ក្រុងលេស៊ីងតោន: កីឡាការិនី Serena Williams បានត្រឡប់មកមានសកម្មភាពលើទីលានជាលើកដំបូងហើយ គិតតាំងពីមានការផ្ទុះឡើងនូវជំងឺកូវីដ ១៩ ដែលបានប៉ះពាល់ដល់កាលវិភាគការប្រកួតវាយកូនបាល់ (តិន្នីស) អាជីព ដោយប្រកួតដំបូងនេះ បានយកឈ្នះកីឡាការិនី Bernarda Pera ហើយត្រូវឡើងទៅជួបបងស្រីរបស់ខ្លួន Venus Williams នៅជុំទី ២ នៃកម្មវិធី Top Seed Open នាក្រុងលេស៊ីងតោន (Lexington) រដ្ឋខេនតាក់ឃី (Kentucky)។
វាជាការចាប់ផ្ដើមដ៏ល្អសម្រាប់កីឡាការិនីសញ្ជាតិអាមេរិក Serena ក្រោយពីអាចវាយបកយកឈ្នះមិត្តរួមជាតិ Pera បានវិញ ក្នុងលទ្ធផល ២ សិតទល់ ១ គឺ ៤-៦ ៦-៤ និង ៦-១ ដើម្បីបានទៅប្រឈមជាមួយបងប្អូនរួមផ្ទៃ Venus ដែលបានទម្លាក់អតីតកីឡាការិនីលេខ ១ ពិភពលោក Victoria Azarenka របស់បេឡារុស ២ សិត ០ គឺ ៦-៣ និង ៦-២។
ក្រោយបញ្ចប់ការប្រកួតដំបូងរបស់ខ្លួន កីឡាការិនី Serena បាននិយាយទៅកាន់អ្នកសារព័ត៌មាន ដោយក្ដីរំភើបថា៖ «វាជារឿងល្អ ដោយទូទៅ ព្រោះខ្ញុំខានលេងយូរហើយ ខណៈអ្នកលេងជាច្រើន កំពុងលេង ក្នុងព្រឹត្តិការណ៍ និងការប្រកួតតូចៗ ព្រមទាំងប្រកួតជាមួយគ្នា ក្នុងកម្មវិធីផ្សេងៗ តែខ្ញុំបានត្រឹមតែហ្វឹកហាត់ប៉ុណ្ណោះ ដូច្នេះ លទ្ធផលនេះ គឺពិតជាប្រសើរសម្រាប់ខ្ញុំណាស់»។
កម្មវិធី Top Seed Open ជាព្រឹត្តិការណ៍ WTA Tour ទី១ នៅសហរដ្ឋអាមេរិក តាំងពីមានការរីករាលដាលនៃជំងឺកូវីដ ១៩ ដែលបង្អាក់ការប្រកួតប្រជែងគ្រប់កម្មវិធីទាំងអស់នោះ បានផ្ដល់នូវតេស្តពីអ្វី ដែលនឹងកើតមានចំពោះកីឡការិនីវ័យ ៣៨ ឆ្នាំ ខណៈនាងប៉ុនប៉ងចង់ឈ្នះពាន Grand Slam ជាកំណត់ត្រាលើកទី២៤ នៅកម្មវិធីប្រចាំឆ្នាំ US Open ដែលនឹងរៀបចំឡើងនៅឯមជ្ឈមណ្ឌលកីឡា Flushing Meadows ដោយគ្មានសំឡេងទះដៃរបស់ទស្សនិកជន។
កីឡាការិនីលេខ ៩ ពិភពលោក Serena បានបន្ថែមពាក់ព័ន្ធនឹងព្រឹត្តិការណ៍ធំ ដែលអត់មានអ្នកគាំទ្រថា៖ «ខ្ញុំបានឆ្លងកាត់រឿងរ៉ាវច្រើនណាស់ ក្នុងអាជីពរបស់ខ្ញុំ តែលើកនេះ ពិតជាប្លែកខុសពីមុនទាំងស្រុង។ ការលេងនៅក្រុងញូវយ៉កនេះ នឹងកាន់តែប្លែកទៀត ព្រោះថា កីឡដ្ឋាននោះធំណាស់»៕ AFP/VN