក្រុង Sochi។
វាជាការរកបានគ្រាប់បាល់ ៣ គ្រាប់ក្នុង ១ ប្រកួតជាលើកទី ៥១ របស់ Ronaldo និងជាលើកទី ៥១ ក្នុងប្រវត្តិសាស្ត្រនៃយុទ្ធនាការនេះ ខណៈដែលតារាឆ្នើមរបស់ Real Madrid រូបនេះ បានក្លាយជាកីឡាករទី ៤ ក្នុងការស៊ុតបាល់បញ្ចូលទីក្នុងយុទ្ធនាការ World Cup ៤ លើក។
Ronaldo បានឲ្យដឹងថា៖ «ខ្ញុំពិតជារីករាយណាស់។ វាជាកំណត់ត្រាផ្ទាល់ខ្លួនដ៏ល្អមួយ ហើយវានឹងមានច្រើនបន្ថែមទៀតក្នុងអាជីពរបស់ខ្ញុំ។ សម្រាប់ខ្ញុំ រឿងដ៏សំខាន់បំផុតគឺការផ្តោតលើអ្វីដែលក្រុមបានធ្វើនៅពេលប្រកួតជាមួយនឹងក្រុមមួយក្នុងចំណោមក្រុមមានក្តីសង្ឃឹមច្រើនក្នុងការឈ្នះពាន World Cup»។
បើទោះបីបានលើកពាន Euro ឆ្នាំ ២០១៦ ក៏ដោយ ប៉ុន្តែ ក្រុមជម្រើសជាតិព័រទុយហ្គាល់ មិនត្រូវបានចាត់ទុកថា ស្ថិតក្នុងចំណោមក្រុមមានក្តីសង្ឃឹមច្រើនក្នុងការឈ្នះពាននៅរុស្ស៊ីឡើយ ប៉ុន្តែ អាចនឹងបោះជំហានដ៏ធំឆ្ពោះទៅកាន់វគ្គ ១៦ ក្រុមចុងក្រោយ តាមរយៈការយកឈ្នះលើក្រុមជម្រើសជាតិម៉ារ៉ុក ក្នុងទីក្រុងម៉ូស្គូ នៅរាត្រីនេះ។
នៅឯទីលានហ្វឹកហាត់របស់ព័រទុយហ្គាល់ ខ្សែប្រយុទ្ធ Andre Silva បានឲ្យដឹងថា៖ «ខ្ញុំគិតថា យើងជាក្រុមខ្លាំងជាងម៉ារ៉ុក ប្រសិនបើយើងប្រៀបធៀបរវាងក្រុមទាំង ២ ប៉ុន្តែ ខ្ញុំមិនមែនកំពុងតែនិយាយថា ការប្រកួតនេះនឹងងាយស្រួលសម្រាប់យើងឡើយ»។
វានឹងក្លាយជាការជួបគ្នាជាលើកទី ២ រវាងក្រុមទាំង ២ ក្រោយពីក្រុមជម្រើសជាតិម៉ារ៉ុក បានផ្តួលក្រុមជម្រើសជាតិព័រទុយហ្គាល់ ៣-១ ក្នុងវគ្គចែកពូល ក្នុង World Cup ឆ្នាំ ១៩៨៦។
Suarez សម្លឹងរកការស្តារមុខមាត់ក្នុង World Cup ពេលប៉ះអារ៉ាប៊ីសាអ៊ូឌីត រាត្រីនេះ
សម្រាប់កីឡាករម្នាក់ដែលបានបង្កើតឲ្យមានការចាប់អារម្មណ៍ជាច្រើនក្នុងយុទ្ធនាការ World Cup វាគឺជារឿងដ៏ស័ក្តិសមដែលខ្សែប្រយុទ្ធ Luiz Suarez នឹងធ្វើការបង្ហាញខ្លួនជាលើកទី ១០០ របស់គេសម្រាប់ក្រុមបាល់ទាត់ជម្រើសជាតិអ៊ុយរូហ្គាយ ក្នុងព្រឹត្តិការណ៍ដ៏ធំបំផុតនៃកីឡាបាល់ទាត់។
តារាឆ្នើមរបស់ក្លិប Barcelona រូបនេះ នឹងឈានដល់ការប្រកួតជាលើកទី ១០០ របស់គេសម្រាប់ក្រុមបាល់ទាត់ជម្រើសជាតិអ៊ុយរូហ្គាយ នៅរាត្រីថ្ងៃពុធនេះ នៅពេលដែលពួកគេប៉ះជាមួយនឹងក្រុមជម្រើសជាតិអារ៉ាប៊ីសាអ៊ូឌីត ក្នុងទីក្រុង Rostovon-Don ក្នុងការប្រកួតជុំទី ២ នៃពូល A។
ការប្រកួតនេះគួរតែមានភាពងាយស្រួល និងអាចនឹងជួយឲ្យក្រុមជម្រើសជាតិអ៊ុយរូហ្គាយ ឈ្នះសិទ្ធិទៅវគ្គ ១៦ ក្រុមចុងក្រោយ ប៉ុន្តែ ក្រោមជំនួយដ៏ធំពី Suarez អ្នកគាំទ្រកីឡាបាល់ទាត់ ដឹងថា មានចំណុចតិចតួចណាស់ដែលមិនស្ថិតក្នុងការចាប់អារម្មណ៍។
កាលពីឆ្នាំ ២០១០ ខ្សែប្រយុទ្ធរូបនេះ បានរងការពិន័យកាតក្រហម ក្រោយពីសង្គ្រោះបាល់នៅនាទីចុងក្រោយពេលប្រកួតជាមួយនឹងក្រុមជម្រើសជាតិហ្គាណា ដែលបានជួយឲ្យក្រុមខ្លួនគេចផុតពីបរាជ័យ ធ្វើឲ្យក្រុមអាមេរិកខាងត្បូងមួយនេះ ទៅវគ្គ ៤ ក្រុមចុងក្រោយ។ រយៈពេល ៤ ឆ្នាំក្រោយមក រូបគេបានបង្កើតឲ្យមានការចាប់អារម្មណ៍មួយផ្សេងទៀត តាមរយៈការខាំខ្សែការពារ Giorgio Chiellini ក្នុងពេលប្រកួតជាមួយនឹងអ៊ីតាលី នៅប្រេស៊ីល៕