.jpg)
ខ្សែប្រយុទ្ធ Ronaldo អង្គុយសំដិលថ្ងៃ មើលមិត្តរួមក្រុមហ្វឹកហាត់ ក្រោយតេស្តវិជ្ជមានជំងឺកូវីដ ១៩។ សហការី
ក្រុងលីសបោន៖ តារាឆ្នើមរបស់ព័រទុយហ្គាល់ និងក្រុមសេះបង្កង់ Juventus (Juve) Cristiano Ronaldo ត្រូវបានគេប្រាប់ថា មានសុខភាពល្អ និងអាចសំដិលថ្ងៃជាធម្មតាពីថ្ងៃអង្គារ ក្រោយធ្វើតេស្តវិជ្ជមានវីរុសកូរ៉ូណា ដែលធ្វើឱ្យរូបគេ ត្រូវខកខានមិនបានចូលរួមជួយក្រុមជម្រើសជាតិព័រទុយហ្គាល់ នៅក្នុងការប្រកួតពាន Nations League ជាមួយក្រុមស៊ុយអែតនៅយប់រំលងអធ្រាត្រឈានចូលថ្ងៃពហស្បតិ៍នេះ។
សហព័ន្ធបាល់ទាត់ជាតិព័រទុយហ្គាល់ បានឱ្យដឹងតាមវេបសាយរបស់ខ្លួនថា៖ «Ronaldo មិនមានអាការអ្វីធ្ងន់ធ្ងរឡើយ ហើយនឹងមិនបានចូលលេងពេលក្រុមប៉ះស៊ុយអែតនោះទេ សម្រាប់ការប្រកួត Nations League»។
ម្ចាស់ជយលាភីពានរង្វាន់ Ballon d''Or ៥ លើក Ronaldo បានចូលលេងក្នុងការប្រកួត Nations League នៅពេលក្រុមព័រទុយហ្គាល់បានស្មើ ០-០ ជាមួយក្រុមម្ចាស់ផ្ទះបារាំង នៅក្រុងប៉ារីស កាលពីថ្ងៃអាទិត្យ គឺនៅមុនតេស្តវិជ្ជមានជំងឺកូវីដ ១៩ នេះ ប៉ុន្តែចំពោះសមាជិកក្នុងក្រុមផ្សេងទៀត ត្រូវបានសហព័ន្ធប្រាប់ថា អវិជ្ជមានទាំងអស់ ក្រោយការធ្វើតេស្តកាលពីព្រឹកថ្ងៃអង្គារនោះ គឺដូចគ្នាទៅនឹងកីឡាកររបស់ក្រុមជម្រើសជាតិបារាំងដែរ។ នេះបើយោងតាមសហព័ន្ធបាល់ទាត់បារាំង។
គ្រូបង្វឹករបស់ព័រទុយហ្គាល់ លោក Fernando Santos បានប្រាប់នៅឯសន្និសីទកាសែតថា៖ «យើងគោរពតាមគោលការណ៍សុខភាពគ្រប់យ៉ាង តែវានៅតែកើតឡើងបាន។ យើងបានធ្វើតេស្តរាល់ថ្ងៃ»។
ជាមួយគ្នានេះ ខ្សែការពារ Giorgio Chiellini របស់ក្រុម Juve ដែលបានទាក់ទងទៅ Ronaldo ដោយផ្ទាល់នោះ បានប្រាប់ថា៖ «គេសុខភាពល្អធម្មតា និងកំពុងដេកហាលថ្ងៃទៀតផង។ គេនឹងត្រឡប់មកវិញ ពេលគេត្រៀមខ្លួនបានរួចរាល់»។
ការឆ្លងជំងឺរបស់កីឡាករវ័យ ៣៥ ឆ្នាំ Ronaldo ជាដំណឹងដ៏អាក្រក់មួយ សម្រាប់ក្រុមសេះបង្កង់ ខណៈគោលការណ៍សុខភាពមានធរមាននៅឡើយ សម្រាប់ក្របខ័ណ្ឌ Serie A ដូច្នេះ Ronaldo ត្រូវតែនៅដាច់ដោយឡែករយៈពេល ១០ ថ្ងៃ ហើយបន្ទាប់មកត្រូវបញ្ជាក់ពីតេស្តអវិជ្ជមាន មុននឹងអាចចាប់ផ្ដើមចូលលេងឡើងវិញបាន។
តេស្តនោះ នឹងធ្វើឱ្យ Ronaldo មិនអាចទៅរត់លើទីលានបាននោះឡើយ ពេលក្រុម Juve ធ្វើការប្រកួតជាមួយក្រុម Crotone នៅ Serie A នាថ្ងៃសៅរ៍ចុងសប្ដាហ៍នេះ និងមិនអាចធ្វើដំណើរជាមួយក្រុមទៅផ្ទះ Dynamo Kiev សម្រាប់ប្រកួតបើកឆាកនៅក្របខ័ណ្ឌ Champions League ក្នុងវគ្គសន្សំពិន្ទុតាមពូលដែរ។
Ronaldo ក៏អាចបាត់មុខ នៅ Champions League ដដែលនេះ ពេលតទល់ជាមួយនឹងក្រុម Barcelona នៅថ្ងៃទី ២៨ ខែតុលា ដែលការប្រកួតនោះ គេនឹងឃើញការប្រឈមមុខគ្នាជាលើកដំបូង ជាមួយកីឡាករគូសត្រូវចាស់ Lionel Messi គិតតាំងពីចាកចេញពីទឹកដីអេស្ប៉ាញ។
កីឡាករ Chiellini បាននិយាយបន្ថែមថា៖ «យើងទាំងអស់គ្នា ជាអត្តពលិកបាល់ទាត់ ដឹងច្បាស់ថា យើងប្រឈមនឹងគ្រោះថ្នាក់ខ្លាំង ហើយយើងត្រៀមខ្លួនទទួលយកជានិច្ច តែយើងព្យាយាមកាត់បន្ថយហានិភ័យឱ្យនៅទាបបំផុតតាមដែលអាច ដោយការអនុវត្តតាមគោលការណ៍សុវត្ថិភាពចាំបាច់ទាំងអស់គ្នា»។
Ronaldo ដែលធ្លាប់ពាក់ឯកសណ្ឋានរបស់ក្រុម Manchester United និង Real Madrid ដែរនោះ គឺជាកីឡាករបាល់ទាត់ដ៏ល្បីល្បាញចុងក្រោយគេ ដែលធ្វើតេស្តវិជ្ជមាននៃជំងឺកូវីដ ១៩ ដែលបានឆក់ជីវិតមនុស្សជាង ១ លាននាក់ គិតតាំងពីកើតមានដំបូងនៅដើមឆ្នាំនេះ។
កីឡាករឆ្នើមៗផ្សេងទៀត នៅមុនហ្នឹង មានដូចជា ខ្សែប្រយុទ្ធសញ្ជាតិប្រេស៊ីល Neymar រួមទាំងមិត្តរួមក្រុម Paris Saint-Germain របស់គេ គឺកីឡាករបារាំង Kylian Mbappe និងខ្សែប្រយុទ្ធ Zlatan Ibrahimovic របស់ក្រុម AC Milan សុទ្ធតែបានឆ្លងជំងឺផ្លូវដង្ហើមថ្មីដូចគ្នា នៅប៉ុន្មានសប្ដាហ៍ថ្មីៗនេះ៕ AFP/VN
