ភ្នំពេញៈ ការប្រកួតកីឡាសិស្សថ្នាក់ជាតិលើកទី ១ ឆ្នាំ ២០២៩ (School Game 2019) នឹងបើកការប្រកួតជាផ្លូវការនៅថ្ងៃអង្គារ ហើយព្រឹត្តិការណ៍ដែលមាន ការចូលរួមពីកីឡាករ កីឡាការិនី ជាសិស្សានុសិស្សតំណាងមកពី ២៥ ខេត្ត-ក្រុងនោះត្រូវបានថ្នាក់ដឹកនាំក្រសួងអប់រំ យុវជន និងកីឡាចាត់ទុកថា គឺជាការប្រកួតយ៉ាងសំខាន់ដើម្បីស្វែងរកអត្តពលិកវ័យក្មេងមានទេពកោសល្យ និងសមត្ថភាពត្រៀមឆ្ពោះទៅចូលរួមការប្រកួតស៊ីហ្គេមឆ្នាំ ២០២៣ នៅប្រទេសកម្ពុជា។
លោក ស សុខា រដ្ឋលេខាធិការក្រសួងអប់រំ យុវជន និងកីឡាបានថ្លែងថា៖ «ការប្រកួតកីឡាសិស្សថ្នាក់ជាតិជាលើកដំបូងនេះជាការផ្តល់ឱកាសនឹងជាឧបករណ៍វាស់ម៉ែត្រទៅដល់គ្រប់កីឡាករ កីឡាការិនីទាំងអស់ដើម្បីឲ្យពួកគេបានដឹងពីសមត្ថភាពផ្ទាល់ខ្លួន ហើយពួកគេក៏ជាគ្រាប់ពូជ និងគ្រាប់ពេជ្ររបស់កម្ពុជាដែលយើងត្រូវជំរុញឲ្យពួកគេទៅដល់ស៊ីហ្គេមឆ្នាំ ២០២៣ ផងដែរ»។
ការលើកឡើងរបស់លោក ស សុខា ត្រូវបានធ្វើឡើងកាលពីថ្ងៃព្រហស្បតិ៍សប្តាហ៍មុន បន្ទាប់ពីលោកបានប្រជុំជាមួយភាគីពាក់ព័ន្ធរួចរាល់ក្នុងថ្ងៃជាមួយគ្នានោះ ហើយលោក និងគណៈកម្មការរៀបចំសុទ្ធតែបានអះអាងថា School Game នឹងដំណើរទៅដោយយុត្តិធម៌ ព្រោះរាល់បញ្ហា និងភាពមិនប្រក្រតី ដូចជាការបន្លំអាយុ និងការយកអ្នកខាងក្រៅ មិនមែនជាសិស្សមកប្រកួតត្រូវបានលុបបំបាត់អស់ហើយ។
លោក ស សុខា បានបន្ថែមថា៖ «ការរៀបចំក៏ដូចជាការផ្តល់ឱកាសនេះ ក្នុងនាមក្រសួងអប់រំ និងថ្នាក់ដឹកនាំទាំងអស់តែងតែស្វែងរកបញ្ហាប្រឈមនឹងអ្វីដែលថ្មីក្នុងការផ្លាស់ប្តូរ ជាពិសេសយើងចង់ផ្តល់ឲ្យគណៈកម្មការរបស់យើង បានរៀនសូត្រពីខ្លួនឯង និងស្វែងយល់ពីច្បាប់ល្បែងថ្មីបន្ថែមទៀត ដើម្បីជាក្បាលម៉ាស៊ីន រុញសកម្មភាពកីឡាឲ្យដល់ថ្នាក់ខេត្ត អ៊ីចឹងនៅរាល់បញ្ហាដែលបានកើតមានឡើងយើងត្រូវតែកាន់បន្ថយ ឬហៅថាកាត់សាច់របស់យើង ដើម្បីធ្វើម៉េចឲ្យវិស័យកីឡារបស់យើងមានភាពរលូនទៅមុខ ព្រោះពេលវេលារបស់យើងមានពេលកំណត់»។
តាមគណៈកម្មការរៀបចំបានឲ្យដឹងថា School Game 2019 ដែលចាប់ផ្តើមពីថ្ងៃទី ១០ រហូតដល់ថ្ងៃទី ១៩ ខែមិថុនា នោះមានប្រតិភូ គ្រូបង្វឹក និងអត្តពលិកចូលរួមសរុប ៣៣៩០ នាក់ និងមានមន្ត្រីរៀបចំការប្រកួតចំនួន ៣៩០ នាក់សម្រាប់គ្រប់គ្រងការប្រកួតចំនួន ១១ ប្រភេទ ហើយប្រតិភូទាំងនេះត្រូវបានរៀបចំឲ្យមានការហូកចុកនៅសណ្ឋាគារឡាក់គីស្តា និងស្នាក់នៅផ្ទះសំណាក់ចំនួន ១៣ មាន ៨២៥ បន្ទប់ដោយមានគ្រូពេទ្យ កម្លាំងសន្តិសុខ និងមានក្រុមបដិសណ្ឋារកិច្ច ដើម្បីប្រចាំការសម្របសម្រួលយ៉ាងល្អ។
តំណាងសហព័ន្ធកីឡាជាតិចំនួន ៤ មានបាល់ទាត់ បាល់ទះ បាល់បោះ និងកីឡាតេក្វាន់ដូ ITF នឹងធ្វើការប្រជុំប្រធានបច្ចេកទេសនៅថ្ងៃចន្ទនេះ ដើម្បីត្រៀមលក្ខណៈបើកការប្រកួតជាផ្លូវការដែលត្រូវធ្វើនៅថ្ងៃអង្គារ ចំណែកប្រភេទកីឡាចំនួន ៧ ដែលត្រូវដាក់ឲ្យប្រកួតប្រជែងជាបន្តបន្ទាប់ក្នុងព្រឹត្តិការណ៍នេះដែរ មានអត្តពលកម្ម ហែលទឹក ប៉េតង់ វាយកូនឃ្លីលើតុ វាយសី តេក្វាន់ដូ WTF និងការ៉ាតេ។
លោក ស សុខា បានបញ្ជាក់ថា៖ «សុបិនរបស់យើងនៅពេលនេះគឺនៅឆ្នាំ ២០២៣ យើងចង់បង្ហាញភាពអស្ចារ្យរបស់កម្ពុជាយើង អ៊ីចឹងយើងត្រូវចាប់ផ្តើមកសាងធនធានមនុស្សពីស្រទាប់យុវជននេះទៅ ដើម្បីរុញឲ្យពួកគាត់ ចូលរួមបន្តនៅក្នុងក្រុមធំជម្រើសជាតិ ហើយការជ្រើសរើសថ្នាលនេះគឺយើងគួរជ្រើសរើសឲ្យត្រូវជំនាញ ព្រោះបើកីឡាករម្នាក់ចាប់យកច្រើនជំនាញ ក៏ថ្ងៃអនាគតទៅមុខមិនរួចដែរ ប៉ុន្តែការទទួលបានជោគជ័យ ឈ្នះបានមេដាយមាស ឬក៏យ៉ាងណានោះ គឺយើងត្រូវធ្វើការងារជាមួយសហព័ន្ធជាតិបន្តទៀត ព្រោះដៃយើងនៅខ្លីទេ អ៊ីចឹងយើងត្រូវមានការចូលរួមទាំងអស់គ្នា ទើបបានល្អ»៕