ក្រុងប៊ែរឡាំង៖ គ្រូបង្វឹកក្រុម Borussia Moenchengladbach លោក Marco Rose នឹងប្រឈមជាមួយក្រុម Borussia Dortmund ដែលខ្លួននឹងទៅដឹកនាំ នាពេលខាងមុខ ក្នុងជំនួប German Cup វគ្គ ៨ ក្រុមចុងក្រោយ នៅយប់ថ្ងៃអង្គារ ខណៈក្រុមលំដាប់កំពូលៗ កំពុងសម្លឹងមើលពីឱកាសដ៏កម្រនេះ ដើម្បីឈ្នះពាន ពេល Bayern Munich អវត្តមាន។
បេក្ខភាពដែលឆ្លងមកវគ្គ ៨ ក្រុម ១០ រដូវកាលចុងក្រោយ និងឈ្នះជើងឯកសរុប ២០ ដង គឺ Bayern ក្រុមដែលមានសិទ្ធិខ្ពស់ជាងគេ ធ្លាក់ចេញពីការប្រជែងលឿនបំផុតលើកដំបូង តាំងពីឆ្នាំ ២០១១ ដោយសាររងបរាជ័យក្នុងវគ្គទាត់បាល់ប៉េណាល់ទី អំឡុងប្រកួតជុំទី ២ កាលពីខែមករា ក្រោមថ្វីជើងក្រុមកម្រិតទាប Holstein Kiel នៅលីគលំដាប់ទី២។
លទ្ធផលនោះ ធ្វើឱ្យការប្រកួតប្រជែងដណ្ដើមពានកម្រិតទី២ បើកចំហខ្លាំងឡើង ហើយផ្ដល់ឱកាសល្អបំផុតឱ្យក្រុមគូប្រជែង ដូចជា Dortmund, Gladbach និង RB Leipzig ជាដើម អាចឈ្នះពានរង្វាន់ម្ដង ក្នុងរយៈពេលជាច្រើនឆ្នាំមកនេះ។
សម្រាប់លោក Rose ការប្រកួតនាថ្ងៃអង្គារ ជាឱកាសស្រោចស្រង់នារដូវកាលចុងក្រោយ ដែលកំពុងឡើងចុះ មុនទៅចូលរួមជាមួយ Dortmund នៅបញ្ចប់រដូវកាលនេះ។
បន្ទាប់ពីដឹកនាំក្រុមបច្ចុប្បន្នរបស់ខ្លួន ឱ្យបញ្ចប់នៅចំណាត់ថ្នាក់ក្នុងចំណោមក្រុមទីកំពូលទាំង ៤ រដូវកាលមុន និងឱ្យបានឆ្លងដល់ដំណាក់កាលចាញ់ធ្លាក់ នៅ Champions League នារដូវកាលនេះ បុរសសញ្ជាតិអាល្លឺម៉ង់វ័យ ៤៤ ឆ្នាំ ធ្វើឱ្យក្រុមធ្លាក់ដល់លេខ ៨ ក្នុងតារាងពិន្ទុក្របខ័ណ្ឌ Bundesliga ក្រោយចាញ់ ៤ លើក ក្នុងចំណោម ៥ ប្រកួតចុងក្រោយនៅលីគ។
Rose ទទួលសម្ពាធកាន់ខ្លាំងឡើងៗ ក្រោយពីគាត់បានប្រកាសពីចេតនាចង់ទៅចូលរួមជាមួយ Dortmund កាលពីដើមខែនេះ ដោយមានអ្នកគាំទ្រ និងអ្នកវិភាគមួយចំនួនអំពាវនាវឱ្យគាត់ចុះចេញពីតួនាទី។
តែកាលពីថ្ងៃសៅរ៍ គាត់បានច្រានចោលនូវការយល់ឃើញដែលថា នឹងមានជម្លោះផលប្រយោជន៍ ពេល Gladbach ជួបពិភាក្សាជាមួយ Dortmund នាសប្ដាហ៍នេះ។
«វាគ្មានបញ្ហាលំបាកអ្វីទាំងអស់សម្រាប់ខ្ញុំ។ ខ្ញុំជាគ្រូបង្វឹករបស់ Borussia Moenchengladbach។ ខ្ញុំមានគោលដៅជាមួយក្លិបនេះ ហើយខ្ញុំទទួលខុសត្រូវ ដើម្បីឱ្យមានភាពជោគជ័យសម្រាប់ក្រុម និងកីឡាកររបស់ខ្ញុំ»។ នេះជាសម្ដីរបស់ Rose ដែលប្រាប់ទូរទស្សន៍ Sky នៅអាល្លឺម៉ង់។
ជ័យជម្នះលើ Dortmund នឹងធ្វើឱ្យ Gladbach រំកិលទៅមុខ ១ ជំហានយ៉ាងធំកៀកនឹងការឈ្នះពានរង្វាន់ដ៏សំខាន់មួយ តាំងពីឆ្នាំ ១៩៩៥ ដែលពួកគេបានលើកពានកម្មវិធីនេះ ជាលើកចុងក្រោយ។
ជាមួយគ្នានេះ Dortmund សង្ឃឹមបានដាក់ដៃលើពាននេះ លើកទី៣ ក្នុងទសវត្សរ៍ចុងក្រោយនេះ ខណៈ Leipzig សម្លឹងមិនដាក់ភ្នែកចំពោះពានដែលខ្លួនចង់ឈ្នះលើកដំបូង។
ក្រុមលេខ ២ ក្នុងតារាងលីគកំពូល និងឡើងដល់វគ្គផ្ដាច់ព្រ័ត្រក្នុងឆ្នាំ ២០១៩ Leipzig ត្រូវគេចាត់ទុកថា មានសិទ្ធិខ្ពស់គួរសមក្នុងការឈ្នះពាន German Cup ឬ DFB Cup នេះ មុនប្រឈម Wolfsburg នៅយប់ថ្ងៃពុធ៕ AFP/VN