ក្រុងស្តុកហូលម៍: កីឡាការិនីជិះស្គី Mikaela Shiffrin បានត្រួសត្រាយផ្លូវឆ្ពោះទៅកាន់ការឈ្នះជាលើកទី ១៤ នៃព្រឹត្តិការណ៍ World Cup នៅរដូវកាលនេះ ក្រោយពីបានកត់ត្រាជ័យជម្នះក្នុងទីក្រុង Stockholm កាលពីថ្ងៃអង្គារ។
កីឡាការិនីសញ្ជាតិអាមេរិករូបនេះដែលបានឈ្នះមេដាយមាស ២ ក្នុងព្រឹត្តិការណ៍ជើងឯកពិភពលោកកាលពីដើមខែនេះបានតាមស្មើកំណត់ត្រាសម្រាប់វិញ្ញាសាបុរស និងនារីដែលត្រូវបានបង្កើតឡើងដោយកីឡាការិនី Vreni Schneider ក្នុងយុទ្ធនាការឆ្នាំ ១៩៨៨-១៩៨៩ ខណៈនៅសល់ការប្រណាំង ១០ លើកទៀត។
Shiffrin បានយកឈ្នះលើកីឡាការិនីអាល្លឺម៉ង់ Christina Geige យ៉ាងងាយ ក្នុងវគ្គផ្តាច់ព្រ័ត្រតាមរយៈការនាំមុខ ០,២៧ វិនាទី ដើម្បីបំពេញការប្រកួតលើវិញ្ញាសាជិះស្គីចុះភ្នំចម្ងាយឆ្ងាយជាលើកទី ៦ របស់នាង ខណៈដែលគូប្រកួតដែលដេញតាមពីក្រោយយ៉ាងប្រកៀកបំផុតរបស់នាងគឺ Petra Vlhova បានខកខានក្នុងការបញ្ចប់ការប្រកួតក្នុងវគ្គ ៨ នាក់ចុងក្រោយរបស់ខ្លួន។
Shiffrin ដែលបានជួបបញ្ហាជំងឺទាក់ទងនឹងសួរនោះបានឲ្យដឹងថា៖ «ខ្ញុំបានជិះស្គីបានយ៉ាងល្អតាមដែលខ្ញុំអាច។ បើទោះបីខ្ញុំមានសុខភាពល្អប្រសើរជាងនេះ ខ្ញុំប្រហែលជាមិនអាចធ្វើបានល្អប្រសើរជាងនេះឡើយ ហើយបច្ចុប្បន្នខ្ញុំនឹងមានពេលក្នុងការសម្រាក»។
វាគឺជាការឈ្នះជាលើកទី ៥៧ ក្នុងការប្រកួតនៃយុទ្ធនាការ World Cup ក្នុងអាជីពរបស់កីឡាការិនីវ័យ ២៣ ឆ្នាំរូបនេះ ខណៈជ័យជម្នះនេះគឺជាចំនួនច្រើនជាងគេលំដាប់ទី ៥ ហើយការតាមស្មើកំណត់ត្រានៃការកត់ត្រាជ័យជម្នះសរុបចំនួន ៦២ លើករបស់កីឡាការិនីអាមេរិក Moser-Proell គឺជាគោលដៅបន្ទាប់របស់នាង។
Shiffrin បានដំណើរទៅដល់ទីក្រុង Stockholm ក្នុងនាមជាបេក្ខភាពឈានមុខគេក្នុងការទទួលជ័យជម្នះ ក្រោយពីបានឈ្នះក្នុងវិញ្ញាសា Super-G និងការប្រកួតចម្ងាយនៅភ្នំ Are ប៉ុន្តែនាងបានឈានទៅប្រកួតក្នុងវគ្គផ្តាច់ព្រ័ត្រ ក្រោយពីបានយកឈ្នះលើកីឡាការិនីម្ចាស់ស្រុក Anna Swenn-Larsson ទាំងប្រផិតប្រផើយក្នុងថិរវេលា ០,០១ វិនាទីក្នុងវគ្គពាក់កណ្តាលផ្តាច់ព្រ័ត្រ។
Swenn-Larsson បានបញ្ចប់ដោយស្ថិតក្នុងចំណាត់ថ្នាក់លេខ ៣ ក្រោយពីបានផ្តួលមិត្តរួមជាតិរបស់ខ្លួន Frida Hansdotter។ កីឡាការិនី Shiffrin ដែលកំពុងតែនាំមុខលើកំពូលតារាងក៏បានបន្ថែមការនាំមុខលើពិន្ទុសរុបរបស់ខ្លួនផងដែរ លើកីឡាការិនីឈរលេខ ២ ពោលគឺរហូតដល់ ៧១៩ ពិន្ទុ។
កីឡាការិនីទាំងអស់នឹងវិលទៅប្រកួតវិញនៅចុងសប្តាហ៍នេះនៅលើភ្នំ Crans-Montana និងចុះចំណោតក្នុងប្រទេសស្វ៊ីសនៅថ្ងៃសៅរ៍ និងថ្ងៃអាទិត្យ៕ IS